Wa Sarabyin : Hkristian Ni Shanu Nga Ra Ai Shara Gaw Wunma Hkang Hte Re Ai Karai Kasang A Lata Ntsa Kaw Re

Hkristian Ni Shanu Nga Ra Ai Shara Gaw Wunma Hkang Hte Re Ai Karai Kasang A Lata Ntsa Kaw Re, Nga Nna Wa Sarabyin Tsun Dat Nga Ai

November praw 2, si ai ni yawng a poi nhtoi shani hta Wa Sarabyin Francis kaw nna ‘Catacombs of Priscilla’ ngu ai, moi tsaban 2/3 laman makam masham a majaw zingri sat kau hkrum lai wa sai Hkristian ni hpe lup makoi da ai Hkristian lup lungpu hta shawng nnan lang hku nna Missa hkungga sa du nawng ya ai lam galaw lai wa ai.

“Catacombs ngu ai tara sake ni hpe lup makoi da ai lup lungpu hta, si ai ni yawng a poi nhtoi shani Missa hkungga nawng ya ai lam a marang e anhte hpe myit dum shangun ai lam ni law law nga nga ai. Laksan hku nna anhte hpe myit dum shangun nga ai lam gaw, makam a majaw zingri sat hkrum ai ngu ai Hkrisitain ni moi prat hta nga lai wa ai zawn dai ni na prat hta mung naw nga nga ai ngu ai lam rai nga ai. Missa hkungga Nawku daw jau ai lam hpe shang lawm lu hkra, poi lama ma hpe jahpai galaw nna sha shang lawm lu mai ai masa mabyin ni dai ni prat shara law law hta naw nga nga ai, moi Hkristian ni aja awa zingri zingrat hkrum lai wa ai tsaban 2/3 aten hta grau nna dai ni na prat hta zingri zingrat hkrum nga ai Hkristian ni grau pyi law nga ai” ng anna Wa Sarabyin Fracis hkaw tsun lai wa ai.

‘Hkristian ni shanu nga ra ang ai shara’ ngu ai lam hte seng nna Wa Sarabyin tsun ai hta, “Tara a matu sat kau hkrum ai Hkristian ni a hkum tsawm moi mang ni hpe Catacombs ngu ai ga kata lup pu ni galaw nna mayun mayoi lup makoi lam galaw kau da ra ai, ngu ai mabyin hku nna anhte hpe myit dum shadun nga ai lam gaw, ‘Hkristian ni a shanu shara gaw Karai Kasang a lata re, Shi Madu a lata ntsa Hkristian ni shanu nga na hpe Karai Kasang ra sharawng nga ai, Madu Karai Kasang a lata gaw wunma hkang ni hte re ai Madu Yesu a lata nan rai nga ai, anhte hpe Kawa Karai Kasang mu mada u ga matu dai wunma hkang ni shi a lata hta kap nga na hpe Madu Yesu ra sharawng nga ai, Hkristian a myit mada lam gaw htawra hkran ngu ai sumsing lamu hta rai nga ai, dai shara hpe anhte nmu lu ga ai raitim anhte a hpri chying chyi hkai hpe dai htawra hkran hta kabai mahkai da nna dai sumri hpe anhte ja ja jum tak noi ginshum da ra na rai ga ai, shaloi she dai hkran de anhte atsawm sha du rap lu na rai ga ai” nga nna Wa Sarabyin Francis hkaw tsun lai wa ai lam Vatican shiga dap kaw nna shana dat nga ai.

Souce : Vatican News