“Atsam rawng dik ai Rosary” ( 22 Oct, 2019 )

“Atsam rawng dik ai  Rosary”

          Nu wa hpu nau ni, atsam rawng nna kaja dik ai lak nak gaw “Rosary” rai nga ai. Rosary gaw Nu Maria jaw da ai KumHpa kaba rai nna sumsing mungdan de shalun ya lu ai atsam rawng ai lakang mung rai nga ai. Rosary hpe lang nna, akyu hpyi la ai masha shagu ra sharawng ai shaman chyeju ni hpe lu la na re ai lam Nu Maria htet da sai. Dai majaw mungkan masha ni yawng, Nu Maria kaw kamhpa let Rosary hti akyu hpyi shakut ai a majaw mau na zawn re ai shaman chyeju ni hpe lu la ai hte hkrit na zawn re ai ana zingli ni hpe dang kau lu ai sha n-ga, n kaja ai mungdan up hkang ladat ni hpe galai kau ya lu ai lam ni hpe shara law law mu lu nga ga ai.

          Tsawra ai Nu Wa hpu nau ni e, gasat gala ai hta sanat lak nak ni gaw ahkayk madung rai nga ai. Mungdan kata de hpyen ni htim shang gasat wa jang, sanat lak nak ni hte gasat,  atsam marai ni hpe jai lang jang she, makawp maga lu na rai nga ai.  Dai hte maren, anhte hpung masha ni yawng mung, nat satan hpe dang manga kau lu na matu, jam jau lam amyu myu  hpe lai di lu na matu hte lam shagu hta awng dang ai lam hpe lu la na matu atsam rawng dik ai lak nak gaw “Rosary” rai nga ai. Rosary akyu hpyi shakut ai a majaw shaman chyeju law law hkam la lu ai lam, mabyin langai mi hpe tsun dan mayu ai.

          Moi kalang mi hta, grai tsawm ai mahkawn langai mi gaw, shi a prat hta shagrit shanem sum nung shing di nna, myit su tsawm htap ai la shabrang hte dinghku de lu na matu, Rosary hti  kyuhpyi shakut nga ai da. Dai zawn, Rosary hti kyuhpyi shakut nga ai ten lani mi hta, grai myit su tsawm htap ai, kyang lai len kaja ai, la shabrang hte hkrum lu ai majaw, shi myit yaw shada da ai hte maren prat tup na matu ngwi pyaw ai X’stan dinghku hpe de la lu nu ai da. Dai hpang matut nna shi gaw madu wa hte myit hkrum myit ra let shada da tsawra myit madun lu ai dinghku byin tai lu na matu hte myit su tsawm htap ai kasha ni hpe shangai shaprat la lu na matu, Nu Maria kaw kamhpa let Rosary hti akyu hpyi shakut nga sai.

          Daizawn, kyu hpyi ai shaning ladaw ni lai mat wa magang nga sai hte rau, shadang sha ni marai sanit hpe shangai shaprat la lu nu ai. karai kasang jaw ai sut gan kashu kasha ni hpe shangai la ngut ai hpang, kasha ni a shawng lam prat tup hta, sum nung shing di ai, shagrit shanem ai, myitsu myit kup ai ni tai wa lu na matu hte Karai Kasang a lam  hpe chye chyang kung hpan wa nna, Karai a magam gun hpai ai, Jau ni byin wa lu na matu matut manoi Rosary hti akyu hpyi shakut nga nu ai. Daizawn, Kanu Rosary kyu hpyi shakut ai a majaw, shi a kasha ni yawng hpaji hte Karai a lam hta chye chyang kung hpan wa nna, marai sanit tup san seng san pra ai Jau ni tai wa masai rai nga ai. Matut nna, kanu gaw, shi a kasha Jau ni hta na, Saradaw tai ai ni lawm wa na matu mung, Rosary hti a kyuhpyi shakut nga sai. Dai shaloi, Jau marai sanit kaw na, marai masum Saradaw aya hpe hkam la lu sai rai nga ai. N dai lam ni yawng gaw, Nu Maria kaw kamhpa let Rosary akyuhpyi shakut ai a majaw hkam la lu ai chyeju ni nan rai nga ai. Dai majaw, dai ding hku gaw masha yawng hpe kasi kaja madun ya lu ai ngwi pyaw ai hkristan dinghku byin mat wa sai rai nga ai. Rosary a chyeju atsam gaw mau hpa rai nga ai.

          Tsawra ai Nu Wa Hpu Nau hpung masha ni yawng mung, nang, na a prat shawng lam a matu hte kashu kasha ni zet tsang kung hpan galu kaba wa lu na matu, mabyin hta na Numsha zawn, kade lang Rosari kyu hpyi shakut yu sai kun? Ramma ni mung, tinang a prat hta hpaji chye magrau grang ai ni tai lu na matu hte dinghku shang ai shaloi, myitsu tsawm htap ai, manang kaja tam la lu na matu “Rosary” akyu kade lang hpyi yu sai kun? Myit yu ga! Kalang pyi  n hpyi yu ai rai yang, hpang n hkrat shi ai. Daini daina kawn nna, Rosary hpe kamhpa manoi let, akyu hpyi ga. Mabyin hta na dinghku num  a kasi hpe yu la nna, kashu kasha ni a shawng lam prat gam maka tsawm lu na matu, Nu Maria kaw ap da let akyu hpyi garum ya nga ga. Ramma ni mung myitsu tsawm htap nna kyang lai len kaja ai, manang kaja tam la lu na matu Rosary hti akyu hpyi shakut hkawm sa nga ga ngu mayu n ngai.

          Shing rai, anhte yawng mung, atsam rawng dik, lak nak kaba dik rai nga ai, “Rosary” hpe lang nna, Nu Maria kaw kamhpa manoi manat let akyu hpyi shakut sa wa ga, dai rai yang chyu sha, anhte a shawng lam makam masham gaw rawt  jat galu kaba wa nna, ngwi pyaw sim sa ai prat hpe gaw gap lu na rai nga ai, ngu n-gun jaw garan kachyan ya dat lu n ngai law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.