Chile Mungdan Hte Seng Nna Wa Sarabyin Tsun Lajin Ai Lam Galaw

Chile Mungdan Hta Byin Nga Ai Kasu Gabrawng Lam Ni Hpe Jahkrum Bawng Ban Lam Ni Galaw Nna Yawng A Matu Mai Kaja Ai Masa Ran Hparan Lam Ni Galaw Ga, Nga Nna Wa Sarabyin Tsun Lajin Lam Galaw Dat Nga Ai Shiga

23 October 2019

Chile Mungdan hta byin nga ai kasu gabrawng lam ni hpe jahkrum bawng ban lam ni galaw nna yawng a matu mai kaja ai masa ran hparan lam ni galaw ga, nga nna October 23, bat masum ya shani Wa Sarabyin tsun dat nga ai.

San Peter pa kaba hta shani ka-ang Angelus akyu hpyi ngut ai hpang shawa hpawng hpe tsun ai mungga hta lahta na zawn Wa Sarabyin Francis tsun dat ai lam rai nga ai.

Wa Sarabyin tsun ai hta, “kasu gabrawng lam ntsa pru n-gun madun ai lam ni hpe jahkring kau nna, mung chying sha ni yawng a mai kaja ai akyu hpe myit let jahkrum bawng ban mahtai tam la ai lam ni galaw la ra na re, kasu kabrawng lam ni a majaw matut manoi byin pru wa ai yak hkak mang hkang lam ni hpe tsun shaga bawng ban lam ni galaw nna ran hparan la lam ni galaw ga,”

nga nna Wa Sarabyin tsun lajin dat nga ai.

Mungdan a wan leng jawn shabrai ni hpe sharawt shatsaw dat ai lam Chile Mungdan asuya kaw nna lai wa sai bat ndau shana dat ai hpang mung chying sha ni masin pawt ai the lam ntsa pru ning hkap ai lam ni galaw nga wa ai majaw mungdan kata  nsim nsa kasu kabrawng lam ni byin pru nga ai rai nga ai.

Nnan daw hta wan leng shabrai sharawt shatsaw dat ai hpe nra sharawng ai majaw kasu gabrawng lam ni byin hpang wa ai, dai kaw nna Mungdan a hpaji lam hte seng ai masing masa, hkamja lam the seng ai masing ai masa ni hpe grau kaja ai masa gram lai ya ai lam ni galaw ya na matu, kan bau bungli galaw ai masha ni shabri shabrai ni hpe sharawt shatsaw ya lam ni galaw ya na matu hpyi shawn ai lam ni mung galaw wa nga ma ai majaw Chile Mungdan hta nsim nsa kasu gabrawng byin nga ai bat mi daram rai wa sai rai nga ai.

Lam ntsa pru n-gun madun ning hkap nga ai mung chying sha ni hpe asuya pyada ni kaw nna adup shabra lam ni galaw nga ai majaw si hkala hkrum ai masha ni mung lani hte lani law wa nga ai, lai sai bat lahkawng ya shani du hkra rai yang si hkrum ai masha marai 15 rai nga sai, bai, mungdan a mare kaba law law ni hta mung military curfew ngu ai shana pru hkawm sa lam nmai galaw ai, hpyen dap kaw nna uphkang masa hpe zing hkang da ai, ngu ai amying ni mung htuk shapraw da nga ai, nga nna Vaticasn shiga dap kaw nna shana dat nga ai.

 Source : Vatican News