Hkristian ‘Myit Mada Lam’ Ngu Ai Gaw Anhte Marawp Nga Ai Nbung Zawn Rai Nga Ai

“Hkristian ‘myit mada lam’ ngu ai gaw anhte marawp nga ai nbung zawn rai nga ai, myit mada lam the sak hkrung ai masha ngu ai gaw lama ma hpe myit dun noi nga ai masa nre ai sha, madu the makrit mahkai nga lu hkra shakut da hpran sak hkrung nga ai lam she rai nga ai”  nga nna wa sarabyin Francis tsun dat nga ai. Bat lahakwng ya, October 29 ya jahpawt na Missa hkungga mungga hta ya na zawn hkaw tsun lai wa ai lam rai nga ai.Wa sarabyin tsun ai hta, “Myit mada lam ngu ai gaw hpri chying hkyi hkai hpe htaw ra hkran hka gingau de gabai mahkai, da hpran da ai lam rai nga ai. Myit mada lam ngu ai gaw, ndai shara hta tsip galaw nna shanu jung nga nmai ai ngu ai lam hpe chye na da let dingkren ai myit the sak hkrung nga ai lam rai nga ai. Hkristian prat ngu ai gaw galoi mung dingkren ai myit ni the sak hkrung nga ra ai prat masa rai nga ai. Ndai zawn re ai ning mu myit masa nrawng ai Hkristian ni gaw shamu shamawt lam nnga ai, nan nan hkring nga ai masa tai nga na re. ga shadawn ‘hka’ hpe yu ga, nshamawt ai hka gaw, lwi ai lam nnga ai sha ing rawng nga na rai nga ai. Dai zawn sha shamut shamawt ai lam nnga, pru hkawm shamawt na dingkren ai myit masa nrawng ai Hkrisitan ni gaw shanhte a prat hta lama ma ra kadawn nga ai the ing rawng nga ai masa byin nga na rai nga ai. Myit mada lam nga ai Hkristian ni anhte tai mayu ga ai rai yang, arung arai lama lam hpe myit dun noi gin shum nga ai lam nnga ai sha matsan mayan rai ra ai re, myit mada lam ngu ai gaw grit nem ai, ndai mai kaja ai arawn alai myit masa anhte hta rawng shanu nga hkra shani shagu anhte shakut ra na rai nga ai. Maga mi hkran hka gingau hta jung da ai anhte a hpri chying hkyi hkai atsawm naw jung makra nga ai kun, ngu ai hpe shani shagu anhte dinglik yu nga ai lam ni galaw let dai hpri chying hkyi hkai hpe anhtre jum tek da ra na ra ga ai. Ndai lam ni shim lum nga hkra shani shagu anhte hpe makawp bau sin ya ai Chyoi pra ai wenyi ngu ai anhte the rau nga nga ai, ngu ai hpe mung myit dum nga ra ai, dai Wenyi gaw shani shagu anhte a prat hta grai grai kaji ai magam bungli ni hpe galaw shabyin ya nna anhte hta rawng shanu nga ai rai nga ai. Myit mada lam ngu ai gaw mai kaja ai Hkristian arawn alai rai nga ai majaw myi the mu mada lu mai ai baw nrai, anhte a kata hta shanu nga nna shamu shamawt nga ai lam rai nga ai, myit mada lam the sak hkrung nga lu hkra shakut ai ngu ai prat mung aloi sha galaw lu ai lam chyawm nrai nga ai, raitim mung myit mada lam ngu ai gaw anhte hkristian ni marawp nga ai nbung rai ra na rai nga ai” ng anna Wa sarabyin hkaw tsun lai wa ai lam Vatican shiga dap kaw nna shana dat nga ai.           

Source - Vatican news