Myitkyina Sasana Ginwang Hta, Laklai Ai October Sasana  Shata Hpaw Hpang Missa Galaw 

2019 October shata hta Sasana Majen je akyu hpyi ai magam bungli hpe laklai ai hku shakut na matuWa Sarabyin Francis kaw nna Mungkan ting hpe ndau shana saw lajin da sai hte maren, Ndai akyu hpyi shata , Rosary hti ai shata hpaw poi lamang, Missa hkungga kaba hpe October praw 1 ya, mani bat 2 jahpawt hkying 8 ten hta Myitkyina, San Columban Cathedral Nawku htingnu kaba hta galaw lai wa ai.

Missa hkung ga hpe Sagurem wa, Wa Saradaw Francis Daw Tang woi awn let Wa Jau ni law law rau jawmg nawng jau ya ai rai nna, Missa hpang na hkyen yang ndai Lak lai ai akyu hpyi shata hta akyu hpyi hpang ai lamang hpe Nawku jawng ndaw hta Wa Saradaw hku nna akyu hpyi shaman let hpaw hpang lai wa ai.

Wa Saradaw tsun ai hta, ‘ Mungkan ting na hpung masha ni hpe laklai ai hku nna akyu hpyi shaja na matu, Nawku hpung a ningbaw ningla, Wa Sarabyin Francis hku nna matsun ai hte maren, anhte Myitkyina Saradaw ginwang kaw e shang lawm shakut taw nga ai hpung masha ni, magam gun kaji kaba ni, dai ni ndai Saradaw dung ai Nawku htingnu a man kaw e sa du hpawng de let Madu Karai Kasang a shaman chye ju hpe hkam la na matu, shut hpyit mara ni hpe hpyi nem tawng ban na matu ndai shata mi tup hta e anhte hkum shagu hkan nang hkan sa ra ai, akyu hpyi ra ai lam, sakse hkam, sasana shachyam shabra majen je ai lam ni hpe a sharawng a shara rai let Nawku hpung magam gun ni, Du gyi salang kaji kaba yawng, Hpu nau Makam masham hpung ni yawng myit hkrum let shang lawm lu na matu ndai October sahta hpe chyoi pra san seng tengman dinghpring mai kaja ai lam hku nna jai lang lu na matu, hte ndai hta shang lawm akyu hpyi shakut ai a marang e shada da mara raw hkyem sa jaw hkat let ndai amu magam hpe galaw lu na matu shaman ya rit ‘ nga nna akyu hpyi shaman ai.

Dai hpang, laidi sumri rep kadoi nna hpung shawa masha yawng shakawn mahkawn hkawn let Nawku jawng kata shang, Missa pinra de shara la nna Missa kaba hpe galaw lai wa ai.

Daining 2019 ning gaw, Wa Sarabyin hku nna matsun ai laklai ai Sasana shaning ngu nna masat da ai hte maren, grau nna shata mana shi October Rosary hti akyu hpyi ai shata hta ndai amu magam hpe shawoi na hta grau lak lai ai hku galaw shakut n-gun dat  lu na matu, Saradaw Ginwang ting jawm pawng let ya na zawn hpaw hpang Missa kaba hpe galaw ai re lam chye lu ai.

October praw 1 yaw shani kaw nna 31 ya shani du hkra, ndai kabu gara shiga gat hkai ai shata laman, Asia dan ting na Mungdan langai hpang langai a matu akyu hpyi garum ya ai lam galaw na matu  Myen mung CBCM, Pontifical Missionary Societies rung  kaw nna  aten jarang masat shapraw da ya sai re lam chye lu ga ai.ai

“Wa Sarabyin hte seng ai Sasana shachyam shabra rung, PMS kawn dai ning na  ndai laka lai ai sasana bungli lamang hpe woi awn galaw nna ndai lam hpe grau dan dawng na matu Wa Sarabyin  kawn “Baptised and sent” Kashin kamun hkam nna shangun dat ai ngu ai lachyum ga baw hpe mahta let lawng lam (8) hku nna ndai shata hta galaw na matu matsun da ai re” nga nna Mama Mary Hka Raw tsun ai chye lu ai.

Ya na zawn ndai 2019 ning October shata hpe lak lai ai sasana shata ngu masat ai lam gaw, lai wa sai1919 ning N30 ya shani hta, Wa Sarabyin Benidict XV hku nna, Miximum Illud ngu ai matsun laika hpe Mungkan ting de shana matsun dat sai, lachyum gaw Marku a laika daw kaba 15,16 hta lawm ai “Mungkan shara shagu de sa nna hkaw tsun gat hkai u” ngu ai kabu gara shiga hpe lakap nna matsun ai lam rai nna, dai ning 100 ning hpring masat shaning rai nga ai hte maren, Wa Sarabyin hku nna Sasana a matu lak lai ai hku nna shang lawm na matu matsun ya ai re lam chye lu ai.

Thomas