Coronavirus Hkrum Masha Ni Hpe Wa Sarabyin Laika Shagun Jaw 

Covid-19 ngu ai Coronavirus ana byin hkrum nga ai Italy Mungdan dingdung maga na mung chying sha ni hpang de, myit hpawm let akyu hpyi ya nga ai lam March shata 10 ya shnai Wa sarabyin laika ka shagun jaw dat nga ai. Laika ka nna yawng mu hti chye lu hkra Italy Mungdan shi laika kaw nna shabra dat ai lam rai nga ai.

Yawng hpe shana mayu ai laika re majaw ya na zawn shawa hti ai shi laika hta ka bang mara dat ai lam hpe chye na ya marit nga nna Wa Sarabyin a laika hpe ga hpaw da nga ai.

Wa Sarabyin a laika hta, “Italy Mungdan a daw chyen rai nga ai dingdung maga daw hta ya na zawn ana zinli byin hkap nna machyi hkrum si hkrum lam ni byin nga ai majaw, mung chying sha ni hte rau ni ni htep htep myit hpawm let akyu hpyi ya nga ai. Ya na zawn tsinyam hkrum nga ai aten masa ni hta mung Karai Kasang gaw anhte hte shaga nga ai majaw tsin yam lam ni hkrum nga ga ai raitim anhte Hkristian ni a matu myit mada shara nga nga ai.

 Ya na zawn hkrit tsang hpa ana zinli hkrum nga ga ai aten myit masa kaja rawng ai masha ni kaw nna anhte galaw lu ai lam hpa ni nga mai nga ai kun ngu ai lam hpe myit shapraw lu mai na rai nga ga ai. Tsi gawn lajang lam ni galaw shakut nga ai hkamja dap magam gun ni hpe ya za zawn re ai aten masa hta grau myit dum lu nga ai.

Italy Mungdan dingdung maga daw rai nga ai Padua mare masha ni hku nna nanhte hta nga ai atsam ni hte shada garum daw jau hkat lam ni galaw let, shawang tsawra myit kaba ai, shada daw jau chye ai mare masha ni rai ma ai, ngu ai nanhte a sai hpe mungkan de madun shapraw lu na ahkaw ahkang rai nga ai.

Dai ni a prat aten masa hta, je mat ai hpun palawng ni hpe chywi matut nna bai lang na malai gabai kau na madaw hpe she grau galaw mayu nga ma ai, arung arai ni hta sha nrai masha shada ganawn mazum lam ni hta mung ndai zawn re ai myit masa ni hpe mu mada lu nga ai. Garum la na ra kadawn nga ai masha ni hpe kabai da mayu nga ga ai, garum la na ra ra kadawn nga ai masha ni hpe tsawra matsan dum lama ai myit hte yu mada garum la lam galaw na matu kadai mung ning dang kau ai lam n galaw ga.

 Coronavirus ana a majaw tinang a tsawra ai dum nta masha ni asak sum mat nna myit yawn hkrum nga ma ai ni, asak kaba u gut gu nna jam jau hkrum nga ai ni, hkyuk jhtawng hkan sharen da hkrum nga ai ni, ana zinli byin kap hkrum ng anna shalan shabran tsi gawn lajang lam ni tsep kawp nhkam la lu nna myit kaji myit ru hkrum nga ai ni yawng hpe Karai kasang shaman ya u ga” nga nna Italy mungdan Dingdung maga daw hta shanu nga ai mung chying sha ni yawng hpang de Wa Sarabyin laika ka shana dat nga ai lam Vatican shiga dap kaw nna shana dat nga ai.         

Souce : Vatican News