San Pra Ai Raymond A Labau Lam ( 07 January, 2020 )

San Pra Ai Raymond ( Penyafort mare na )

          Nuwa hpu nau ni, San Pra ai Raymond gaw, Madu a shaning (1175) ning hta Italy Mungdan Penyafort mare kaw shangai dai daw wa sai lam chye lu ai. Shi a kanu yen kawa gaw, Lusu sahti masha ni rai ma ai. Shingrai, Raymond gaw, kaji ten kawn nna, laika hpaji hta grai ningtawn ai wa rai nga ai. Dai majaw, asak (20) ning sha naw rai nga ai aten, Barcelona mare kaw myit let hpaji ngu ai Philisophy hpaji hpe sharin la lu nu ai. Hpaji lam hta myit lawm ai re majaw, ya na zawn Philisophy hpaji hpe mung grai ningtawn ai lam chye lu ai. Shingrai, shi a asak (30) ning du ai shaloi, Bologna mare de sa nhtawm me, Nawku Hpung a hkansa Tara ngu ai Canon Law hte shawa hte seng ai Hkansa Tara ngu ai, Civil Law hte seng ai Hpaji Ninghkring Doctorate Janmau ni hpe gup la lu nu ai. San Pra ai Raymond gaw, hpaji lam hta ningtawn ai sha n ga, myit masin mung san tsawm ai hte masha ni hpe garum shingtau chye ai wa mung re lam shi a labau hta matsing da ma ai. Matsan mayan ni a ntsa, sadi dung let, myit galu tawn nna, shakut sharang myit jasat rawng ai majaw, Madu a shaning (1219) ning hta, Barcelona mare kaba kaw na Saradaw kaba hpe garum na Garum jaw Ningtau Kaba aya rai nga ai, Archdeacon aya dang da ai hpe hkrum nu ai. Dai hpang masum ning na ai shaloi, Dominican Hpung Magam Gun Jau Wuhpung de shang nna, Yuda amyu sha ni tengman ai makam masham de bai nhtang gale wa na matu atsam dat shakut sai lam labau shang rai nga sai.

          Shingrai, Raymond gaw, San Pra ai Peter Nolasco hte rau, “ Hkye Maga ya ai Kanu” ngu shamying ai, Order of Our Lady of Ransom Hpung Magam Gun Hpung langai mi hpe de hpang da ya lai wa sai rai nga ai. Dai hpang magam gun hpung a lit gaw, Muslim ni a lata kaw nna, bawng masha ni hpe hkye la na matu rai nga ai. San Pra ai Raymond gaw, “Five Decretals” ngu shamying ai, Nawku Hpung hkan shatup ra ai ritkawp hkansa tara rai nga ai Canon Law hte seng ai laika ni hpe mung ka da sai lam labau hta matsing da nga mali ai nu wa ni. San Pra ai Raymond gaw, ya na zawn hpaji hta grai ningtawn ai hte, Canon Law hte seng ai laika, rit kawp tara ni hpe atsawm sha chye ai re majaw, Nawku hpung kata jai lang ra ai tara ni hpe mung, grau kaja htuk manu ai hku ka lajang da ya sai rai nga ai. Raymond shi hkum nan mung, Nawku hpung a rit kawp tara ni hpe hkansa hkan nang ai Jau langai mi rai nga ai. Dai majaw, Sarabyin Gregory (10) gaw, San Pra ai Jau Raymond hpe shi a “mara raw Jau” (Confessor) shatai nu ai.

          Shingrai, San Pra ai Jau Raymond gaw, Sarabyin hpe mara a matu; matsan mayan re ai ni hpyi shagu jaw na matu myit jahkut dawdan tawn na sha shadum ya wu ai. Madu a shaning (1230) ning hta Jau Raymond gaw, Dominican Jau ni a masum ngu na ningbaw lit shatsam ya ai hkrum sai. Shingrai, Jau gaw, shi lit la sai Jau wuhpung hpe lagaw lam hku hkan kawan nhtawm me, ahkying aten hpe hkungga chye na matu, hpaji hparat hpe tam sawk ai lam hta sharawng na matu hte kasa amu myit jasat hpe madung tawn na matu sharin matsun ya sai rai nga ai. Tara ja ai Jau wuhpung rai tim, shi a Jau wuhpung hta hkan nang ai ni, Jau tai ai ni law law rai nga ai. Ya daini na ten, Dominican Jau wuhpung nga nna, dan dawng mu mada lu nga ding yang rai nga ai. San Pra ai Jau Raymond gaw, shi a Jau ni hpe grai chye na ya let, woi awn hkawm sa nga ai re majaw, Jau ni yawng mung kabu pyaw let, sasana magam hta shakut nga ma ai lam chye lu ai. Jau gaw, shi chye da ai hpaji ni hpe kyem zing da ai lam n nga, yawng hpe mai byin ai made sharin achyin ya nga nu ai. Dai majaw, shi hte rau nga ai ni, shi a jawng ma ni yawng gaw, machye machyang hpaji lam yan hta, laika ningtawn ai ni law law re nga ma ai. San Pra ai Jau Raymond gaw, shi a Jau wuhpung rai nga ai Dominican Jau hpung hpe lani hte lani grau grau nna, rawt jat galu kaba wa na hte, myit masin san seng let, hpaji chye ai Jau ni law law byin tai wa na matu, akyu hpyi shaga nga nu ai. Bai nna, Mungkan Mungdan malawng maga hta, Dominican Jau wuhpung ni sasana majan je let, Madu Karai Kasang a teng man ai makam masham nli hpe gat hkai hkawm nna, ya daini Dominican Jau wuhpung hta myusha hkum hkra shang lawm magam gun nga ai hpe mu lu nga mali ai nu wa ni.

San Pra ai Jau Raymond gaw, sak prat grai galu hkra, Jau magam hpe gunhpai shakut lai wa sai rai nga ai. Shi a jahtum daw na shaning ni hta makam masham hte seng nna, shut shai mat wa ai ni hpe lam bai shading sharai ya nna, Italy mung na Muslim ni tengman ai makam masham de bai galai shai wa na matu madung tawn nna, shakut galaw lai wa sai rai nga ai. Shingrai, San Pra ai Jau Raymond gaw, Madu a shaning (1275) ning, shi a sak prat (100) ning hta, Madu kaw yup pyaw ban sa mat wa sai rai nga ai. Karai Kasang a magam hta hpang jahtum na sak prat ten du hkra ap nawng daw jau lai wa sai lam labau hta mau hpa nan rai nga mali ai. Nu wa ni, lahta de na la lu sai San Pra ai Raymond gaw, lusu sahti kasha rai tim, gumrawng ai lam n nga, yawng hpe myit masin san seng ai hte garum shingtau la ai sha n ga, hpaji machye machyang lam hta mung dan hkung ningtawn let, shi chye da ai hpaji ni hpe yawng hpe gam garan sharin achyin ya lai wa sai lam gaw, grai nan kasi la hpa rai nga ai. Shingrai, anhte mung San Pra ai Raymond a kasi hpe la let, tinang chye da ai machye machyang lam ni hpe gam garan ya ga, lama na machye machyang lam hta ra gadawn ai rai jang mung shi kaw hpyi la nga ga ngu, n gun jaw mayu n ngai. Nawku hpung kaw nna, January shata (7) ya shani hpe San Pra ai Raymond a poi ngu masat da ya sai hte maren dai shani hta lak lai akyu chyeju ni hpe hpyi la nga ga law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.