Laban Shani Na Karai Kasang a Mungga (Pran Wan Laban 22, 2018 )

Chyum Mungga Daw I - Tara Jahprang 4: 1-2, 6-8,

Chyum Mungga Daw II - Yaku a Shagun dat ai Laika 1: 17-18, 21- 22, 27,

Kabu Gara Shiga - Marku 7:1-8, 14-15, 21-23

Madu Yesu hkristu a prat hta Yudah masha ni hku nna, shanhte a Nawku daw jau ai lam ni gaw, Sin ai bum ntsa hta Mawshe a lata hku nna Karai Kasang shanhte hpe jaw da ai tara ni hte nhtan nshai hkra ngu ai masa hku nna grai shakut lai wa ai ni rai ma ai. Chyoi pra san seng ai prat hte sak hkrung hkawm sa lu na nga na matu shanhte hpe Karai Kasang galoi mung shadum nga ai zawn, dai chyoi pra ai lam hta hkawm sa nga lu na matu ngu ai yaw shada ai lam hte, Yudah tara salang ni hku nna, shani shagu shanhte hkan sa ra ai tara lai htung ni hpe mung jat la la di rai wa ma ai rai nga ai. Ndai zawn rai jat la lai wa ai shanhte hkan sa ra ai lai htung tara ni law law ni gaw yu maya masha ni a matu lit kaba langai zawn tai wa ai rai nga ai.

Ndai bat na kabu gara ai shiga hta Madu Yesu hku nna shi a Sape ni hpe shanhte hkan sa ra ai yudah lai htung tara ni hpe nhkan sa ai sha nga woi ai lam ni hpe Yudah tara Sara ni hte Hparishe ni mu ai shaloi, dai lam ni a majaw Madu Yesu hpe mara shagun lai wa ma ai lam anhte na la lai wa saga ai. Yudah tara Sara ni hte Hparishe ni hku nna lak san masha dat nna Madu Yesu hpe hpa rai dai zawn shi a sape ni hpe tara nlang woi ai lam san lai wa ma ai mung rai nga ai. Ndai zawn re ai ga san ni hpe Madu Yesu hku nna mung tara ni hpe jaw da ai a Karai Kasang a yaw shada ai lam madung hpe tsun shaleng let shanhte a ga san ni hpe htai  ya lai wa ai lam kabu gara ai shiga hta na la lai wa saga ai.

Yudah tara Sara ni hte Hparishe ni gaw makam masham hpe shanhte chye na ai hku shanhte hkrai lachyum shapraw la da ai lam ni hte, shanhte a myit ni hpe mung dai lam ni hte sha ga-up da hkrum nna Karai Kasang a tara ni a yaw shada ai lam madung hpe shanhte malap mali di kau nga ma ai, dai re ai majaw Madu Yesu hku nna, “shanhte ngai hpe kaman lila Nawku nga ma ai”, nga ai myit htoi Esaia a ga hte shanhte hpe shadum let, “nanhte gaw Karai Kasang a hkang da ai ga hpe kau da nhtawm, masha a ga madat hpe sha hkan nga myit dai” nga nna tsun lai wa ai rai nga ai. Lachyum gaw, Yudah tara Sara ni hte Hparishe ni hku nna, masha a man hta gaw Karai Kasang a tara ni hpe shanhte hkan nang nga ai ngu ai lam hpe ntsa lam mu mada hkra galaw dan nga tim, kaja wa shanhte myit masin hta gaw nkaja ai myit masin ni hte yaw shada ai lam ni sha rawng nga ai, bai, shanhte gaw Karai Kasang jaw da ai tara ni hpe kabai kau nna shanhte hkrai lachyum shaleng da ai lam ni hpe Karai Kasang ra sharawng ai lam ni re ngu nna tsun ndang hkat ai lam sha galaw nga ma ai ni re ngu nna Madu Yesu tsun ai rai nga ai.

Madu Yesu hku nna mung, ga shaka ding sa prat hta myi htoi Esaia hku nna, dai shaloi na masha ni Karai Kasang hpe n-gup n-ten hte Nawku daw jau nga ma tim shanhte a myit masin ni gaw Karai Kasang ra sharawng ai lam hte tsan nga ma ai, nga nna tsun shadum lai wa ai ga hpe sha bai lang nna, “Ndai amyu ni gaw tinang a nten hte sha ngai hpe hkungga lara ma ti mung, shanhte a myit masin ngai hte tsan gang malu ai, masha ga matsun hpe sha htawn sharin shaga nga ma ai majaw, shanhte ngai hpe kaman lila Nawku nga ma ai ” nga nna tsun ai rai nga ai.

Tsawra ai ni wa hpu nau ni, Karai Kasang a Mungga hta, anhte a nchye nchyang ai lam ni, gum rawng gum tawng ai lam ni hte ting kyeng myit myit ai lam ni hpe jahkoi kau ya lu na atsam nga nga ai. Shi Madu a yaw shada ai lam ni chye na wa lu na matu hte shi a tsawra ai lam hta hkawm sa nga lu na matu dai Mungga ni gaw anhte myit masin ni hpe nhtoi jaw ya lu ai zawn shachyoi shapra ya lu ai atsam mung dai mungga hta nga nga malu ai. Bai shi Madu hpang de sit sa wa na matu mung shi galoi mung anhte hpe saw shaga nga ai, ahkyak ai gaw anhte kaja wa chyoi pra san seng ai myit masin myit masa hte shi hpang de sit sa wa lu hkra shakut nga ga ai kun ngu ai lam ni hpe tinang a hkum hpe san ding lik yu ra na rai ga ai.

Bai, n kaja ai lam ni gara hku nna anhte hpang de du pru wa ai ngu ai lam ni hte, dai n kaja ai lam ni anhte a prat hta noi rawng nga ai kaw nna lawt wa lu hkra kara hku galaw ra ai ngu ai lam ni hte seng nna tsun sharin  ai lam ni hpe mung ndai bat na kabu gara ai shiga hta mu lu nga ga ai. Yuda makam masham ning baw ni hku nna  Nawku daw jau ai lam ni hte seng nna nsan seng ai lam n byin u ga awu asin byin shangun ai lam ni hpe n-galaw hkrup hkra grai sadi ai rai ma ai. Ndai zawn rai sadi ai ngu ai hta, nkau mi chyawm gaw Karai Kasang hpe hkrit hkungga ai myit hte galaw ai ni rain a rai ma ai, rai tim malawng maga gaw, masha ni e tsun a hpyak kau ai lam nbyin u ga masha ni hpe myit shapyaw na matu galaw dan ai ni she rai ma ai. Dai re ai majaw, Madu Yesu hku nna, shi a Mungga madat nga ai ni hpe, n kaja ai lam a npawt nhpang lam ni hpe madi madun tsun sharin lai wa ai rai nga ai. Madu Yesu tsun ai hta, “masha e shing gan e nga nna shi kata de shang wa ai hpa rai tim mung, shi hpe awu asin di kau lu ai nrai, masha a kraw kata de nna pru wa ai mahtang gaw, masha hpe awu asin di kau wu ai” nga ai.

Lachyum gaw, shut hpyit mara ngu ai shi hkrai hkrai byin wa ai nrai, shawng nnan anhte a myit masin hta, anhte a myit mang ai lam ni hte yaw sing yaw shada ai lam ni kaw nna prut hpang wa ai rai nga ai. Anhte a shut hpyi ai kaw nna anhte hpe hkye la na matu  Karai Kasang gaw tsawra matsan dum ai myit hte shi a kasha Madu Yesu hpe anhte hpang de shangun dat ai rai nga ai. Rai timung, shi a tsawra matsan dum lama ai lam ni hpe hkam la lu na matu anhte gaw anhte a shut hpyit ai lam ni hpe yin la na ra ga ai. Yawhan a shagun dat ai laika langai 1: 8 hte 9 hta, “anhte shut hpyit mara n lu ga ai, ngu nna tsun ga yang gaw anhte a hkum hpe anhte masu hka lem kau ga ai rai nna, teng man ai myit anhte hta nrawng saga ai, anhte a mara hpe anhte yin la madun nna hpyi nem ga yang gaw, anhte a mara hpe raw dat kau na hte nding n man ai nlang hte hta na, anhte hpe jasan jaseng ya na ra ai” nga nna kasa Yawhan mung shadum da nga ai.

Karai Kasang chyu sha Chyoi pra ai Wenyi a n-gun atsam hte anhte a masin salum ni hpe gram lajang jasan jaseng ya lu nga ai. Wun ma hpe tsin lajang ai lam garai ngalaw shi yang tsi sara wun hku nna dai wun ma hpe atsawm sha shawng ding lik masam maram yu ai lam ni galaw ai zawn, anhte a shut hpyit ai lam ni hpe anhte yin la lu hkra, Karai Kasang gaw shi a mungga ni hte chyoi pra ai wenyi a marang e anhte hpe garum ya ai, de a hpang shi a tsawra matsan dum lama ai la hte chyeju kum hpa ni hku nna anhte hpe raw dat hkyam sa ai lam hte shamai shatsai ya ai lam ni hpe jaw ya ai rai nga ai. Anhte Madu hpang de kayin wa nna hpyi nem ga ai shaloi, chyoi pra ai wenyi gaw anhte tinang a prat hpe atsawm sha chye na wa lu na matu garum ya ai sha n-ga Madu Yesu gaw anhte shut hpyit mara ni hpe kaja wa teng teng raw kau ya na ngu ai lam hpe mung shadum shangang ya nga ai.

Kanau Abela hpe manawn masham ai myit ni Cain hta rawng hpang wa ai shaloi, Karai Kasang hku nna  “nang kaja ai galaw yang gaw, myi man hpaw lu nan rai ni, nkaja ai nang galwa yang chyawm gaw, yu bak gaw chying hka makau e makun hpum nga ai” nga nna Karai Kasang shadum lai wa ai lam Gen 4:7 hta mu lu nga ai. Tsawra ai nu wa hpu nau ni, Shut hpyit mara anhte a masin salum chying hka de sit sa wa ai hpe anhte matut nna shang wa lu na ahkang jaw na rai ga ai kun, shut hpyit ai de woi sa mat wa lu ai anhte a nsan seng ai myit mang ai lam ni hta len pyaw nga na malai Karai Kasang a chyeju hte dai ni yawng hpe manga kau lu hkra shakut ra na rai ga ai. Madu Yesu mung anhte a myit masin ni hpe jasan jaseng kau ya na matu shi a hkum hpe anhte a matu galoi mung shajin da sai rai nga ai. Dai re ai majaw shi a chyeju kum hpa ni hte kaja ai lam ni hpe lata la nna nkaja ai lam ni hpe galoi mung koi yen manga kau lu hkra shakut nga ga.

Akyu hpyi saga: Wa Karai Kasang e, Nang gaw mai kaja ai lam ai laam ma hkra a npawt daju rai nga ndai, nang hpe tsawra ai myit maju jung hkra anhte akraw lawang hte e mai kaja ai lai len ni hpe jahkum shatsup y anna, akyu hpyi Nawku ai la hta shaakut lu na matu, n gun atsam jaw ya mi ..anhte a Madu Yesu Hkristu a marang e hpyi nem nga ga ai.Amen.

Wa Jau Bernard Da Shi Tang Ji