San Pra ai John ( Yawhan ) a labau lam. 21 January, 2020

San Pra ai John ( Yawhan ) a labau lam.

          Nu wa hpu nau ni, San Pra ai Kasa Yawhan gaw, Madu Yesu grau tsawra ai Kasa rai nga ai. Shi gaw, Zebedi a kasha, Yaku kaba a kanau mung rai nga ai. Dai ahkying  aten ladaw ni hta, shanhte a kan bau magam bungli madung gaw, nga hkwi, nga hkan sha ai magam bungli rai nga ai. Lani mi na ten shan nau gaw, Galile hka nawng makau kaw nga myek sumgawn gabai nga ai shaloi, Madu Yesu lai wa let, shaga la hkrum masai. Dai shaloi jang shan nau gaw, shan a kawa hte hka li hpe rap di tawn kau da nhtawm me, Madu Yesu a hpang de hkan nang mat wa masai. (Mt 4:22), Bai, (Mk 3:17) Yesu gaw, shan nau a nden ja myit hpe yu nna, shan nau hpe, “buanerges”, “Mu Gung a Kasha Ni” Son of Thunder ngu nna, mying hkawt shamying ya sai rai nga ai. Shingrai, nu wa ni, ndai Kasa Yawhan yen nau gaw, Madu Yesu hkum nan, lak san lata la hkrum ai hte lak lai ai chyeju ni hpe hkam la lu ai yen nau mung rai nga ai. Dai majaw, Kasa Yawhan gaw, kasa ni yawng hta kaji htum mung rai nga mali ai re. Shi hkum hpe shi “Yesu tsawra ai kasa” nga nna shamying la la re ai hpe mung (Yawhan 13:23) hta mu hti lu nga mali ai. Bai, Madu Yesu Nsam galai ai mabyin kaw mung San Pra ai Kasa Yawhan lawm nga ai. Bai nna, Madu Yesu tsan lun sun hta, myit ru myit tsang garai n hkrum shi ai ten, hpang jahtum kasa ni yawng hte shana shat sha ai shaloi mung Madu Yesu a lahpyen de htep sa wa nhtawm me, “ Madu hpe ap kau na gadai rai a ta?” nga nna, san dat ai mung kasa Yawhan nan rai nga ai.

          Kasa Yawhan gaw, Madu Yesu a lak lai tsawra ai hpe hkam la lu ai wa re majaw, hpang jahtum Madu Yesu Wudang ntsa kaw jen noi sat hkrum ai shaloi mung, Wudang  npawt kaw Kasa Yawhan sha hpang jahtum tsap ngam nga ai. Shaloi Madu Yesu gaw, shi a kanu Maria hpe yu gawn na matu Kasa Yawhan hpe lit shatsam da nu ai. Nu wa ni, ndai mabyin gaw, tsaw htum ai ahkaw ahkang rai nga mali ai re. Dai ahkaw ahkang hpe kasa ni yawng hta na Kasa Yawhan sha lu la sai rai nga ai. Dai majaw Kasa Yawhan gaw, Madu Yesu hte hpang jahtum ten du hkra rau sha nga lai wa sai kasa mung rai nga ai. Shingrai, Nawku hpung hkai hkrat wa ai labau hta, Kasa Yawhan gaw, A.D (49) hta Ephesu mare kaw nga nga nhtawm me,Chyoipra ai Nu Maria sumsing Lamu de shalun la hkrum ai mabyin hpe sakse tai ya sai rai nga ai. A.D (50) ning daram hkan, nawku hpung gaw Roma mungdan ting chyam mat wa sai. Raitimung, Yesu hpe n hkap la ai ni mung naw nga shajang ma ai. Dai majaw Madu Yesu a lam hkaw tsun ai kasa ni yawng hpe sat kau masai. Kasa Yawhan hpe mung A.D 90-95 daram hkan Roma Hkawhkam Domitian aprat hta, sau di kaw bang nna, zingri hkrum timung, nsi ai majaw, Patmos zinlawng de prat htawng bang kau hkrum sai rai nga ai.

Dai zinlawng kaw nga ai ten, Kasa Yawhan gaw, “Shingran laika” hpe ka da ya sai. Kasa Yawhan gaw, Ephesu mare na saradaw mung rai nga ai. Asia Minor de sa nna, kabu gara shiga hkaw tsun dan ai shaloi, masha law law wa, Yesu Madu Karai Kasang  teng teng rai nga ai lam hpe kam sham wa ma ai. Shi a saradaw manang ni kaw nna, Yesu a lam hpe nang chye ai daram, na la mu la ai lam ni hpe ka da u, nga nna, tawngban ai majaw, A.D (98) ning hta, Yawhan a Kabu gara shiga hpe ka da sai rai nga ai. Dai hta kaga Yawhan a Shagun dat ai Laika (3) hpe mung A.D (99) ning hta ka da sai rai nga ai. Yawhan gaw sak kaba gawng kung wa sai majaw, hkawmsa hkawmwa n jin nngut wa sai. Lani mi na ten, shi gaw Patmos zinlawng a sinpraw maga, Mediterranean panglai hka leng ni hta nga ai hpe mu lu ai shara, lung rawk ntsa kaw dung nna, myit sumru nga nu ai. Moi Madu Yesu asak naw hkrung nga yang na lam ni, Galilee nawng kaw nga ai lam ni, shi bai hkrung rawt nna, sumsing lamu de lung mat wa ai lam ni, hpang jahtum shani shi bai du sa na, nga nna tsun da ai ga ni hpe myit aru yu nga nu ai. Sak nau kaba mat ai majaw, mabyin mahkra hpe atsawm nlu myit jang, myit npyaw byin nga sai. Bai, ngai a manang ni yawng si mat masai, Petru mung Wudang hta nhtang chyaw jen sat kau hkrum sai. Pawlu mung si mat sai. Kasa (12) hte mung yawng si ma masai, ya ngai hkrai sha nga nga ai. Yesu Madu mung bai du sa na nga nna, ya du hkra n pru ai hpa majaw rai kun? Ya du hkra ga hkum mi sha pi nna, sumsing lamu na lamik kumla mung n madun, shi tsun da ai ga ni hpe shaning (60) ning  du hkra la tim Kaman lila sha rai nga ai hpa majaw ndai ga ni ngai kam shut kau sai kun? Nga nna myit hta aput angun nga nu ai.

Shaloi, akajawng sha Yawhan gaw Pahke zawn nsen langai mi na dat nu ai. Shingrai, shi a lahkra maga shingdu de kayin yu dat yang, Yesu Madu tsap nga ai hpe mu nu ai. Dai shaloi Yawhan mana maka tsun ndang hkra kabu ai hte Yesu a lagaw nhpang e ding yawm dagup nawku nga nu ai. Yesu mung Yawhan hpa rai myit kaji nga nta? Nang hkrai sha hpang jahtum nrai, ngai mahtang hpang jahtum rai nga ai, Ngai gaw,(Alpha and Omega) (The First and Last) Npawt mung ngai, Ndung mung ngai rai nga n ngai. Ngai nang hte tutnawng e na a asak htum ai du hkra rau rai nga nngai ngu nna, myit shalan ya nu ai. Dai kawn nna Yawhan gaw, myit pyaw ai hte asak (100) ning du hkra nga nna, (111) ning  hta, Ephesu mare kaw si mat wa sai rai nga ai. Nu wa hpu nau ni, Kasa Yawhan a prat labau hkrun lam hpe na la lu sai hte rau, anhte a prat hta mung, kalang lang myit daw myit kaji ai lam ni law law nga na ga ai. Ndai zawn myit ru myit kaji garen wa ai ten, Kasa Yawhan kaw akyu hpyi ga. Bai nna, Madu Yesu a tsawra dik ai kasha ni byin tai lu hkra, Madu Karai Kasang a matsun ga hpe madat let, shi Madu kaw hkan nang hkan sa ga. San Seng ai myit masin hte ap nawng daw jau ai a chyeju gaw, mau hpa chyeju ni hpe hkam la lu na teng sha rai nga ai. Shing rai tsawra ai nu wa hpu nau ni, San Pra ai Kasa Yawhan a kasi hpe la let, Madu Yesu kaw sit shang sa wa saga ngu n gun jaw mayu n ngai. Nawku hpung kawn nna, San Pra ai Kasa Yawhan a poi nhtoi hpe December Shata (27) ya shani ngu masat da ya sai rai nga ai law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.