Nawku Hpung Shiga ( Church News ) 06 May, 2020

Kun dinghku shagu simsa lam lu ai hte Nawku hpung hta gahkyin gumding nga mu ga, nga nna, Wa Sarabyin shi a Misa hkungga hta tsut dat nga ai shiga.

Madu Karai Kasang gaw Myit masa garan ginhka ai lam kaw na anhte hpe shalawt dat ya u ga; ndai zawn myit garan ai myit masa rawng ai hpe mu chye nna, Madu Yesu a jaw ang ai hta hkawm sa lu na matu garum shingtau ya u ga; Madu Yesu hta anhte ni yawng gaw kahpu kanau, nauna ni hkrai rai nga ga ai hte Shi gaw yawng a Sagru Rem Wa rai nga ai.

Casa Santa Marta Nawku Hting nu hta nawng jau ai Misa hkungga hta Wa Sarabying Francis gaw chyam bra nga ai coronavirus a majaw dum nta pat nta rawng rawng ai ni a matu akyu hpyi ya ai hte Nawku hpung gahkying gumding wa u ga Yesu ra sharawng nga ai hpe bai myit dum akyu hpyi ya nga ai. Shi a mungga hta Wa Sarabyin Francis n’bung ai ni yawng pawng hpawm wa na gaw ahkyak la nga ai ngu ai hpe madung da sumru ai hpe chye lu ai.

Chyum mungga daw langai, kasa laika hta Hkristan wuhpung wuhpawng gaw San Peter Yerusalem kaw tara maigan masha ni hte rau lu sha nga ma ai hpe aja awa mara shagun ma ai. Ndai gaw anhte mu mada ai shawng na Hkristan masha ni hta myit garan ginhka ai ga shadawn langai sha naw re ai ngu Wa Sarabyin tsun da nga ai.

Dai zawn garan ginhka ai lam gaw tengman dum ai ni hte mara lu ai masha ni hpe garan kau ya lam anhte hta tai wa na re. Anhte ni gaw Karai Kasang a man e tengman dinghpring ai ni re ngu hkam la chye ga ai. Kalang marang anhte dai zawn myit ai gaw masha kaga ni hpe jeyang hkrum ai ni zawn hkam sha shangun chye nga ai. San Peter sha n ga, Madu Yesu hkum nan mung mara lu ai, ni kang hta ai ni hte rau lu sha lai wa sai zawn Sasana galaw ai anhte a makau grup yin hta mung galaw ra nga ga ai re.

Ndai masa hta garan ginhka ai shinggyim ni a shut ai ningmu nawku hpung hta ana kanu zawn dingbai dingna jaw chye nga ai nga nna Wa Sarabyin Francis tsun da nga ai. Shi sadi jaw ai gaw, anhte ni madang shara ni hpe garan ginhka ai hku sawn la ai lam gaw Chyoi Pra ai Wenyi a Lam woi ai hku hkan nang hkan sa ai hta grau ahkyak nga ai kun? nga rai nga ai. Dai zawn myit ai lam gaw garan ginhka ai lam de hkawm sa shangun ai tai nga ai.

Wa Sarabyin gaw Cardinal Emeritu a ga shadawn mungga  “Nawku hpung gaw Malihka zawn re”  ngu ai hpe mahta nna anhte hpe tsun ai sang lang da ai. Masha nkau mi malihka hkinggau shara maga mi hte ni grau ai rai nna, nkau ni gaw laga maga na hkinggau hte grau ni nga ai. Masha shagu gaw malihka hkinggau makau kaw nga ai ni sha rai nga ai. Kadai mung de a shinggan, kata de nga ai nre. Karai Kasang gaw dai masa hpe ra sharawng nga ai.

Kabu gara shiga hta na Madu Yesu a mungga hpe bai sumru ai hta Yawhan 10:16 hta na rai nga ai “Ndai wulawng hte nseng ai kaga sagu ni mung ngai naw lu nngai, dai sagu ni hpe mung ngai naw woi jashawn la lu na rai nna dai ni mung nye a nsen madat na mara ai. Shaloi sagu hpung langai sha, sagu rem wa langai sha, rai na ra ai.” ngu ai rai nga ai.

Wa Sarabyin tsun ai hta “kaja wa nga wang marai hku shagu gaw Yesu hta rai nga na ahkyak la nga ai” ngu ai gaw Yesu “masha shagu a matu si hkam ai” majaw rai nga ai. Madu Yesu si hkam ai gaw tengman dinghpring ai ni hte tara ai ni a matu sha nrai nga ai; mang hkang jaw ai ni, lagu lagut ni, hte shi hpe n’kam n’sham ai ni a matu mung rai nga ai. “Shi gaw masha shagu a matu si hkam ai re” ngu Wa Sarabyin matu tsun da nga ai.

Sagu rem wa langai sha rai nga u ga. Wa Sarabyin gaw num, la yawng gahking gumding wa u ga; Sagu rem wa langai sha rai nga u ga matu akyu hpyi ga nga saw saga da nga ai. “Madu Karai Kasang gaw Myit masa garan ginhka ai lam kaw na anhte hpe shalawt dat ya u ga; ndai zawn myit garan ai myit masa rawng ai hpe mu chye nna, Madu Yesu a jaw ang ai hta hkawm sa lu na matu garum shingtau ya u ga; Madu Yesu hta anhte ni yawng gaw kahpu kanau, nauna ni hkrai rai nga ga ai hte Shi gaw yawng ai Sagru Rem Wa rai nga ai.” nga nna tsun da nga ai lam Vatican shiga dap kaw nna shana dat nga ai.

Dai shani na Ga si madung gaw “Masha hkum shagu” “Marai hkum shagu” nga ai rai nga ai.

Ka Lajang Ai ; Fr. Patrick Gaw Maw Hkawng Yae