Nyau-Lay-Byin Nu Maria a Labau Lam ( daw 4 ) (03 March, 2020)

Nyau-Lay-Byin Nu Maria a Labau Lam   ( daw 4 )

            Nu wa hpu nau ni, lai sai lamang hta, Kareen myusha ni malawng maga nga ai Pe-gu mare a kahtawng ni de Jau Mee-nyo sasana gawan gatsan nga ai ten, kareen myusha rai nga ai Slg. Pu-Lu hte Jan Oh Tsa yen Kahtawlik makam masham hpe lu la nna, Kashin kamun Sakramentu hpe hkam la sai lam na la lu saga ai rai nga ai. Dai aten gaw, Madu a shaning ( 1892 ) ning August Shata (3) ya shani re lam labau shang rai nga ai. Slg Pu –Lu makam masham hpe hkap la ai aten shi a asak (60) ning rai nhtawm me, shi a madu jan gaw (50) ning re lam chye lu ai. Shingrai, dai kahtawng ginra hta, shawng ningnan Kahtawlik makam masham hpe lu la ai gaw, Slg Pu-Lu yen la re lam labau hta daini du hkra matsing da nga ai. Sasana a matu mung Slg Pu-Lu nta masha ni gaw, n gun kaba nan rai nga sai. Shan gaw, Sasana hta shaning (30) ning tup shakut shaja lai wa sai. Shan hpe yu nna, Kahtawlik makam masham de shang wa ai ni mung law law rai nga ai. Hpa majaw nga jang, shan gaw, myit masin san seng ai, htingbu htingbyen hpe tsawra matsan dum garum chye ai hte, makam masham hte seng nna, shakut shaja ai yen re majaw yawng gaw shan hpe kasi la nna, shakut shaja nga ma ai hte mare buga hta mung shada da gahkin gumdin let simsa pyaw ai buga ginra tai wa sai rai nga ai.

          Jau ni bungli magam a majaw hkawm sa ai ten ni hta mung, slg. Pu-Lu gaw, hpung masha ni hpe woi awn let, nawku daw jau woi awn ya ya di ai da. Jau ni du wa jang mung, nawku jawng hta ra ai magam bungli ni hpe shi hkum nan woi awn let garum ya ai lam labau hta matsing da ma ai. Ya na zawn Slg. Pu-Lu yen la Jawng wang hta ra mara garum ya ai hpe mare kahtawng na buga masha ni sha n ga, maigan sasana Jau ni mung  mu mada nga masai. Mare na ahkaw ahkang lu ai, tsun shaga lu ai salang lahkawng mung, ndai yen la gaw, sumsing mungdan hta anhte a ntsa kaw nga na re, myit masa kaja dik la ai, ngu tsun shakawn sai lam labau hta matsing da ma ai. Ndai zawn tsun ai lam mung grai nan htap htuk manu ai lam rai nga ai, nga nna mung tsun ma ai. Ndai Slg Pu-Lu gaw, makam masham hpe lu la ai shaning (30) ning tup gaw, shi a matu, sumsing sut gan hpe mahkawng na matu re lam shi hkum nan hpaw tsun lai wa sai rai nga ai. Dai majaw aten lu shagu, nawku jawng de ap nawng shakut nga nu ai.

Nu wa ni, Slg. Pu-Lu gaw, shi si mat ai hpang, shi a wenyi hkye hkrang la lu na matu, sak naw hkrung nga ai ten kawn nna, shi lu ai ja gumhpraw hta na, mahkawng nhtawm me, dai alu hpe Missa hpyi hpyi di ai lam tsun da nga ai. Bai nna, shi si mat ai hpang mung, Missa hkungga lu na matu, mahkawng gumhpraw hte Missa hpyi da ai da e. Garai nsi shi ai ten hta mung, Nawku jawng a matu ra ai shara ni hta mai byin ai made alu jaw bang ya sai rai nga ai. Ndai zawn alu bang ai a yaw shada lam gaw, shi si mat wa jang, shi a wenyi hkye hkrang la lu na hte, shi galaw dat ai alu mahtang she shi bai la mat wa lu ai, sumsing mungdan hta shara mari da ai lam re, nga nna, shi a labau hta ka matsing da ai hpe chye lu nga mali ai re. Ndai Slg wa gaw, sak hkrung nga ai ten hpa mung n galaw nna, aten hpe majoi jahtum nga ai ni hpe shadum dat ai lam mung rai nga ai. Nu wa ni, sumsing sut gan lu na matu gaw, sak naw hkrung nga ai ten hta mahkawng da ra ai lam adan sha rai nga mali ai re. Madu a shaning (1917) ning Nyau-lay-byin Nu Maria poi shana daw maga de, Jan Oh Tsa gaw, shi a sak prat hpe Nu Maria a poi nhtoi shani Karai Kasang woi la na matu akyu hpyi nu ai. Kaja wa mung akyu hpyi ai hte maren, Nu Maria a poi nhtoi shani Madu woi la hkrum sai lam chye lu ai. Jan Oh Tsa gaw, shi lu ai gumhpraw Ru-pi pra (2) hpe, shi hpe hpang jahtum na nam man chya Sakrament jaw ya ai Wa Jau Lucas hpe alu jaw dat nu ai.

Dai sha n ga, Jan Oh Tsa, shi mahkawng da ai man hpe dut nna, lu ai gumhpraw hpe Nawku Jawng de alu jaw ya na matu ningrum ningtau wa hpe  htet da sai rai nga ai. Slg wa mung, ndai lam hte seng nna, nang hpa mung hkum tsang, nang myit ra ai hku lajang ya na re. Na a myit masin salum hpe Karai Kasang kaw sha ap da u, ngu n gun jaw nga sai. Shingrai, gade nna ai sha, Jan Oh Tsa nsa hti mat sai rai nga ai. Myit npyaw hpa langai gaw, ningrum ningtau jan a makoi mayang lamang ngut ai hpang bat (2) ram din ai shaloi, nmyit mada ai sha man dum wan hkru mat manu ai. Dai majaw, Slg Pu-Lu grai yawn myit npyaw mat nu ai. Shingrai, Slg Pu-Lu gaw, ngam nga ai arai ni hpe la nna, Jau jawng de sa nhtawm me, jawng wang kaw machyu nga na matu ahkang hpyi nu ai. Jau mung shi a hpyi shawn ai hpe hkap la nna, nga shangun sai. Dai slg wa gaw Jau hpe, ngai a ningrum ningtau jan gaw, shi lu da ai man ni yawng shi bai la mat wa sai lam, tsun dan ai shaloi, Jau mung, gara hku byin mat ai lam san nu ai. Dai shaloi slg wa gaw, ndai man ni hpe dut nna, jawng wang de alu jaw bang ya na matu htet da ai, raitim, ngai aten dep ndut ai majaw byin mat ai rai na re nga nna, shi a mara hpe yin la ai lam tsun dan nu ai.  Yawnhkyen myit kaji nga ai kareen dingla Pu-Lu gaw, lana mi na ten hta mau hpa yup mang mu nu ai. Yup mang hta, moi shi Bukda makam masham hta naw nga ai ten na, shi a hpung gyi shi a shawng kaw tsap taw ai hpe mu nna, ngai a madu jan gara de rai sai kun? Ngu san ai shaloi, hpung gyi gaw, na a madu jan, ahpraw nsam nga ai gumra (4) shakap da ai gumra wan leng ahpraw jawn nna, lahta ningtsa de woi la hkrum sai ngu tsun dan ai lam gam garan ya let ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.