Tsin Yam Hkrum Masha Ni Hpe Garum La Lam Galaw Na Matu Nmai Hprai Ga Ai, Nga Nna Wa Sarabyjn Tsun

“Tsin yam hkrum masha ni hpe mu ai shaloi shanhte rau yawn hkrap madai na matu nmai hprai ai, garum la lam galaw na matu nmai hprai nga ai,” nga nna September 29, laban shani ‘World Day of Migrants and Refugees” ngu ai Bu htawt hkawm masha hte tsin yam hkrum masha Mungkan masat nhtoi galaw ai laban Missa hkungga hta Wa Sarabyin Francis tsun dat nga ai.

Wa Sarabyin tsun ai hta, “Bu htawt hkawm masha hte tsin yam hkrum masha ni, ngu nna tsun ga ai shaloi bu htawt hkawm masha ni a lam san san sha nrai, shada da n-gawn n-sawn galaw chye ai anhte shinggyim masha ni a myit jasat ni a majaw uhpung a shinggan de ganawng shapraw kau hkrum ai matsan mayan masha ni yawng hpe anhte myit dum ra ga ai, kadai hpe mung uhpung uhpawng a shing gan de ngam kau da ai lam nmai galaw ga ai, shanhte a shinggyim sari ni hpe bai gaw gap lam galaw ya ra ga ai, lachyen ginghka lam ni byin pru shangun ai anhte a n tara ai lam ni hpe dinglik yu lam galaw na matu Madu anhte hpe saw shaga nga ai, ndai ntara ai lam ni ngu ai hta, tinang sut su nga mai wa na matu kaga masha law law a prat ni hpe jahten sharun kau ya lam galaw ai lam ni mung lawm nga ai,” nga nna Wa Sarabyin tsun dat nga ai.

N tara ai lam hte seng nna, dan dawng ai ga shadawn mabyin nkau mi hpe mung Wa Sarabyin tsun madi madun lam galaw dat nga ai. Ga shadawn, nnan she galu kaba wa nga ai Mungdan ni hta, Mungdan a nhprang sut rai ni hpe ahkaw ahkang lu ai masha nkau mi a akyu a matu chyu sha shabyin kau ai, bai kaga langai mi gaw, Mungkan mungdan shara nkau mi hta sha kasat gala majan ni byin nga ai raitim, sinat laknak ni hpe gyin htuk shapraw nna Mungkan Mungdan shara magup de dut shabra lam galaw nga ma ai, dai zawn galaw ai a majaw shara magup majan mang hkang ni byin nna, majan tsin yam hkrum masha ni htaw pru wa ai shaloi gaw, tsin yam hkrum masha ni hpe dai sinat laknak dut shabra ai Mungdan ni bai nkam jahkap la nga ma ai.

 Mara kata masha law law tsinyam hkrum, matsan jam jau hkrum, hkrat madai nga ma ai lam ni hpe anhte Hkristian ni hku nna tinang hta hpa nseng ai zawn nga nmai ga ai, jam jau hkrum nga ai masha ni hpe garum la na matu anhte nmai hprai kau nga ga ai zawn, shanhte the rau hkrap madai lawm na matu mung nmai hprai ga ai,” nga nna Wa Sarabyin tsun dat nga ai .

Source : Vatican News

Ga gale:Fr.Bernard
Thomas