Awng Lawt hte Lai Nawng Hku hpyen yen jawng ma ni a matu Ap nawng Sara ra kadawn nga

Aung Lawt mare kaw nna hpyen yen masha htinggaw 40 masha marai 170 jan gaw ya ten Lawa Jau ginwang,Lawa mare San Pawlu Nawku jawng wang hta May shata 8 ya shani kaw nna shanu nga ma ai re.Aung Lawt Mare na hpyen yen tsin yam masha nkau ni gaw Nawng Nang Jaw Masat hte Danai mare ni hta shanu shing byi nga  ma ai re.Bai nna Lai Nawng Hku mare na hpyen yen tsin yam masha ni gaw May 7 ya shani Kamaing Jau ginwang,Kamaing Muklum Htoi San Yang lawk hta shanu nga ma ai re.

Kamaing Htoi San Yang Kahtawlik Ginra nta hta gaw htinggaw 15 masha marai 50 jan shanu nga  ma ai lam chye lu ai.Lawa Mare San Pawlu nawku jawng wang hta gaw jawngma 80 jan nga nna Kamaing Htoi San yang Ginra nta hta gaw jawng ma 10 jan hpaji sharin shanu nga ai lam chye lu ai.Ya ten ndai jawng ma ni a matu shana laika hti ai hta yu sin sharin ya na ap nawng Sara ra ahkyak nga ai lam hpyen yen tsin yam masha ni tsun ai hku nna chye lu ai.Bai nna jawng nlung sai Ramma ni a matu lam ndam mat u ga.

Kan bau magam Bungli lama ma shing nrai jak,Seng Kre Gram ai zawn re ai hte Lak sama hpaji sharin ya ai zawn re hpe ra sharawng nga ai lam Nawku hpung hte garum ningtum hpung ni kaw nna lam madun woi awn la na matu hpyen yen tsin yam masha ni kaw nna Myitkyina Saradaw sasana Sagurem wa,Wa Saradaw Francis Daw Tang August 25-26 ya shani Kamaing hpyen yen dabang hte Lawa hpyen yen dabang ni hta sa du kawan ai shaloi hpyi shawn dat ai re. Hpyen yen tsin yam masha ni kaw nna hpyen yen dabang ni hta shanu shingbyi nga ai ten hta majoi  aten n jahtum na matu magam bungli langai ngai tam galaw na matu ra sharawng nga ma ai lam chye lu ai.

John Mung Hkrang