CHYOI PRA AI KRU YA SHANI ( Easter Vigil ) 11 April, 2020

Nawku Dawjau ai Lamang Daw Ni:-
Daw 1. Wan hpe shaman ai.
(a) Paska Hpayawngdeng Kaba Shaman ai
(b) Paska Hpayawngdeng Kaba hpe Nawku Jawng Nhku de hpai shang wa ai

Daw 2. Paska Padang Mahkawn ( Exultet)
--Ndai hta Paska Gawng Malai (Sequence) hte shut chye ai, sadi ga. Paska Gawng Malai Mahkawn hpe Paska Poi Shani hta Alleluia garai n mahkawn yang, mahkawn ai rai li ai.

Daw 3. Chyum Mungga Hti Ai
--Np Nhp 1:1,26-31a
--Pru Mat Wa ai laika 14:15-15:1
( Nawku tawn na hpayawngdeng ni hpe wan shachyi ai, “LAMAU E KARAI WA KAW SHINGKANG MAHKAWN AI”)
--Roma 6:3-11
--Shakawn Kungdawn Ga..(Alleluia, Alleluia, Alleluia)
--Luka 24:1-12

Daw 4. Kashin Kamun Hkahtung Shaman ai/ Shing n rai Shani Shagu Lang ai shaman ntsin hpe shaman ai.

Daw 5. Kashin Kamun Ga Shaka bai tawn dai ai
( Hpung masha shawa hpe shaman ntsin lapri bun ya ai, Makam Masham Ga Hpe n mahkawn sai.)

Daw 6. Muk hte tsabyi chyaru ap ya ai hpang Missa Hkungga matut nawng ai.

**Yesu Hkristu si ai kaw na hkrung rawt wa ai. Ndai gaw kaba dik ai mabyin rai nga ai. Si hkrung si htan a ntsa padang dip ai lam nan rai nga ai. Ndai bai hkrung rawt ai marang e, Yesu gaw hkrung ai hte si ai ni yawng a Madu re ai hpe madi madun nga ai. Shi gaw anhte hpe shalawt na hte shamai shatsai na daru magam atsam lu nga ai.

--“ Si mat ai ni kaw na hkrung sharawt la hkrum ai Hkristu gaw galoi mung bai n si lu na re”(Rom 6:9)nga nna Kasa Pawlu Roma masha ni hpe tsun shana ya sai. Yesu gaw Madu rai nga ai. Lup de sa du ai dai chyoi prai numsha ni hpe, tu kabrim ai hpun palawng bu hpun ai lamu kasa marai 2 tsun ai gaw, “ Hkrung ai wa hpe ,si ai ni kaw hpa rai tam myit ta?”nga ai. Shaloi shanhte gaw Yesu a ga hpe dum nna, lup de na bai wa ma ai. Sape shi langai hte kaga ni nlang hte hpe, dai lam yawng mayawng wa tsun dan mu ai.

--Paska Udi ( Easter eggs) hte mung Yesu a hkung rawt wa ai hpe kumla hku nna lachyum shaleng dan ai htung lai nga ga ai. Udi ni grai tsawm hkra nsam hpan law law hte shakya tawn da ai. Asak ningnan hte Madu Yesu a hkrung rawt wa lam hpe lachyum shapraw dan ai. Chyoi pra ai Kru Ya na nawku dawjau lamang ngut wa yang, Jau shaman ya ai. Dai hpang shawa hpe garan jaw ai.

--Anhte a Madu si mat ai kaw na hpung shingkang hte bai hkrung rawt ai hpe myit dum nga ga ai majaw, Shi hpe shakawn kungdawn nga ga ai rai. Shakawn kungdawn laika Daw 118:24 hta tsun da ai hte maren, “ Dai ni gaw, Karai Kasang tawn da ai n’htoi rai nga ai. Dai hta e, anhte awng nga ga…”

Alleluia, Alleluia, Alleluia….