Lamu Kasa Ni A Lam ( 24 Sep, 2019 )

Lamu kasa ni a lam

          Nu wa hpu nau ni, Lamu kasa ni a poi nhtoi hpe Nawku hpung kawn, October Shata Praw (2) ya shani ngu, masat galaw ai lam hpe mu lu nga mali ai. Daru magam hpung shing kang hte hpring ai, Hpan wa ningsang, Chye wa ning chyang Karai Kasang gaw, mu lu ai n mu lu ai, nsoi nsa rawng ai nrawng ai, nga yawng nga pra hpe hpan hpajang da sai rai nga ai. Karai Kasang hpan da ai nga yawng nga pra yawng mayawng hta lak lai ai gaw, Shinggyim masha hte Lamu Kasa ni re hpe chye lu nga ga ai. Hpa majaw nga jang, Karai Kasang a hkrang sum la hte bung ai, nhtum nmat lu ai, nsa Wenyi rawng ai majaw re. Shinggyim masha ni hte Lamu kasa ni shai ai lam langai nga ai. Dai gaw hpa ta nga jang, Lamu Kasa ni gaw, Hkum hkrang nlu ai, Wenyi san san re. Lamu Kasa ni nga ai lam hpe, Ja Chyum Mungga hta mu hti lu nga ai. Lamu Kasa ni gaw, Sumsing lamu e, Karai Kasang a myi man hpe mu lu ai ni, Karai Kasang a man e, myi man pa ai ni, hpaji byeng nya hte hpring tsup ai ni re lam hpe anhte Tara laika sharin ai shaloi, chye la lu saga ai re.

          Lamu kasa ngu ai lachyum hpe, ga htai Chyum laika hta shaleng da ai gaw, “sumnung shingdi ai wa, mara nkap ai wa, matsan dum lanu lahku chye ai wa, nga nna,” rawng nga ai. Lamu kasa ngu ai hpe shinggyim masha ni hkrang sumla soi ai shaloi, sing kaw tu ai masha hku nna soi da ma ai. Lachyum gaw, Lamu kasa ni gaw, Karai Kasang a magam lam hpe lawan ladan hkrak ai teng ai hku kang ka htep lahti rai, galaw ai ni re ngu nna, shingran hta dum shai nga lu na matu, lamu kasa ngu ai ni hpe sing kaw tu ai shinggyim masha a hkrang sum la hku nna, myit sawn soi da ma ai lam chye lu ai. Madu Karai Kasang gaw, Sumsing Lamu matsaw lahta tang e, Lamu kasa zawnawng zaw wa hpe, shi Madu a magam gun hpai na matu, Shi Madu hpe nawku shakawn na matu, hpan da sai lam anhte naw kaji nga ai ten Tara laika sharin ai shaloi, chye la lu ai lam hta lawm nga ai. Kaja wa nga jang, Karai Kasang gaw, Ma hkra dang chye ai wa re hte maren, gade a garum ai mung nra ai, raitim, shi a hpung shingkang dan hkung wa u ga matu, lamu kasa ni hpe hpan da sai rai nga ai. Nkau lamu kasa ni gaw, Karai Kasang a Kabu gara shiga htawn tsun ai lam hpe Luka Laika 1: 26, 2: 9 – 14 hta Chyoi Pra ai Hkawnsek Maria hpe Karai Kasang a lamu kasa Gabriela dan pru nna, masha nlang a matu, na chying kabu gara mai ai shiga, Mungga gaw masha tai wa na lam shiga, David mare hta hkye la Madu shangai wa na lam, htawn tsun masai rai nga ai.

          Bai, Lamu kasa wunawng wuwa, dan pru nhtawm me, matsaw lahta tang e, Karai Kasang gaw hpung shingkang rawng nga u ga, Ga ntsa e mung shi sharawng awng ai masha ni hta ngwi pyaw ai gaw a nga nga u ga law, nga ai hpe mung, mu hti lu nga ai. Luka laika 1: 5- 24 hta, Zahkari hpe Madu a lamu kasa dan pru nna, Yawhan Bathista shangai wa na lam hte seng nna, htawn shana ya sai. Madu Yesu shangai wa ai ten hta, Sagu rem ni hpe na chying kabu mai ai shiga, shana ya sai rai nga ai. Lamu kasa zawnawng zaw wa dan pru nna, shangai wa ai Karai Yesu hpe mahkawn mangwi shakawn ma ai. Karai Kasang gaw shinggyim masha hpe bau sin makawp maga na matu Lamu kasa ni hpe hkang da ai lam Kasa Laika 12: 7-15 hta mu hti lu ai gaw, hpri sumri hte gyit hkang da hkrum ai Kasa Petru hpe Madu a Lamu Kasa sa hkye la ai lam rawng nga ai. Mahte a Laika 18: 10 hta mung, dai Ma kaji langai mi hpe pi nanhte n gawn nsawn ndi kau myit ga, sadi nga mu, nga ai Madu Yesu a matsun Mungga hte maren, Ma Kaji ni hta shanhte hpe sin ai Lamu kasa, Karai Kasang hkang da ai lam chye lu ai. Luka Laika 16: 22 hta mung, sahti wa a shat ngaw shat ngam hpyi sha ai, Lazaru si ai shaloi, Lamu kasa ni gaw, shi hpe Abraham a lahpyen hta woi bang ai lam mu lu nga mali ai re.

          Shakawn kungdawn laika 91: 11- 13 hta mung, lam shagu e nang hpe bau sin na, na a matu shi a lamu kasa ni hpe shi hkang da nu ai. Nlung hta na lagaw n ahtu u ga, shanhte a lata hta nang hpe pawn la na mara ai. Yawba a Laika 33: 23 hta mung, masha wa hpe teng man ai lam madun dan na matu, Lamu kasa hkying, mun hta na, htinglu htinglai ya ai wa langai mi, shi a makau e tsap nga ai, nga nna, ndai Ja Chyum Mungga ni hku nna, Karai Kasang gaw, anhte hpe bau sin makawp maga na matu, lamu kasa hkang da ya ai lam, mu hti chye la lu nga ga ai re. Shingrai, tsawra ai nu wa hpu nau ni, anhte hta Karai Kasang hkang da ai, lamu kasa teng teng nga ai hpe myitdum nna, yawnhkyen myit kaji hkrum ai ten, myitru myit tsam pu ai lam ni hte hkrum gadup wa ai aten, a gung a lau lam ni law law hte hkrum gadup wa ai ten ni hta anhte marai hkum shagu hpe bau sin makawp maga ya nga ai Lamu Kasa hpang de kam hpa manoi let garum hpyi ga. Karai Kasang a Chyoi Pra ai Lamu kasa anhte a makau e sin, yu nga ai hpe myit dum let shut hpyit mara ni hpe koi gam lu hkra shakut ga. Anhte hpe bau sin na matu, Chyoi Pra ai Lamu kasa hkang da ya ai Madu Karai Kasang hpe mung, chyeju dum shakawn kungdawn nga ga. Tsawra ai nu wa hpu nau ni, shani shagu na sak hkrung hkrun lam hta, Karai Kasang gaw, anhte hta ra gadawn nga ai ra ai chyeju ni hpe mung, kaja wa jaw ya na re ngu ai hpe kam hpa nga ga ngu shana ya let, daini na lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.