Saradaw Philip Lasap Zahawng A Wan Wu Chya Shani - Lu Sha Gam Ladaw Shang Ai shani Na Mungga (16 FEB 2021)

Chyum mungga: Chyum Mungga Daw (1) - Yoel 2; 12-18

                          Chyum Mungga Daw (2) - 2 Kor. 5; 20 – 6; 2

                           Kabu Gara Shiga - Mahte 6: 1-6, 16-18

“Madu Karai Kasang gaw, Lusha gam let, hkrap ngu hkrap ngoi nna, sharung shayawt let, nanhte a myit masin mahkra hte ngai hpang de bai nhtang wa marit.” Yoel 2: 12

Tsaw ra hkungga ai Nu Wa, Hpu Nau Hpung masha ji nban yawng hte, Karai Kasang a makawp maga bausin ya ai a marang e, yawng ngwi pyaw hkam kaja nga mu ga, yawng hpe shawng akyu hpyi shakram dat nngai.

Dai ni, anhte a Kahtawlik Nawku Hpung hta Lusha Gam ai Ladaw de du shang wa ai nhtoi re. Myit malai ai kumla hku nna Wanwu chya ai hpe hkamla ga ai. Covid zinli a majaw, dai wanwu chya ya ai akyu hpyi hpawng Missa Hkungga hta tatut shang lawm na  n mai byin yang mung, myit malai majing hte akyu hpyi let, nhtoi 40 ya na ai ndai ladaw de shang wa ga. Tinang a shut hpyit mara ni hpe myit dum yin la nna, myit yawn myit malai ai hte lai wa sai aten na, n kaja ra rawng ai myit sat lawat, kyang lailen ni hpe tawn kau nna Madu Karai Kasang hpang de bai nhtang wa ga; Shi a mungga tara ni hpe hkan lang shatup let sak hkrung sa wa ai hta laklai shakut nna, ndai aten lahtaw hpe jai lang sa wa ga. Kasa Pawlu tsun ai: “Ya e byin mai htap htuk dik ai aten rai sai; hkye hkrang la ai nhtoi rai sai” (2 Kor. 6:2). Anhte Hkristan masha ni a kam sham ai hta ahkyak dik rai nga ai Karai Kasang a Kasha Yesu Hkristu anhte shinggyim masha yawng a mara ni hpe gun la nna, si hkam ai hpang bai hkrung rawt ai Paska – Awng Padang Poi a matu hkyen lajang sa wa ai aten ladaw nan rai nga li ai. Ndai zawn lajang shachyip nna kabu gara dik ai Paska Awng Padang Poi hpe shang lawm ai rai yang, anhte yawng gaw Madu Karai Kasang a hkye hkrang la ai chyeju  n taw n tsang lu la na ga ai.

Ndai aten ladaw hpe gara hku jai lang sa wa na kun? Dai ni na Kabu Gara ai Shiga hta Yesu hkristu hkum nan anhte hpe shadum matsun nga ai.

1.  Masha ni, grau nna yak hkak ai ni hpe gam garan daw jau ai amu hpe galaw na. Masha a man e, arawng lu na matu n re, jet ai tsaw ra matsan dum myit hte alu atan, garum madi shadaw ai amu hta shakut sa wa na. Anhte a mungdaw mungdan hta, grau nna, ya na zawn Covid ana zinli a majaw hkrit tsang shajang nga ai aten hte mung masa lam galai shai wa nna mung shawa masha ni hkrit kabrawng nga ai aten hta ja gumhpraw, malu masha, bu hpun palawng hte kaga lam law law a matu, grau yak hkak wa ai. Ndai zawn re ai aten hta hpyen yen ni hte, kaga ra kadawn ai ni law law nga ai. Dai ni hpe tsaw ra matsan dum myit hte gade sha raitim, garum madi shadaw sa wa ga.

1. Akyu hpyi shaja na. Anhte shinggyim masha ni gaw Karai Kasang a man e, shut hpyit ai ni rai nga ga ai. Tinang a mara a matu chyu sha n rai, makyin jinghku ni a shut ai mara, mungdan ting na masha ni shut ai mara, Mungkan ting na masha ni shut ai mara ni a matu, Karai Kasang a Kasha Yesu Hkristu gaw Shi mara n kap timung, shinggyim masha yawng a mara Shi  gun la nna, zingri zingrat, asawng asang ai lam law law hpe hkam sha sai; wudang ntsa e jen noi si hkam nna lup makoi ai hkrum sai. Raitimung, masum ya nhtoi hta bai hkrung rawt sai. Ndai hkye hkrang la ai chyeju anhte hkum ngau shagu hkam la lu na matu, akyu hpyi shaja nga ga. Tinang a mara, yawng a mara a majaw, myit yawn myit malai majing hte ndai ladaw ten hta grau nna akyu hpyi shaja nga ga.

1. Lusha gam na.    Myihtoi Yoela hkaw tsun ai: “Madu Karai Kasang gaw, Lusha gam let, hkrap ngu hkrap ngoi nna, sharung shayawt let, nanhte a myit masin mahkra hte ngai hpang de bai nhtang wa marit.”(Yoel 2: 12)

Mara a majaw myit malai let Madu Karai Kasang hpe hpyi nem tawng ban ai; yak hkak jam jau ai aten ni hta Karai Kasang kaw garum hpyi ai shaloi, Karai Kasang a man e, tinang a n ging n dan ai hpe myit dum yin la nna lusha gam let akyu hpyi shaja ai gaw grau nna akyu chyeju hkam sha lu ai. Karai kasang anhte hpyi lajin ai hpe madat mara ya ai.

Dai ni mungkan masha ni hta lusha a majaw hten run ai, asak sum mat ai, grai law wa ai. Nanghpam lusha hte tsa chyaru ni hpe pyaw daw hku nna sung lang ai, galaw shapraw ai, dut shalai, shabra nna ja gumhpraw tam ai lam ni grai nan law wa ai. Dai ni a majaw masha htenza wa ai, asak sum mat wa ai, dinghku hta matsan jam jau wa ai, dinghku hka bra mat wa ai lam ni shara shagu nga wa ai.Ndai lam ni hpe mung, sung sung myit yu nna, ndai ladaw laman e akyu hpyi lusha gam let shading sharai sa wa ga; ndai hpyen ni kaw nna mung, lawt lu na matu shakut sa wa ga. Anhte a Mungdaw, Mungdan ngwi pyaw sim sa ai hte Democracy mung masa ngang grin wa na matu mung Karai Kasang kaw akroi anoi akyu hpyi nga ga.

“Madu Karai Kasang gaw, Lusha gam let, hkrap ngu hkrap ngoi nna, sharung shayawt let, nanhte a myit masin mahkra hte ngai hpang de bai nhtang wa marit.” Yoel 2: 12

Udang masat:Kawa, Kasha, Chyoi Pra ai Wenyi………..Amen.

By;

Rev.Fr. Patrick Gawmaw Hkawng Yae

Co-ordinator of RVA-Kachin Service

Myitkyina Office