Nyau-Lay-Byin Nu Maria a Labau Lam ( Daw 17 ) 02 June, 2020

Nyau-Lay-Byin Nu Maria a Labau Lam    ( daw 17 )

          Nawku hpung a labau lam hpe hkap madat la na ten bai du wa magang nga sai hte rau daini na lamang hta, Ya ten Singapore mundan kaw magam bungli galaw shakut nga ai Julia Labang Tawm Num hpyi shawn da ai, Yangon Sasana, Nyau-lay -byin mare na, Lourdes Nu Maria Lung pu byin pru wa ai lam hte seng nna, Wa Jau Simon Thin Mg ka lajang da ai hta na, yawng a matu akyu tai u ga yaw shada let, matut gam garan ya mayu n ngai.

          Nu wa hpu nau ni, lai sai lamang hta, Japan majan a majaw, Nyau Lay Byin mare na Nu Maria nga ai Nawku Jawng wang hte Pa-gu mare na San Clay mama ni nga ai ai jawng bawm hte jahten shaza kau ya sai majaw, buga masha ni myit yawn ai hte, San Clay mama ni mung, shanhte a ginjaw nga ai India mungdan de jahkring mi wa mat sai lam na la lu saga ai rai nga ai. Dai ten kawn San Clay mama ni wa mat ai, ya daini du hkra, bai nlu sa mat sai lam chye lu ai. Japan majan ten ngam nga ai ngu na gaw, Nyau Lay Byin Jawng wang na Nu Maria lung pu hte Kahtawlik ni hpaw da ai laika sharin jawng sha n hten ai, nga nna labau hta matsing da ai hpe mu lu ai. Gade nna ai ten, Japan ni lagaw hku hkawm lung wa nhtawm me, Yangon, Mandalay wan leng lam ntsa, grau nna, magyi magaw re ai wan leng lam rai nga ai, Nyau Lay Byin mare hta hpyen dap jung nna, nta kaba ba nga ai, Kahtawlik Nawku Jawng wang kata kaw dap jung nga masai. Shingrai, majan bawm a majaw hten za mat ai wut ngam ni hpe hta la nhtawm me, Jawng wang kata shanhte nga ai shara hkan nyep la masai. Bai nna, Nu Maria Lung pu kata bang da ai sumla ni hpe gang garawt shaw kau nhtawm me, “ majan sum ai English ni a hpa-ra hpe nawku ai gaw, nga nna, asawng asang tsun taw nga masai.”

          Bai, Nu Maria a lata hpe mung gayet agrawp kau ya ma ai lam labau hta myit npyaw hpa, yawn hpa matsing da ma ai lam chye lu ai. Ya na zawn agawp jahten kau ya ai Nu Maria a sumla adaw achyen ni hpe, ya daini na ten, Jawng wang shang wa ai chying hka lam kawn nna, Maria Lung pu a makau wut hte galaw da ai hka lawng kata de gabai kau ya ma ai lam chye lu ai. Maria lung pu grup grup gaw da ai wut ni hpe mung shaw la nhtawm me, lam hkan nyep kau ma ai. Nu Maria Lung Pu nga ai hte ang ang kaw, hpyen dap shatai nga taw masai da. Dai zawn nga ai gade nna yang, Japan hpyen la ni, mau na zawn re ana machyi makaw hkrum sha masai. Mau hpa gaw, dai Japan hpyen la ni, shanhte hkrai du gyit si ai hte, myi nmu mat rai nna si hkrum masai lam labau hta matsing da ai hpe mu hti lu ai. Ya na zawn machyi makaw law ai hte si wa ai ni law wa ai majaw, matut nna, Nu Maria lung pu hte jawng wang hpe jahten shaza ai lam hpe jahkring kau manu ai. Shanhte jahten shaza ngut ai ten, Nu Maria Lung pu a gade nde shakum (4) hte ntsa kaw nyep da ai panyep hte shingdu maga de na shakum sha ngam nga sai lam buga masha ni hpaw tsun dan ai hpe chye lu ai.

          Nu wa ni, Japan majan ngut ai hpang, Nyau Lay Byin na Nu Maria nga ai Jawng Wang hpe, Wa Jau Lucas Wee, kawn bai gram galaw gaw gap da ai rai nga ai. Wa Jau Lucas Wee ngut ai hpang, Wa Jau Peter Htet Lwin hte Wa Jau Simon Tin Mg ni hku nna, matut makawp maga, galaw, gaw gap da sai lam daini du hkra labau shang rai nga sai. Japan majan kawn nna, Nyau Lay byin mare kaw mare masha ni nnga mat ai zawn Wa Jau ni mung n nga mat sai. Hpyen majan a majaw, Chaung-zawk, chyun:-htik, hpa-do, In:-hpyawk kahtawng ni de hprawng htawt hkawm nga masai lam chye lu ai. Shingrai Nyau Lay byin Nawku Jawng Wang gaw, Nu Maria mung n nga mat, Nawku Jawng mung hten za mat sai majaw, grai hkraw hkrun mat sai rai nga ai. Nawku Hpung masha ni mung, tinang chye ai de htawt sit hprawng hkawm ra sai majaw, dai shara hta, Nu Maria poi hpe nlu galaw mat sai. Raitim, nawku hpung masha ni nga ai shara de, buga na Karen Jau rai nga ai Wa Jau Marhte woi awn let,  mai byin ai hku, galaw lu hkra galaw ma ai lam chye lu ai. Shingrai, Nyau Lay Byin na Lourds Nu Maria poi hpe shaning shagu galaw wa ai gaw, ya daini du hkra rai nga mali ai nu wa ni. Moi lai sai ten ni hta, majan a majaw Nu Maria poi hpe nlu galaw ai ten ni nga wa sai zawn, ya daining (2020) ning na Nu Maria poi hpe mung, Mungkan hta hkrit tsang ra ai Ana zinli a majaw Nu Maria poi hpe nlu galaw sai gaw, anhte yawng a matu myit npyaw hpa rai nga mali ai. Raitim, Nu Maria gaw shi hpe kam hpa manoi nga ai ni hpe lanu lahku bau sin makawp maga na gaw teng sha rai na re.

          Madu a shaning (1948)ning Myen mungdan rawt malan lu ai ten hta, Nu Maria poi hpe galaw na matu, Seng ang ai Jau ni woi awn sai lam chye lu ai. Dai ten hta, majan nnan sha zim ai ten re majaw, wan leng lam ni grai naw hten za ai lam chye lu ai. Shingrai, sumtsaw sumtsan de na ni ndu lu ai raitim, ni nawn ai mare buga hkan na ni sa du akyu hpyi la ma ai lam labau hta matsing da ma ai. Japan majan ngut ai hte, dinghku majan bai byin wa ai majaw, Nyau Lay byin mare hta Nu Maria poi hpe nlu galaw sai rai nga ai. Ndai dinghku majan hpe mying la nna, myen hpyen la ni, ndai Nyau Lay Byin mare na Nawku Jawng wang kaw hpyen dap shatai nga taw masai da. Japan majan hta Japan hpyen la ni, bai, majan ngut nna, dinghku majan byin ai ten mung myen hpyen la ni, Ya na zawn hpyen dap shatai nga taw ai raitim, Wa Jau Marhte gaw, (1938 – 1948) ning du hkra, aten lu yang lu ai zawn, Jawng wang de sa nna, Jau ni a nta ntsa htap hpe nawku jawng shatai let, hpung masha ni hpe bai zinlum nga sai rai nga ai. Jawng wang na wut hte galaw da ai hka lawng hta, Japan ni gabai kau ya ai Nu Maria sumla hte ayai mat sai Nu Maria a lata sumla ni hpe tam lahkawn la nhtawm me, atsawm sha zing da sai lam daini du hkra labau shang rai nga sai lam gam garan ya let, ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.