San Pra ai Yawhan Damascene a Poi Nhtoi (December 4) 04 December 2022

San Pra ai Yawhan Damascene a Poi Nhtoi (December 4)

San Pra ai Yawhan Damascene gaw, Greek amyu sha ni kaw na, Fathers of the Church ngu ai, Nawku hpung a Kawa tai ai ni kaw na hpang jahtum rai nga ai. Shi gaw, Syria Mungdan, Damasku mare kaw shangai chyinghkai wa nna, Muslim hpung kaw kunhting amu gun hpai lai wa ai. Dai hpang, Yerusalem mare makau kaw na, Mar Saba ngu ai Jau tai jawng de shang ai hpang, Jau tai lu hkra shakut lai wa sai rai nga ai.

San Pra ai Yawhan Damascene gaw, hpaji lam yan hta zet zang kung hpan ai sha n-ga, Karai Kasang hte seng ai Hpaji hta mung, grai ning tawn wa ai rai nga ai. Shi a atsam hte kasi kamang ni hpe Nawku Hpung a Hpaji Ninghkring “Doctor” San Pra ai Thomas Aquinas hkan shatup la wu ai. San Pra ai Yawhan gaw, rau ai aten shagu hta mahkawn mangwi ka ai, laili laika ni ka nna aten shama wu ai.

Kalang mi na, moi mang makoi ai lamang hta shi gaw grai madat pyaw ai nsen hte mahkawn langai mi dum shapyaw wu ai raitimung, shi a ntsa na myit su wa gaw n na man ai majaw, mahkawn ka ai lam hpe aten ram ram na hkra pat kau ya hkrum wu ai. Raitimung, ndai hte seng nna Jau Yawhan hpe Nu Maria hkum nan hkye la sai. Nu Maria gaw, dai myit su wa kaw shingran madun let, Yahan ra sharawng ai mahku hte mahkawn na ahkang jaw na matu sa shadut ya sai.

San Pra ai masha ni a sumla ni hpe hkungga jaw ai lam hpe pat shingdang ya ai Hkawhkam Leo (3) hpe San Pra ai Yawn aja awa ning hkap ai; Hkristan masha ni wenyi lam hta myit kap myit jung wa na matu hkungga let, lang ai she re ai lam tsun dan ai. Shaloi Hkawhkam Leo (III) gaw, Yahan a hkrat lata hpe kahtam di kau shangun ai. Raitimung, Nu Maria kaw, San Pra ai Yawhan akroi anoi hpyi nem ai majaw, San Pra ai Yawhan a hkra lata gaw, mi na raw bai tsi shamai la lu sai.

San Pra ai Yawhan Damascene gaw, A.D 749 ning, December shata praw (4) ya shani, shi a asak (74) ning hta madu kaw yup pyaw ban sa mat wa sai rai nga ai.

San Pra ai Yawhan Damascene n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, December shata praw (4) ya shani masat shagrau dat ya sai rai nga ai.

Daini Nawku Hpung gaw, San Pra ai Yawhan Damascene a Poi Nhtoi hpe galaw nga ai hte maren, anhte hpung masha ni mung, Karai Wa myit ra sharwang ai Makam Masham Lam hte Mai Kaja ai amu magam ni galaw sa ai aten, dingbai dingna mayak mahkak lam ni hkrum wa shagu, San Pra ai Yawhan Damascene zawn akyu hpyi n gun la let, matut shakut hkawmsa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)