San Pra Ai A Labau ( 23 August 2021 )

Lima Mare na San Pra ai Rose a Poi Nhtoi (August 23)

San Pra ai Rose gaw, Dingda America dan kaw na shawng nnan San Pra ai Masha, ngu nna Nawku Hpung kawn masat shagrau hkrum ai hkawnsek rai nga ai. Shi gaw, Peru Mungdan, Lima Mare kaw, 1586 ning hta shangai wa ai rai nga ai. Shi a kashin kamun mying gaw, Esbel de Gloers y del Oliva ngu ai re, raitimung, shi a hkyeng tsawm ai shabyi a majaw shi a kanu gaw, shi hpe Rose “Numri Pan” nga nna galai shamying shaga wu ai.

Kanu yan Kawa hpe garum na matu, Rose gaw, Nampan hkai ai, rida maka amu hte za htu htu ai amu galaw ai. Bungli grai galaw shaja ai; shi hpe hkrungran la mayu ai shadang sha ni grai law ma ai raitimung, Rose gaw, Hkawnsek prat hte sak hkrung nga na matu, ga sadi tawn kau ai. Shi hpe lasha ni n ra sharawng mat na matu, shi a tsawm la ai myi man hte layung ni hpe majap arut da da rai wu ai.

Rose gaw shi a asak (20) ning shaloi, Third Order of St. Dominic Magam Gun Wuhpung de shang mat wa nu ai. Shan nu wa ni a sun kata na sum kasha kaw tara shadik let jam jau jam hkau ni hpe myit galu kaba rai hkam sharang nna nga nga wu ai. Siena mare na, San Pra ai Catherine a kasi hpe shi hkan shatup ai.

Lani mi na nhtoi hta, Madu Yesu gaw, Rose hpe: “Ruyak jam jau a hpang shaman chyeju hkan sa wa ai; Wudang n lawm ai sha kadai mung sumsing mungdan de lung ai lam hpe n mu lu ai.” (Grace comes after tribulation, and that without the cross men can find no road to climb to heaven) nga nna sa tsun ai. Ndai ga na ai shaloi jang, shi gaw grai sharawng shara rai, lam de pru sa nhtawm nsen kaba hte “Shawa ni e, madat ya yu marit; anhte jam jau n hkam yang shaman chyeju n lu la ga ai.” nga nna sa marawn shaga wu ai

Rose gaw, shi si na shawng nhtoi kade n na yang: “Madu e, nye a ruyak jam jau ni hpe shalaw ya rit: dai hpang Na a tsawra myit nye a salum hta shalaw jahtam ya rit.” nga nna akyu hpyi wu ai.

Rose gaw, asak (31) ning du shaloi, 1617 ning hta, Madu kaw yup pyaw ban sa mat wa sai rai nga ai. San Pra ai Rose hpe “Dingda America Dan a Kam Shamyet Lu ai San Pra ai Masha” (Patroness of South America) ngu nna Nawku Hpung masat shagrau dat sai rai nga ai. Shi gaw, Dingda America Dan kaw na shawng nnan mying kaba ai masha hte Peru Mungdan na matsan masha ni a matu shawa bungli shawng galaw hpang ai masha, nga nna shagrau hkrum wu ai.

San Pra ai Rose n nga mat ai, 1671 ning, April (12) ya shani hta, dai aten na, Wa Sarabyin Clement (X) kawn, Shi hpe San Pra ai Masha dang dat let, Shi a Poi Nhtoi hpe mung, August shata (23) ya shani hta masat shagrau dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)