Nyau-Lay-Byin Nu Maria a Labau Lam ( daw 2 ) 18 February, 2020

Nyau-Lay-Byin Nu Maria a Labau Lam   ( daw 2 )

        Nu wa hpu nau ni, lai sai lamang hta, Bernedette hte hkan sa ai hpaw mi num sha (2) gaw, Nu Maria kaw sit shang wa nna, “ nang kanu a amying hte ngai kasha hpe shangun rit, nang kanu byin mayu ai lam hpe ka ya rit “ ngu hpyi shawn nu ai. Nu Maria mung sumsai myi man hte sit sa wa nna, ngai a ra sharawng lam hpe ndai kaw ka nra ai, nang kasha mahtang ndai shara de (15) ya tup sa wa rit ngu htet dat sai lam hpe na la lu saga ai rai nga ai. Shingrai, Bernedette mung mai sa Nu Maria e, nga nna, kabu gumlawt let, htan dat nu ai. Nu Maria mung, Bernedette hpe ndai mungkan dinghta kaw nga ai ten, ngai nang hpe pyaw hpa lam jaw na ngu, ngai ga sadi njaw ai, raitim, hpang na prat a matu, myit yawn myit malai ai lam hpe hkam la u.  Shut hpyit mara, nhkru n kaja ai lam hta len pyaw nga ai ni a matu, akyu hpyi shaja u, ngu tsun let, hkying hkum mi daram dan pru dan ai sha n ga, Bernedette hte hkan sa ai hpaw mi num yen hpe mung sum sai myi man madun dan sai rai nga ai. Ya na zawn dan pru dan ai raitim, dai hpaw mi num sha yen gaw, Nu Maria hpe nmu ai lam labau hta matsing da ai hpe chye lu ai. Bernedette gaw, shi jaw da ai ga sadi hte maren, (15) ya tup Nu Maria nga ai lung pu de sa na matu, daw dan da nu ai. Shingrai, Berneette gaw shani shagu dai lung pu de sa nna, akyu hpyi nga sai. Nu Maria mung, shi a hkum hpe dan pru dan nhtawm me, shani shagu akyu hpyi ga sharin ya nu ai.

          (2) ya ngu na shani gaw, Nu Maria a myi man nsam grai yawn ai zawn re hpe mu lu nu ai. Dai majaw, Bernedette gaw Nu Maria hpe hpa baw hpe ra sharawng ai kun ngu sai ai shaloi, “nhkru nkaja galaw sha ai ni a matu” akyu hpyi ya na matu hpyi shawn dat nu ai.  Bai, Nu Maria hte (3) lang ngu na, hkrum ai shaloi gaw, Bernedette langai hkrai sha chye da na matu, gadai hpe mung ntsun dan na matu, htet dat nu ai. Dai shani kawn nna, Berneette a myi man nsam mung, pyaw ai zawn byin dat, yawn ai zawn byin dat rai nga nu ai. Matut nna, hpang na lang bai hkrum ai shaloi, Nu Maria gaw, hpyi nem tawng ban ai nsen hte, Bernedette hpe gahtap tsun tsun di dat nu ai. Ya na zawn Bernedette a myi man nsam ntsawm ai re majaw, nta masha ni, Nu Maria nga ai lung pu de n sa na matu pat hkum manu ai. Gade pat hkum ai raitim, Bernedette Nu Maria hpe grai hkrum mayu ai re majaw, mayak mahkak lapran, Nu Maria nga ai lung pu de sa mat nu ai. Ndai lang hta gaw, Bernedette hpe Nu Maria gaw, shi a lung pu shawng de sit sa wa shangun nhtawm me, lung pu shawng na lamu ga hta, lata hte mahkyit shangun nu ai.

          Dai shaloi, ga kata na hka ni prut pru wa nhtawm me, Bernedette hpe lu shangun sai. Bai nna, lagaw lata myi man ni hpe mung dai hka hte kashin shangun nu ai. Dai makau hkan tu ai tsi du tsing man ni hpe mung sha shangun nu ai. Dai zawn galaw ai a marang e, nhkru nkaja ai ni hpe hkyen la na ma tu, mara dan galaw shangun ai re lam Bernedette hpe dum chye shangun sai rai nga ai. Shingrai, hpang na galang bai hkrum ai shaloi, Nu Maria gaw, Bernedette hpe nhkru nkaja ai mara hta lam dam nga ai ni, lawt lu na matu, mara raw dat hkrum na matu hte, shagrit shanem ai chyeju ni hkam la lu na matu, lamu ga hpe dagum hput di nna, manam u, ngu shangun dat nu ai. Bernedette hte Nu Maria yen (9) lang ngu na hkrum zup ai ten hta gaw, Bernedette hpe Jau ni hpang de sa nna, “ndai shara hta Nawku Jawng langai mi gaw gap na matu” sa tsun shangun nu ai. Reng jang she ndai shara hta akyu hpyi ai ni  masha ni law law sa du na re lam tsun shangun dat sai rai nga ai. Bernedette mung Nu Maria tsun shangun ai hte maren sa tsun ai raitim, Jau ni nkam ai sha n ga, lama na ndai shara hta nawku jawng gaw gap mayu ai rai jang, dai shangun dat ai Num jan a mying tsun dan rit, ngu, bai nhtang san shangun dat nu ai. Shingrai, Bernedette gaw Jau ni san shangun ai hpe Nu Maria kaw bai nhtang sa nna sa san na matu, shajin nga nu ai.

          Bernedette gaw, March Shata  (25) ya Nu Maria Sumsing lamu de shalun la hkrum ai nhtoi shani a, jahpawt manap jau jau aten hta, Nu Maria hte hkrum na matu, Lung pu de sa wa ai shaloi, Nu Maria gaw, dai lung pu lapran kawn sum sai myi man hte hkap tau la ai hpe mu jang, Bernedette na chying kabu pyaw taw nga sai. Bai nna, Nu Maria a mying hpe tsun dan na matu, hpyi shawn nga sai. Raitim Nu Maria gaw shi a mying hpe ntsun dan ai. Bernedette mung, (3) (4) lang bai san ai shaloi, Nu Maria gaw, shi a lata lahkawng maga hpe lamu de sharawt dan nhtawm me, dai lata lahkawng hpe kayep nna, sing da kaw kayep da rai, myi man hta mung san tsawm let mani sum sai hte “ ngai gaw, mara nkap ai sha na-um-na sin ai jan rai nga nngai” ngu tsun let mat mat wa sai. Bai, April Shata (7) ya shani gaw, Bernedette hte Nu Maria hkrum ai (17) lang ngu na nhtoi shani rai nga ai. Lani mi na nhtoi a shana de daw hta, Bernedette gaw, shi a kanu tung hte rau dai lung pu nga ai shara de hkawm sa wa masai. Lung pu makau de du ai shaloi, Berneette gaw, shi a kanu tung hpe “htaw gaw htaw gaw, an lahkawng hpe shakram taw nga ai, mani sum sai hte la nga ai, ndai ram tsawm ai hpe ngai kalang mi pi nmu ga ai” ngu, mau ai hte tsun dat nu ai. Ndai lang gaw, Nu Maria hpe Bernedette hpang jahtum na lang mu lu ai lam rai nga ai, Ya na zawn mabyin shiga ndai gaw, lani hte lani grau grau nna, chyam bra wa sai re majaw, shara shagu de na masha ni sa du akyu hpyi wa masai lam gam garan ya let, ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.