Nyau-Lay-Bin Nu Maria a Labau Lam ( daw 6 )

Nyau-Lay-Byin Nu Maria a Labau Lam   ( daw 6 )

       Nu wa hpu nau ni, lai sai lamang hta, maigan sasana Jau rai nga ai Wa Jau Micheal Mee-nyo, Nyau-lay-byin mare de du shang wa nna, yak hkak jam jau ai lapran nawku hpung masha ni a matu, ya daini Nu Maria a poi galaw ai shara hpe lu la sai hte Jau nga shara hpe galaw la lu sai lam na la lu saga ai rai nga ai. Dai aten ahkying ladaw hta dai lamu ga shara gaw, nam maling, ju hpun ni hpring re ai shara re lam Jau a labau hta ka matsing da ai hpe chye lu ai. Jau gaw, Jawng wang kata nam hkyen jasan jaseng ai lam hpe grau ngwi ngwi galaw hpang wa nu ai. Shawng nnan, ya daini anhte yawng mu chye nga ai, Nawku Jawng hte, Nu Maria lung pu nga ai shara hte ang ang shawng jasan jaseng nhtawm me, dai shara kaw Jau nga nta langai mi gaw gap la rai, shanu nga nu ai. Madu a shaning (1893) ning hta hpun pyen hte Nawku Jawng Langai mi gaw gap la nhtawm me, Myanmar Mungdan de la wa ai, Lourds Nu Maria sumla hpe dai Nawku Jawng kata kaw tawn da lu masai. Dai Nawku Jawng gaw, anhte Myanmar Mungdan hta shawng ningnan na, Lourds Nu Maria sumla hpe hkap la tawn da ai Nawku Jawng langai rai nga sai.

          Shingrai, dai Nawku Jawng wang gaw, shawng ningnan na, Sasana wang byin tai wa sai hte, Madu a shaning (1894) ning, September shata (8) ya shani nhtoi hte, angang akang lu la sai lam labau shang rai nga  sai. Nu wa ni, lai sai lamang ni hta na la lu sai, Nu Maria dan pru dan ai, Pin-tit Mungdan na, Lourds Nu Maria poi hpe myit dum let, Nyau Lay byin mare hta mung, Madu Karai Kasang hte Karai a Kanu Chyoi Pra ai Nu Maria poi hpe grau grau nna, htap htuk manu ai hte dam lada ai hku galaw lu na matu, hkyik hkam ai Nawku Jawng hpe wut-bilat hte Madu a shaning (1894) ning hta gaw gap la lu sai lam chye lu ai. Jau gaw dai shara kaw (8) ning tup sasana magam gun ai shaloi, hpung masha ni law wa ai re majaw, (1896) ning hta, Nyau Lay byin sasana a, Jawng dung Jau lit magam hku nna shatsam hkrum sai lam daini du hkra labau shang rai nga sai re. (1984) ning hta nnan gaw gap la lu sai Nawku Jawng hpe (1902) ning April Shata (30) ya shani hta akyu hpyi shaman hpaw hpang let, Karai Kasang hpe chyeju dum shakawn lu sai rai nga ai. Wa Jau Micheal Mee-nyo, gaw, Nu Maria hpe grai tsawra kam hpa ai wa re majaw, Madu a shaning (1908) ning hta  Ya daini anhte yawng mu mada lu ai, Nu Maria lung pu hpe gaw gap hpang nhtawm me, dai Lung pu ngut ai shaloi, Thaung- ngu saradaw Emanuela Sagrada hkum nan, akyu hpyi shaman ya sai lam labau hta matsing da nga mali ai nu wa ni.

          Dai hta n ga, Nawku hpung a magam lam, Hpaji machye machyang lam ni hte, mare buga a matu ra ai lam shagu hkan ta tut lajang ya sai rai nga ai. Mare buga masha ni hpaji sharin hkam la lu na matu, Jawng wang a dingda maga de E-ka langai mi jan hpe (1895) ning November  shata (23) ya shani, bai, (1898) ning June Shata (14) ya shani E-ka mi jan ram hpe mari la lu sai. Dai hta n ga, hpaji jawng hta magam gun na sara/num ni nga na matu E-ka mi jan hpe mung, (1921) ning September shata (8) ya shani mari la lu sai rai nga ai. Ya na zawn mari la lu sai lamu ga ni hpe Nawku hpung wang hku masat nhtawm me, Htap masum laika sharin jawng hku nna, gaw gap la lu sai lam labau shang rai nga ai. Jau gaw, shi gaw gap da ai jawng hta hpaji sharin la lu sai jawng ma ni yawng a chyeju madu kawa langai mi hku tai nga sai rai nga ai. Jau shi garai nsi shi ai ten du hkra, shi a n gun atsam nyan marai ma hkra hte sagu hpung masha ni a matu shakut lai wa sai lam chye lu ai.

          Ndai zawn Jau gaw, jawngma ni a matu, lamu ga shara ni mari, jawng ni gaw gap ai ten gaw, Jau mi nmu ai ten rai nga ai. ( 19 ) ning tup mi nmu ai prat hte myit daw myit htum ai lam n nga ai sha, Nawku Hpung a matu n gun dat shakut lai wa sai rai nga ai. Shingrai, Jau gaw, Madu a shaning (1937) ning August shata (12) ya shani Madu hta yup pyaw ban sa mat wa sai rai nga ai. Nu wa ni, Jau gaw, Nyau Lay byin mare kaw (1896) ning hta Sasana magam gun nga ai ten, Shi a ningtau Jau rai nga ai Wa Jau F. Jumenceier gaw, Shew-Chyin mare a sinpraw dingdung maga deng (35) tsan ai Chyawk-Gyi mare hpe ginjaw shatai nna, sasana magam gun hpai nga ai. Dai shara hta, Hka- Li ana grai ja ai re majaw Jau F. Jumenceier gaw, dai mare buga hpe nkam tim tawn da ra mat sai. Shingrai, Bum kahtawng rai nga ai Chyawk-Gyi mare masha ni hpe n ja nhpra tawn da ra mat sai lam labau hta matsing da ai hpe chye lu ai. Dai sha n ga, Ywa-ta-ywa, kwin-pin hte In:-pa-lar mare hkan, Kareen myusha Kahtawlik Nawku Hpung masha ni, Marai (60) ram hpe ngam da ra nu ai. Jau wa mat ai hpang gade nna yang, ningtau Jau langai rai nga ai Wa Jau G. Cance gaw, Madu a shaning (1901) ning hta, Shew Chyin mare a dingda maga na Kwin-Sik mare makau Nga-pyaw-taw mare hta Sasana magam hpe shakut hpang wa sai. Shingrai, Thaung-ngu kawn htawt sit wa ai Karen Myusha n kau mi Kahtawlik makam masham de shang wa sai lam daini du hkra Nyau Lay Byin sasana a labau hta ka matsing da ai hpe gam garan ya let ngam nga ai daw hpe du na lamang hta bai hkap madat la nga ga.