Nyau-Lay-Byin Nu Maria a Labau Lam ( Daw 18 ) 09 June, 2020

Nyau-Lay-Byin Nu Maria a Labau Lam    ( daw 18 )

          Nu wa hpu nau ni, lai sai lamang hta, Nyau Lay Byin Jawng wang na wut hte galaw da ai hka lawng hta, Japan ni gabai kau ya ai Nu Maria sumla hte ayai mat sai Nu Maria a lata sumla ni hpe tam lahkawn la nhtawm me, atsawm sha zing da sai lam daini du hkra labau shang rai nga sai lam na la lu saga ai rai nga ai. Madu a shaning (1950 – 1955) ning du hkra, Jawng dung Jau rai nga ai Wa Jau Alyoius gaw, Hpa-do, In:-hpyawk, Simpraw Te-su, Chaung-zawk hte Chyu:-htik mare ni de sa du gawan let, Nyau Lay byin mare na daw hten mat sai Nu Maria sumla hte, Nu Maria a lata ni hpe atsawm sha hpai la nna, Yangon, Insein mare de la wa nna, bai gram lajang la rai, Nu Maria Lung pu nta de bai mara tawn da lu sai rai nga ai. Bai gram lajang da ai re majaw, Nu Maria a lata matut da ai shara kaw, loi mi bawng bawng rai nga ai. Ya daini du hkra, mu mada lu nga mali ai re. Nu Maria a sumla hpe tsi chya shatsawm ai ni hte Nu Maria hpe jahpun ai shang gan Alu jaw bang ai ni gaw, ya na zawn bawng taw nga ai Nu Maria a lata hpe ta lahkawn hkawn da ai shadu nna, dai shara kaw, Ja nsam hte chya shatsawm ya ya di ma ai lam chye lu ai.

          Madu a shaning (1955 – 1975) ning du hkra Jawng dung Jau lit magam hpe gun hpai lai wa sai Wa Jau Wee gaw, Hpa-do kaw nga nna, Nyau Lay Byin Jawng wang bai lu la na matu, Myen hpyen dap ni hte jahkrum bawng ban nu ai. Gade nna yang, Myen ni a lata kawn Jawng wang hpe bai lu la sai rai nga ai. Shingrai, Madu a shaning (1957) ning hta, Nyau Lay Byin mare hta Lourds Nu Maria poi hpe bai galaw hpang lu sai lam daini du hkra labau shang matsing da nga sai re. Shaning (20) ning tup Nyau Lay Byin mare kaw magam gun lai wa sai Wa Jau Wee a shamu shamawt shakut shaja ai lam gaw law law rai nga ai. Wa Jau Wee a Sasana magam hta gara hku shakut shaja lai mat wa sai, majan lapran gade ram jam jau hkrum lai wa sai hte Sagu hpung masha ni hpe gara hku woi awn lai mat wa sai lam ni hpe du na ra ai aten ni hta tsun hkai dan ya na nngai.  Shingrai nu wa ni, Japan hpyen dap, Myen hpyen dap ni kawn gabai kau, malap kau da ai machyu pala, bawm yam ni hpe (1993) ning hta ya ndai laika buk hpe ka lajang da ai, Wa Jau simon Thin Mg kaw nna, Bawm tam jak ni hte jawng wang ting hpe atsawm sha tam kau, tsan kau sai rai nga ai. Dai majaw, dai ten kaw nna, majan hte seng ai arung arai ni, bawm yam, sanat machyu pala ni tsep kawp nmu mada sai lam labau hta matsing da nga mali ai re.

          Madu a shaning (1947) ning April shata (10) ya shani hta, Nyau Lay byin Jawng na ningtau Jau rai nga ai Wa Jau Mahte gaw, majan mung hkoi sai re majaw, shawng ningnan na Chyoi Pra Hkum Sin ai Poi kaba hpe galaw na matu, myit makun nga ai re majaw, chyeju dum poi lamang hku nna galaw hpang sai rai nga ai. Ndai lamang hpe Paska poi garai nhpang shi ai kawn tau nau hkyen lajang nga nu ai. Shingrai Paska poi ngut ai hpang na bat hta, Nyau Lay Byin sasana a, Chyun:-htik ngu ai mare kahtawng kaw Chyoi Pra ai hkum poi kaba hpe hkyik hkam ai hku galaw la lu sai majaw, du sa shawa masha yawng grai kabu nga masai. Ya na zawn Chyoi Pra hkum hpe Nawku Hkungga shakawn ai poi kaba hpe ndai sasana hta kalang mi pi n galaw ga ai majaw, sa du ai ni yawng kabu chyeju dum ai sha n ga, makam masham nbung ai hpu nau ni mung, Chyoi Pra Hkum hpe hpai shinggrup gawan ai ten, myit masin hte shang lawm let, akyu ara hkam la ma ai lam, makam masham nbung ai ni a hpaw tsun sak se hkam da ai hpe matsing da nga mali ai re.  Shingra, Madu Yesu a Chyoi Pra ai hkum gaw, hpung shingkang rawng let, dan hkung nga mali ai. Ya na zawn Chyoi Pra Hkum poi kaba galaw ai a yaw shada lam gaw, makam masham hta, ahpa atang rai nga ai ni, lani hte lani makam masham hta ru jung wa lu mu ga hte, Sagu lawng kawn dam hkawm mat ai ni, lani mi na nhtoi hta, sagu lawng de bai du wa mu ga matu yaw shada let, ndai poi lamang kaba hpe galaw ai re lam Wa Jau Mahte shi hkum nan hpaw tsun da ai hpe chye lu ai.

          Jau gaw shi a yaw shada lam hpe sa du ai masha ni yawng hpe ndau shana let, akyu hpyi ya na matu saw shaga sai rai nga ai. Ndai Chyoi Pra Hkum poi kaba hpe galaw na lahkawng masum ya daram naw ra ai ten, ndai kahtawng mare hkan nga ai nawku hpung masha ni hpe shaga la nhtawm me, nawku mahkawn mangoi ni hpe sharin ya nu ai. Dai majaw, Chyoi Pra Hkum Poi kaba nhtoi hta mahkawn mangwi  hte nawku shakawn la lu sai rai nga ai. Misa Hkungga ngut ai hpang, Jau gaw, Chyoi Pra Hkum hpe atsawm sha pawn, hpai la nhtawm me, Jawng wang shinggrup, Rosary hti akyu hpyi la ma ai. Dai hpang, Nawku Jawng de shang wa nna, akyu hpyi sa masha ni  yawng hpe, Chyoi Pra Hkum hte shaman ya sai. Ndai zawn Chyoi Pra Hkum hpe hpai gawan akyu hpyi shinggrup ai hpe nmu ga ai, makam masham kaga de na hpu nau ni gaw, yu let, shanhte mung lata lahkawng hpe gayep nna akyu hpyi la ma ai da. Ya na zawn akyu hpyi shinggrup ngut ai hpang, Chyoi Pra Hkum hpe Nawku tawn kaw tawn da nhtawm me, shana yup tung ten du hkra, nawku hpung masha ni gahti galai rai, Chyoi Pra hkum hpe sin, akyu hpyi nawku nga ma ai lam daini du hkra labau shang rai nga sai. Shana yup tung du ai shaloi Jau gaw, Karai Mungga hte hkaw tsun shangut nu ai, Ndai Chyoi Pra Hkum Poi kaba hta, Masha marai (100) jan Chyoi Pra Hkum hpe nnan hkam la lu sai re majaw, yawng gaw grai kabu let, matut nna shaning shagu ndai poi hpe galaw na matu n gun jaw hpaw tsun da sai lam gam garan ya let, ngam nga daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.