San Pra ai ni a Mying hte seng ai machye machyang

San Pra ai ni a Mying hte seng ai machye machyang

Mying shamying ai lachyum gaw ga san san ai wa hkum nan grai chye na sana re ngu kam ai. Ga si shagu hta lachyum rawng nga ai hte maren, mying shagu hta mung lachyum rawng nga ai. Hpan Madu Karai Kasang, nga yawng nga pra hpe hpan ai shaloi dai hpan da hkrum ni a mying yawng gaw shi a shi lachyum rawng nga ai.

“Adam” ngu ai ga si gaw Hebrew ga si rai nna lachyum gaw “gayun” “hkyen ai gayun hte galaw ai kasha” ngu rai nga ai. Adam ngu ai mying gaw la sha ni a matu madung lang ma ai rai nga ai.

Adam hkum nan Karai Kasang shi a garep nra langai mi hte bai hpan ai num sha hpe “Eve” ngu shaming la ai. Lachyum gaw “sak hkrung ai wa” “nga yawng nga pra a kanu” ngu ai rai nga ai (Np.Nhp 3:20). Adam (earth) Eve (living)

“Noah” ngu ai lachyum gaw bansa ai (rest), simsa ai (peace), myit shalan shabran ai (comfort) ngu lachyum rai nga ai. Shi a kawa Lamech hkum nan “shi gaw shalan shabran ai wa rai na ra ai” ngu shingran hte jaw da ai rai nga ai (Np.Nhp 5:29).

“Abraham” ngu ai lachyum gaw “masha law law a kawa, mayat maya ai kawa” ngu ai rai nga ai. Shi a madu jan Sarah gaw “Karai Kasang ngai hpe kabu shangun ai, mani shangun ni ai” ngu ai lachyum hte shan a kasha hpe “Isaac” ngu shamying ai (Np.Nhp 21:6). Moses, Aaron hte Miriam ni hte kaga mying ni mung shi a shi lachyum nga ma ai.

Lamu Kasa “Michael” a lachyum gaw “Karai Kasang hte bung ai wa”,(who is like God) “Raphael” a lachyum, “Karai Kasang shamai shatsai ya ai” (God has healed), Gabriel, “Karai Kasang a masha” (man of God), ngu ai rai nga ai.

Daniel “Karai Kasang gaw nye a tara agyi” (God is my judge), Matthew “Karai Kasang a kumhpa” (gift of God), Isaiah “Karai Kasang gaw hkye la ai wa” (God is salvation), Samuel “Karai Kasang madat nga ai” (God listens), John “Karai Kasang gaw sumnung ai” (God is gracious), Nathaniel “Karai Kasang jaw ya sai” (God has given), Jeremiah “Karai Kasang shagrau sha-a ai” (God exalts), ndai zawn sha chyum laika hta rawng ai mying ni yawng gaw shi a lachyum hte shi nga nga ai. Dai mying ni hpe mung yaw shada ai hte shamying da ma ai hpe mu lu ai.

Greek masha ni a mying hpe yu dat yang mung shi a lachyum hte shi nga ma ai hpe mu lu ga ai. Alexandros, “shinggyim masha ni hpe makawp maga ai wa” (defender of mankind), Nikolaos, “awng dang lam lu ai masha ni” (people of victory), Philippos, “gumra ni hpe tsaw ra ai wa” (lover of horses), Georgios, “ga yun hte seng ai bungli galaw ai wa” (worker of earth), Demetrios, “lamu ga kanu” (earth mother), Theodoros, “karai a kumhpa” (gift of god).

Hkristan ni San pra masha tang hpang wa ai labau hpe yu yang, Hkawhkam Constantine a prat, tsaban mali (4) aten kaw nna Roma hta sat hkrum ai masha ni hpe tang hpang wa ai hpe mu lu ai. Shawng daw de gaw Roma hkawhkam ni gaw tara maigan hpara naw ai ni sha rai ma ai. Hkristan masha ni gaw dai aten ni hta zingri sat jeyang sat hkrum lai wa ma ai. Masha 10,000 a lahta de na masha ni hpe san pra masha tang lai wa ma ai. Dai ni gaw hkawnset ni, Nawku hpung hpe makawp maga ai ni, du htau sat hkrum ai ni, tara shadik akyu hpyi ai ni, Kasa ni, majan gasat awng ai ni, mara raw ya ai ni, sasana ma ni, ndai zawn re ai nawku hpung kawn shakawn shagrau, kasi la mai ai ni hpe san pra masha tang hpang wa ma ai rai nga ai. San pra ai masha tang ai nga tim tara shang hkrang masa lam ni gaw n nga shi ma ai. Madung gaw Hkristu a mying ningsang a majaw sat hkrum ai ni hpe tang lai wa ma ai. Hpang daw de she tara shang hkrang tara, hkrang masa ni hte rau hkrak rai nna San pra ai masha tang wa ma ai.

Wa Sarabyin e shawng ningnan San Pra masha tang hkrum ai wa gaw, Augsburg kaw na Saradaw, San Pra ai Ulrich rai nga ai. Shi hpe Wa Sarabyin Yawhan XV kawn 993 shaning, Lateran Council zuphpawng hta tang ai rai nga ai. Wa Sarabyin Alexander III (1159-81) kawn gaw ndai San Pra ai masha tang ai hpe Wa Sarabyin hte sha seng ai (reserve the cases of canonization to the Holy See) ngu masat shagrin da ai. Ndai hte seng nna tara (general law) ni hpe gaw Wa Sarabyin Gregory IX (1227-41) a lakhtak hta masat shagrin da lu ai.

By Fr. Patrick Gawmaw Hkawng Yae