W.P Myu Sha Ni, Masha Jahpan Yawm Wa Ai Lam Hta, Kahtawlik Nawku Hpung Kaw Na, Gara Maga Hku, Galaw Ya Lu Na Kun?

Ga San: (1) Wunpawng sha ni masha jahpan yawm hkrai yawm hkrat mat wa ai gaw Kahtawlik nawku hpung hku nna gara maga hku galaw ya lu na ta? (2) Wunpawng ni, masha jahpan shau ai (n law ai) majaw kaga amyu ni hte mungdaw mungdan hparan ai hta awng dang na rai ni? Akyu mai hkam sha na rai ni? Wa Jau maram nna htai ya rit. Muse Jau Ginwang, Nam Hkam mare, Mung-wi buga, Pying Hkam lawk na, ya ten Myitkyina PLN (1) kaw du taw nga ai Sara Luka Lasang Brang Tawng a ga san hpe htai ya na n ngai.

Htai: Wa Jau maram nna htai ya rit nga hte maren maram nna htai na nngai. Daini ya na aten hta gaw Jinghpaw wunpawng sha ni sha n rai, mungkan masha ni nan yawm wa ai hpe mu lu nga ga ai. Dai gaw chyam bra ana Covid 19 tsin-yam a majaw rai nga ai.

Chyum laika hta tsun da ai mayat maya lam

Np.Nhp 1:22, “Shi gaw dai ni yawng hpe shaman ya nhtawm hka hta rawng ai hkrung mahkrung ni mayat maya wa nna panglai hka hta hpring wa mu, ntsa malen u ni mung law htam wa mu, ngu nna tsun wu ai.”

Np.Nhp 1:28 hta “Shanhte hpe shaman ya nna, Kashu Kasha law law shaprat mu, shaloi nan a matu mara ni aga ting hta shanu nga lu nna, dai hpe up hkang lu na mara ai. Ngai gaw nan hpe nga ni hpe mung, ntsa malen u ni hpe mung, dusat nhprang ni hpe mung up hkang na ahkang jaw da nga nngai,” ngu hpang da magam hpang ai shaloi Hpan Madu Karai Adam yan Eve hpe hkang da ai.

Yeremia 30:19 hta, “Nye a shaman chyeju ga a majaw, shanhte law htam mayat maya wa na mara ai; nye a shaman chyeju gaw shanhte hpe shagrau sha-a lam jaw ya na ra ai,” ngu Myihtoi Jerimiah mung Karai Kasang a ga sadi hpe ndau ya ai.

Np.Nhp 16:10, “Dai hpang shi gaw, Na a amyu matu grai law htam hkra ngai nang hpe jaw na de ai.” Bai Np.Nhp 17:6, “Ngai nang hpe amyu matu law law jaw na we ai; dai ni hta nkau mi hkawhkam hkawseng pru shajang na mara ai. Nang hta amyu matu grai law htam wa nna dai ni gaw amyu baw ni tai wa na mara ai,” ngu Karai Kasang Abraham hpe ga sadi jaw da ai.

Np.Nhp 22:17, “Na a amyu matu ni hpe mung lamu na shagan ni, shing n rai, panglai zaibru ni zawn ngai nang hpe jaw na nngai. Na amyu matu ni mung shanht a gumlau hpyen ni hpe dang kau lu na mara ai,” ngu Abraham Isak hpe hkungga nawng na hpe jahkring, sumwum kaw dau taw ai sagu hte hkungga nawng jau shangun ai hpang Madu a lamu kasa Abraham hpe ga sadi jaw ai.

Np.Nhp 26:3-4, “Ndai yang e nga u, ngai nang hte rau nga nga nna nang hpe shaman ya na nngai. Nang hpe mung, na a amyu matu ni hpe mung ndai mung ting ngai jaw na mawe ai; shing rai na nwa Abraham hpe ngai shagrin da sai ga sadi hpe ngai shatup na we ai. Na a amyu matu ni hpe lamu na shagan ni zawn ngai shalaw na mawe ai rai nna, dai ni yawng hpe ndai mung ting ngai jaw na mawe ai. Amyu baw ni yawng mung na a amyu matu ni hpe ngai shaman ya ni ai hte maren shanhte hpe shaman ya na matu hpyi lajin wa na mara ai,” ngu Isak hpe mung shi a kawa Abraham hpe zawn sha, Karai Kasang ga sadi tawn da ai.

Tara Jahprang 7:12, “Ndai hkang da ai matsun maroi ga ni hpe nanhte madat nna sadi sahka hte hkan sa madat mara myit dai rai yang, dai Madu nanhte a kaji kawa ni hpe ga sadi tawn da nu ai hte maren, shi a dinggrin tsaw ra myit nanhte hpe madun dan nna shi a ga shaka hpe matut shagrin na rai wu ai,” ngu Israel myusha ni hpe mung ga sadi jaw da ai.

Tara Jahprang 17:16-17, “Dai hkawhkam wa gaw num law law la tawn lu na n rai; dai gaw shi hpe dai Madu kaw na myi man kayin kau shangun na rai wu ai; aja gumhpraw hte shi hkum hpe sut su shagnun lu na n rai. Shi hkawhkam tai wa ai shaloi, Lewi hkingjawng ni kyem mazing da ai ningpawt kanan laika kaw na ka da ai Karai Kasang a tara hte sharin achyin ga ni rawng ai laika langai mi hpe shi lang da na rai wu ai.”

Np.Nhp 12:2, “Ngai nang hpe law law mayat maya shangun nna amyu kaba shatai na nngai. Ngai nang hpe shaman ya nna na a mying hpe gumhkawng shangun na nngai; shing rai nang gaw chyeju daju tai na rin dai.

Sh.Kd 139:17-18 hta, “Karai Kasang e, na a myit mang ai lam ni nye a matu kade wa yak la nga a hka; dai ni gaw kade wa law la nga a hka! Dai hte hpe hti yu na nga yang, shanhte gaw zai bru hta n ga, law htam nga ma ai,” ngu rawng nga ai.

Is 2:7, “Shanhte a lamu ga gaw ja gumhpraw hte hpring nga nna, shanhte a sut gan ni htum ngu, n nga nga ai. Shanhte a lamu ga gaw gum ra ni hte hpring nga ai, shanhte a gumra leng ni htum ngu, n nga nga ai.”

Kasa 9:31, Dai majaw dai aten hte yang Samari mung shara magup hkan e nga ai hpung gaw zingri zingrat n hkrum ai angwi apyaw sha nga lu nga ma ai. Dai hpung gaw Karai Kasang hpe hkrit hkungga ai myit hte asak hkrung shamu shamawt nna Chyoi Pra ai Wenyi a karum madi shadaw ai hte ngang kang grin nga ai rai nna hpung masha ni law htam wa ma ai.”

Kasa 12:24, “Dai laman hte yang, Karai Kasang a mungga matut nna chyam bra galu kaba maden jat wa sai.”

Heb 6:14, “Karai Kasang gaw, ngai nang hpe kaja wa shaman ya nna, matu mara ni law law jaw ya na ngu nna ga ndat jaw da de ai, nga nna Karai Kasang Abraham hpe ga sadi jaw da ai”

Shinggyim masha ni mayat maya na matu Karai Kasang shaman ya ai, ga sadi tawn da ai, makawp maga ai, lam matsun madun ai lam ni law law galaw ai. Ndai gaw shawng de hti dan sai chyum daw ni hku anhte chye lu ga ai.

Dai chyum laika a sharin shaga ai hpe mahta nna Nawku Hpung woi ni prat hte prat rai nna mungkan masha ni mayat maya na matu, prat masa hta hkan nna lam woi ya nga ai.

Wa Sarabyin Francis hkum nan mung mungkan masha yawm wa nga ai hpe myit dum let Nawku Hpung hte Mungkan masha ni hpe shadum da ai lam galaw da ai hpe shiga madat hkrup na sai ngu kam ai. Dai hta Wa Sarabyin Francis masam maram da ai hta, daini na ramma ni gaw kasha lahkawng ram sha la mayu ma ai lam rai nna, Karai Kasang jaw ai kashu kasha ni hpe shangai shaprat mayat maya na matu shadum sadi jaw ai rai nga ai.

By Fr. Patrick Gawmaw Hkawng Yae