Jahkrum Bawngban Lam Ni Galaw Lu Hkra Shakut Na Matu Iraq Mung Chying Sha Ni Hpe Wa Sarabyin Tsun 

30 October 2019, Vatican

Mungdan asuya hpe ning hkap n gun madun lam ni galaw nga ai nhtoi aten ni na wa sai hte maren masha tsa lam si hkrum lam ni byin nga ai majaw jahkrum bawngban lam ni galaw lu hkra shakut ga, nga nna Iraq mungdan mung chying sha ni hpe Wa Sarabyin Francis kaw nna tsun lajin lam galaw dat nga ai.

 Lai wa sai bat masum, October 30 ya shani, San Peter pa kaba, shawa hpawng hpe mungga shaga ai aten lahta na zawn tsun lajin lam Wa Sarabyin galaw dat ai rai nga ai.

October shata laman hta sha si hkrum ai masha marai 250 jan rai nga sai, lai was ai bat langai ya shani hta sha mung, Kabala ngu ai Shiite Musalim ni a chyoi pra ai mare hta, lam nmaw ntsa n-gun madun lam galaw nga ai shawa hpawng de sinat hpai ai masha ni a gat sharu bun lam a majaw nlaw htum masha marai 18 si hkrum nna kaga 800 daram mung hkala hkrum lai wa ma ai.

 Ndai sinat hpai masha ni gaw Iraq hpyen la ni kun, hpyada ni kun, shing nrai Iran mungdan madi shadaw lam galaw da ai hpyen hpung ni rai kun, atsawm nchye lu ai, nga nna shiga ni hta ka shana da nga ma ai.

Wa sarabyin tsun ai hta, “Mungdan asuya hte ninghkap n gun madun lam galaw nga ai mung chying sha ni a lapran jahkrum bawng ban lam ni galaw ga, si hkala hkrum sai ni, bai shanhte a dum nta masha ni yawng hte myit hpawm nga ai, myit npyaw yawn hkyen lawm nga ai, sari sadang rawng let simsa ai masa nga pra lu na matu hpyi jahtau nga ai mung chying sha ni a nsen hpe madat ya na matu Iraq mungdan asuya hpe lajin mayu nngai, Iraq mungdan mung chying sha ni hpe mung tsun lajin mayu ai, byin pru nga ai yak hkak mang hkang lam ni hpe mungkan mungdan ni a garum madi shadaw ai lam ni hte mai kaja ai masa tsun bawng ban jahkrum nna mahtai tam, ran hparan la lu hkra galaw ga, kasat gala majan mang hkang lam ni shaning law law hkrum hkra lai wa yu sai ndai ndai Iraq mungdan hta, nji nmu lam ni law law hkrum nga ai mung chying sha ni a matu ding run akyu hpyi ya nga ai” nga nna Wa sarabyin tsun dat nga ai.

Mungdan asuya ning baw ni a hten bya ai lai kyang ni a majaw mung mungdan sut masa lam hta yak hkak hkrum wa ai, tam lu tam sha yak hkak lam ni byin nga ai majaw, myit kahtet nga ai mung chying sha ni lam ntsa pru ning hkap n gun madun lam ni galaw wa ai.

 Shawa hpawng hpe sin at hte gatp sharu bun lam ni galaw ai majaw masha tsa lam si hkrum sai hte law law mung hkala hkrum nga sai rai nga ai. Shiite Musalim ni malawng maga shanu nga ai buga shar ani hta ya na zawn kasu gabrawng lam nib yin nga ai rai nga ai, ng anna Vaticasn shiga dap kaw nna shana dat nga ai.

Source: Vatican News