Wa Sarabyin : Masha hkum shagu bungli n'nga ai; araung sadang n'nga ai; lu ang ai manu shabrai n'lu ai lam ni n nga lu u ga.

01/05/2020 ya shani Vatican kaw na lu la ai shiga

May (1) ya, San Yawsep a poi, magam bungli galaw ai ni a nhtoi, shani ang ai laban (5) ya jahpawt na Misa hkungga hta bungli galaw ai ni a arawng sadang hte tara rap ra lam a ahkyak lam hpe sumru hkan sa lu mu ga matu Wa Sarabyin Francis Misa hkungga nawng jau ya sai.

“Daini, bungli galaw ai San Yawsep a poi nhtoi hte bungli galaw ni a matu san da ai nhtoi hta, bungli galaw sha nga ai ni a matu akyu hpyi ya ga; shaloi, bungli nlu ai ni nnga sana rai nna, shanhte hpe tara ai hte lu ang ai shabrai mung lu u ga. Shanhte gaw bungli bungsi hta arawng sadang nga, htap htuk tsawm htap manu ai hku hkring sa la lu mu ga” nga nna, akyu hpyi da ya nga ai.

Chyum mungga hpe Ningpawt Ninghpang 1:26-2:3, dai shani Misa hta hti ang ai kaw na Hpan Madu Karai Kasang shinggyim la sha hte num sha hpe shi a wenyi hte bung pre ai hku hpang da ai lam hpe lakap nna mungga htawn ai. Nga yawng nga pra hpe hpan da ai hpang Shinggyim la sha hte num sha hpe bungli ap da sai re majaw matut manoi bungli magam hta shakut shaja na anhte myit ra ga ai.

“Bungli magam gaw Karai Kasang a magam hpe matut manoi galaw ai amu rai nga ai. Shinggyim masha ni amu magam galaw ai gaw Karai Kasang a hpan da magam galaw ai ten kaw na nan hkam la lu ai chyeju re. Amu magam galaw ai gaw Karai Kasang hte bung wa ai lam rai nga ai; hpa majaw nga yang amu bungli galaw ai la sha, num sha ni gaw hpan hpajang ai lam law law hta shang lawm ai; tinang kun dinghku hpe gawde shachyaw shatsawm ai lam rai nga ai.”