Tara Kanu Lam ( 10 ) Tawt Lai Nga Ai Dinghku Yan A Alu Ni Gaw San Seng Ai Kun? Karai Kasang Hkap La Na Kun?

Madu Yesu a Kasa 12 hta lawn ai Mathe a lam hpe loi mi mada maram yu ga. Mahte gaw Ahkun hkanse hta ai wa rai nga ai. Dai aten hta Ahkun hkanse hta ai ni hpe yuda masha ni gaw tinang a amyu hpe sai chyupai. Roma hkaw hkan hpe daw jau ai. Amyu hpe dut sha ai. Tinang a amyu hpe sumlau ai wa sadi ndung ai wa, Mara Kaba lu ai wa ngu nna masat da hkrum ai wa langai rai nga ai. Raitim Madu Yesu gaw Mahte a rita de sa nna shi the rau, shi a manang ni lawm rai nna, Mahte hkyen lajang jaw ai shana shat alu hpe sa sha ai. Masha yawng gaw Mahte hpe mara kap ai wa ngu myit la ai.

Raitin Madu Yesu gaw Mahte lajang jaw ai shana shat hpe sa sha lawm ai hpe Mahte a laika 9:9-13 hta mu lu ai. Madu Yesu tsun da ai hta Mahte a laika 9:12 hkam kaja ai ni gaw tsi sara nra ai, machyi makaw hkrum ai ni sha tsi sara ra ai. Madu Yesu gaw galoi raitim mara lu ai, mara lu dum ai ni hpe hkap la nga ai hpe anhte mu lu ga ai. Bai Hebre masha ni hpang de shagun da tai laika 13:16 Kaja ai lam hpe hkan galaw na hkum malap lu atan bang shakut mu ngu nna tsun da ai. Mahte a laika 6:1-4 hta madu yesu tsun ai gaw alu atan bang na, mai kaja magam bungli ni galaw na raitim gumrawng shakawng shaku tai myit hte n galaw na matsun da ai.

Corinthu masha ni hpe San Pawlu shagun da tai laika 2 Corinthu 9:7 hta hkum ding dek gaw ra sharawng ai, shawang tsawra myit the alu atan bang shakut ra ai hpe sharin ya ai. Luka a laika 6:38 hta Madu Yesu tsun ai, Jaw mu, shingrai jang, nanhte hpe jaw na marin dai hpring kabrat hkra arin garin, man ai dang hte nanhte a lahpyen e shanhte jaw na mara ai. Nawku Hpung a Rit Kawp Tara canon Law numbat 1300 hta hpung masha hkum ding dek gaw tinang lu lawm mai byin ai hte alu atan bang ra ai hpe matsun da ai.

Catholic Nawku Hpung Kata e kadai gaw alu mai bang ai nmai bang ai ngu ai qinghka masat da ai lam nnga ai. Hpung masha hkum dingdek gaw tinang mai byin madang masa hta hkan nna du atan bang ra nga ai. Kalang lang anhte nay u mu yu na re. Hpung nbung ai, makam mashan nbung ai hpu nau ni Nawku Hpung hpe alu atan jaw ai lam nga nga ai. Hkungran ga shaka hgye tawt lai nna dinghku de sha mat ai ni, mabyin masa lam amyu myu a majaw Nawku Hpung masat da ai tara hpe nlu hkan ai ni hpe Nawku Hpung shinggan de shapraw kau ai lam gaw nnga nga ai. Myit mlai lu nna mai kaja de, karai kasang hpang de, Nawku Hpung de bai wan a hpe galoi mung ala nga ai. Nawku Hpung a Tara Sharin Laika catechism of the Catholic Church numbat 2462 Tsawra matsan dum lama ai lam the Tengman Tara rawt jat ngang kang wa na matu hpung masha yawng gaw alu atan bang shakut ra ai hpe matsun da ai. Grau nna nlu nlawm ai, matsan chyaren hkrum nga ai hpe garum madi shadaw na matu hpung masha ni yawng gaw tinang a lu lawm mai byin ai masa hta hkan nna shakut ra ai hpe matsun sha rin ya nga ai. Dai majaw Nawku Hpung masha yawng gaw kadai raitim Karai Kasang a mungdan rawt jat kalu gaba wa na matu hte masha ni hpe hkye mawai ai, matsan dum lama ai magam bungli ni hta shang lawm alu atan bang shakut ra nga ai