Nu Maria Lungpu Shaman hte Nlung Nnan Chyeju Shakawn (13 Nov, 2019 )

Waimaw Jau Ginawng, Sadung Mare, San Joseph Nawku Jawng Wang hta gaw gap la lu sai Nu Maria Lungpu nnan shaman poi hte Nlung Nnan chyeju dum shakawn poi lamang hpe 13 November, 2019 ya shani, Myitkyina Sasana Sagurem wa, Wa Saradaw Francis Daw Tang hte Wa Jau ni woi awn nna, Missa Hkungga Nawng Jau, Chyeju shakawn la lu sai rai nga ai. Sadung mare buga hta Kahtawlik Nawku hpung masha nta htinggaw (7) sha nga ai lam chye lu ai. Hpung masha nlaw ai raitim, ndai buga na masha ni gaw, Nawku hpung n ging hka, shada tsawra garum shingtau nga ma ai. Ya na zawn shada tsawra garum shingtau ai a majaw, Nawku hpung masha nlaw tim, Nawku Jawng langai hte, Nu Maria Lungpu hpe gaw gap la lu masai. Ndai chyeju shakawn, akyu hkam la ai poi hta shara shagu de na buga masha ni, (1000) daram da du shang lawm sai rai nga ai. Sagurem wa, Wa Saradaw Francis Daw Tang mung, kabu n gun lu ai hte, Sagu hpung masha ni hpe, Karai Kasang a Mungga hpe gam garan ya let, shaman ya sai rai nga ai.