“Madu Yesu Gaw Sumnung Shingdi Tsawra Matsan Dum Lama Chye ai Sagu Rem Wa,Kasi Kaja Rai Nga Ai” nga nna Wa Sarabyin Hkaw Tsun Lai Wa Ai Shiga

Madu Yesu gaw sagu rem wa, kasi kaja rai nga ai. Tsawra matsan dum lama ai ngu ai kaw nna pru wa ai shi a magam bungli ni hpe sum nung shingdi ai, hpung masha ni hte ni ni htep htep nga ai ngu ai masa hte shadan shadawng ya ai, sagu rem ni yawng mung Madu Yesu a kasi hpe yu la hkan sa nna, arawng ya ngu ai lam hte ni htep nga hkra shakut ai masa nre ai sha, sagu hpung masha ni hte ni ni htep htep nga ra ai, nga nna Wa Sarabyin Francis hkawn tsun lai wa ai.

Lup makoi na matu lup wa de hpai sa wa ai Nain ngu ai kahtawng na gaida jan a kasha hpe Madu Yesu bai jahkrung sharawt ya ai dai shani na ja Chyum Mungga hte la kap nna lai wa sai bat lahkawng ya shani Wa Sarabyin Francis hkaw tsun lai wa ai lam rai nga ai.    

Wa Sarabyin tsun ai hta, “Madu Yesu shi a aten malawng maga hpe lam nmaw ni hkan sha nga nna jahtum ai, masha ni hpe ahtawk hkra ya ai, ahpum shakram ai, mada mara ya ai, madat ya ai, masha ni hte ni ni htep htep shanu nga ai, ndai lam ni a majaw masha ni a ka-ang hta shi dan hkung nga ai rai nga ai. Shi sharin shaga ai lam ni gaw masha ni sharin shaga ai lam ni sha rai nga ai, rai tim mung shai ai lam gaw gara masa sharin shaga ya ai ngu ai lam rai nga ai, jahtau shaban ai lam n galaw ai sha, sung nung shigdi ai, masha ni hpe aridan dam jaw ai lam shi n galaw ai, shi gaw myi htoi re hkye la Madu re ngu nna tsun shakawng ai lam shi galoi n galaw ai, masha ni a ka-ang hta nrai ai a-ten nga yang, Madu Yesu gaw akyu hpyi let shi a kawa hte rau shanu nga ai. Matsan dum lama ai lam hpe baw hte kaga kaga nrai mat ai masin salum hte shi sharin shaga ya ai. Si mani ai hte sit sa nna gai da jan hpe atawk let ‘hkum hkrap sa’ nga nna shi tsun ai.

Udang hta jen da mu, nga nna masha ni jahtau marawn nga ma ai raitim, mastan dum lama ai myit hte shi azim sha nga nga ai, arawng aya lu ai ni hpe shapyaw na matu shi hpe mara shagun lam galaw nga ma ai raitim azim sha nga na hpe sagu rem wa lata la ai, nji nmu lam hpe Madu Yesu hkam la ai, akyu hpyi ai, shi a asak hpe ap jaw ya ai, rai nga ai” nga nna Wa Sarabyin hkaw tsun lai wa ai lam Vatican shigadap kaw nna shana dat nga ai. 

Source : Vatican News

Translated by : Fr.Bernard Dashi Tang