Si mat sai nga jang,shi a matu galoi mung myit dum akyu hpyi ya n ra na kun?

(Prayer for the death) Shimgyim masha langai si mat sai nga jang,shi a matu galoi mung myit dum akyu hpyi ya n ra na kun?ra na kun? N kau hpu nau ni tsun ai gaw..si mat sai wa hpe akyu hpyi ya n ra ai nga chye na ma ai.bai n na sumsing mung dan du na n du na gaw karai kasang hte sha seng ai nga chye na ma ai. Dai majaw dai lam hpe asan sha,chye na hkon hkrang hkra chye ju hte naw sang lang htai ya rit. Myitkyina,shata pru jau ginwang kaw nga n na,ya miwa mung coung doung ga kaw bung li galaw ai John Lahtaw a ga san hpe htai ya na nngai.

Htai: Karai Kasang nga ai ngu ai hpe kam sham ai ni yawng, Madu Yesu Christu hpe hkye hkrang la ai madu ngu kam sham ai ni yawng, shinggyim masha gaw mungkan ga n’tsa e shangai wa n’na sak hkrung hkawm sa n’na la ni mi si nan si mat wan a kam sham ai ni yawng, bai mungkan ga n’tsa e sak hkrung hkawm sa nga ai ten karai hte shinggyim masha ni shut shai ai lam nga dum ai ni yawng gaw si mat wa sai ni a matu akyu hpyi nan hpyi ya ra ai.

Masha n’kau mi tsun ai Mada kaw kam sham na matu n’rai tinang a makam masham hpe asak apart tsum shaga myit mang ai galaw ai magam bungle ni hte sakse hkam ra nga ga ai dai mahtang she anhte a matu hkye hkrang la ai lam de du sha ngun lu ai.

2Macabeee 12:40-46 hta Israela Hpyen Jaubu Macabee Juda hte hpyen la ni gaw Gorgias ngu ai majan hta hkrat sum mat ai shi a hpyen ma hpyen la ni hta lup makoi na matu la jang ai. Hkrat sum mat ai hpyen ma ni a hpyen palawng kata maga de Jamania ngu ai nat hpara a lathpoi ni hpe mu sawk ai. Dai lakhpoi hpe n’mai lang ai ngu n’na mung jep tawn da ai. Raitim hkrat sum mat ai hpyen la shagu a hpyen palawng kata maga de dai nat hpara sumla lathpoi hpe lagu shakap da ai. Dai majaw hpyen Jau Bu Wa Juda Macabe gaw shi mung alu bang, bai hpyen ma ni gaw mung alu lahkawn rai, dai hta mahkawng la lu ai hpe Jerusalem Nawku de shagun dat n’na Jau hkinjawng ni hpe akyu hpyi htinglu htinglai ya na matu hpyi dat ai. Dai n’mai lang ai Nat Hpara Jamania lathpoi lang n’na hkrat sum mat ai hpyen la ni, si mat ai hpyen la ni a matu akyu hpyi ai lam galaw ya ai hpe mu lu ai.

AD. 160-170 Lapran hta Nawku Hpung Kaw n’na a’dau shana ai makam masham laika matsun ACTA JOANNY a sharin shaga ai gaw Nawku Hpung masha ni yawng gaw si mat wa sai hpu nau ni a matu akyu hpyi ya ai, myit dum akyu hpyi ai lam galaw na matu matsun sharin shaga da ai.

Nawku Hpung a makam masham sharin ya ai hta Nawku Hpung gaw shara masum hta nga nga ai. (1) ngu hta sumsing mungdan de du nga sai Nawku Hpung,sanpra ai masha ni, English ga hte nga yang Triumphant Church Awng Padang hkam la lu sai Nawku Hpung (2) ngu nah ta simat wa ai hpang sumsing mung dat de du lu na matu shachyoi shapra ai hkam la nga ai English ga hte nga yang Purgatory – suffering Church. Jam Jau hkam sha nga ai Nawku Hpung (3) ngu na hta mungkan ga n’tsa kaw shinggyim asak naw hkrung ai ni, English ga hte Militant Church Tinang a gawng kya ra rawng, hkum shan ra marit hpe kasat nga ai Nawku Hpung.

Ndai shara masum e nga ai Nawku Hpung gaw langai sha rai nga ai matut mahkai nga ai. Dai majaw anhte asak naw hkrung nga ai Mungkan ga n’tsa na Mawku Hpung gaw simat wa sai hpu nau ni a matu galoi mung akyu hpyi ya ra ai. Anhte a akyu hpyi ai hte mai kaja ai magam bungle ni gaw anhte a akyu hpyi ya ai, mai kaja ai lam ni majaw karai kasang a matsan dum lama ai hpe hkam la lu n’na sumsing mungdan lawan ai hku du wa lu ai. Karai Kasang a mungdan sumsing mungdan de du mat wa jang mung anhte hpe bai n’htang akyu hpyi na rai nga ai.

Anhte a jinghku ni, n’ta masha ni hpe, kanu kawa ni, kahpu kanau ni, simat wa sai ni hpe Karai Kasang a sumsing mungdan de lawan ai hte du lu na matu garum ai lam mung rai nga ai. Anhte shinggyin masha ni a myit mada ai hte maren nga yang aten kadun laman Karai Kasang a sanpra ai ni byin lu na matu garum ai lam rai nga ai.

Mahte 5:26 hte Luka 12:59 hta anhte tup hkrak hpring tsup shachyoi shapra hkam la lu ai madang de du na matu tinang wa ra ai hka nhkum ntsup n’chyoi n’pra ai lam mahkra hpe kashin shatsai kau ai hpang she Karai Kasang hte gingdan ai sumsing mungdan shang lu na rai nga ai.

Tinang a makam masham hpe hkan lang hkan sa ai hku n’na si mat wa sai hpu nau ni a matu galoi mung akyu hpyi ya nga ga. Anhte a jinghku ni, n’ta masha ni Karai a mungdan de du ai sanpra masha ni law u ga, dan hkam nga ai kaw n’na lawan lawt lu mu ga, si wa sai hpu nau ni hpe n’malap ai sha akyu hpyi ya nga ga. Ndai hte hte ga san hpe htai ya lu nngai.

By Fr. Patrick Brang Di