San Pra ai Maria Goretti (July 6)

San Pra ai Maria Goretti gaw, “Ramma ni Laklai Kam Shamyet ai San Pra ai Shayi Sha” rai nga ai. Shi gaw, Italy mungdan, Nettuno Mare na yi sun galaw sha ai htinggaw kaw nna, 1890 ning, October shata (16) ya shani hta shangai wa sai. Maria Goretti (9) ning sha naw rai yang, Kawa gaw, hkali ana hte n nga mat wa sai rai nga ai. Shi a kanu gaw, sun kaw amu galaw ai ten hta shi gaw, shi a kanau ni hpe nta kaw woi nga nna, nta bungli hpe galaw garum ya lai wa ai.

1902 ning, July shata (6) ya shani, nta makau na asak (18) ning re ai Alexander mying ai la kasha gaw, Maria Goretti shi hkrai sha nta kaw nga nga ai hpe mu nna, mara galaw na matu gyam nga wu ai. Dai hpe Maria Goretti aja awa ninghkap let, “N kam ai; dai gaw mara re; Karai Kasang dai hpe n ra ai. No, it’s sin. God does not want it” nga nna tsun ai. Alexander gaw, Goretti a buhpun ni hpe gang raw ai. Goretti gaw, dai zawn mara galaw na malai si hkam na, nga nna tsun ai. Goretti a ga hpe na nna Alexander gaw, grai pawt gaya mat ai majaw, Goretti a shingma hpe nhkyi hte galun kau nhtawm hprawng mat wa ai.

Goretti hpe tsirung de mawdaw hte htaw sa wa timung, Goretti a asak n hkye la lu masai. Ndai mabyin byin ai hpang hkying hkum (24) na ai shaloi, Goretti gaw, asak (12) ning hta “masha sat ai wa hpe mara raw ya ai” nga kahte ai nsen hte tsun kau da nna nsa hti mat wa nu ai.

Alexander gaw, shi galaw ai mara a majaw myit n malai ai sha, shaning (30) ning tup nga nga ai, lani mi hta San Pra ai Maria Goretti shi hpe nampan sa jaw ai shingran hpe mu ai. Dai shaloi shi myit malai lu nna, Goretti a kanu kaw mara raw hkyamsa jaw na matu sa hpyi nem wu ai.

San Pra ai Maria Goretti hpe Wa sarabyin Pius (XII) gaw, 1947 ning, April shata (27) ya shani, alu ai masha hku nna dang dat sai rai nga ai. Dai Wa Sarabyin Pius (XII) sha, 1950 ning, July Shata (6) ya shani hta Maria Goretti hpe San Pra ai masha ngu nna masat shagrau dat sai rai nga ai. Dai shagrau poi hta Goretti a kanu mung du dung lawm nga ai; Nawku hpung a matu lachyum rawng dik ai hte manu dan la ai nhtoi tai wa sai. San Pra ai Maria Goretti akyu hpyi ya ai a marang e, lamik kumla law law byin wa ai, dai mabyin ni hta Alexander myit malai lu ai lam gaw kaba dik htum rai nga ai.

Nawku hpung kaw nna, shi a poi nhtoi hpe shaning shagu, July shata (6) ya shani hta galaw ya nga ai rai nga ai.

By;

Sister Rose Angeline Marang Nang Doi (SFX)

RVA-Kachin Service (Myitkyina)