San Htai Lamang ( Question & Answer ) 11 February 2021

San: Wajau e, ja gumhpraw shing nrai mayak lam amyu myu a majaw ''Hkungran Sakramentu!'' nhkam la shi ai shaloi, la kasha hte num kasha gaw grai tsawra hkat ai majaw Tara Rung hta Ta Masat htu nna arau nga sha ai ni hta Mara nga ai kun? Chyeju hte alu sha htai ya rit. Ya ten Miwa gumsan mungdan kaw du nga ai shd. Paul Sumlang Zai Myu Awng a ga san hpe htai ya na nngai. (Sacrament, procedure)

Htai: Kahtawlik Nawku hpung masha a matu, gara hku masa kaw mi nga nga, Hkungran Sakramentu n hkam la ai sha dinghku de ai gaw mara rai nga ai. Kahtolic Nawku Hpung makam masham hpe hkap la ai wa gaw dai nawku hpung a sharin shaga ai hte maren nga sa ra ai. Kahtawlik Nawku Hpung masha langai a matu, tsaw ra ngu ai gaw Karai Kasang kaw na rai nga ai. “God is Love” Karai Kasang gaw tsawra myit re ai. Dai majaw Karai Kasang hpang da ai anhte shinggyim masha ni a matu grai tsaw ra chye ai myit madung gaw Karai Kasang kaw na rai nga ai. Kahtawlik Hpung masha langai a matu grai tsaw ra chye ai wa gaw Karai Kasang hpe madung tsaw ra ra ai. Tinang tsaw ra ai ningrum ningtau, kanu kawa, kahpu kanau, manau manang ni hte Karai Kasang hpe grau tsaw ra chye ra ai. Karai Kasang hpe grau tsaw ra ai wa gaw ngam ai masha ni yawng hpe grau tsaw ra lu na rai nga ai.

Karai Kasang hpe tsaw ra ai wa gaw Karai Kasang a hkang da tara hpe hkan sa ra ai. Karai Kasang a hkang da tara hpe madung da n hkan sa ai sha, shinggyim masha ni e gaw da ai tara hpe madung da yang shut shai lam nga chye nga ai. Kahtawlik Nawku Hpung masha shagu gaw Karai Kasang a tara hpe madung da hkan shatup ra ai. Kathawlik Nawku Hpung gaw makam masham hpung shagu a gaw da tara ni, Mungdan shagu a gaw da tara ni, myusha shagu a htung hking lam ni, hte shinggyim ahkaw ahkang hte seng ai lam ni yawng hpe hkung ga ai, manu shadan ya ai. Raitim Kahtawlik Hpung masha langai mi hku sak hkrung nga pra na wa gaw Kahtawlik htung tara hpe hkrak tup hkan sa hkan shatup ra ai. Dai majaw Kahtawlik nawku htung hte maren hkungran sakramentu hkam nan hkam la ra ai.

Hkungran Sakramentu hkam la na matu yak ai lam hpe, Gumhpraw mayak hte gaw lawt shaga ai hpung masha ni grai law ma ai. Gumhpraw mayak a majaw hkungran shakramentu n hkam la lu ai ngu ai ga gaw Kahtawlik nawku hpung masha a matu galoi n tsun ging ai ga rai nga ai. Hpa majaw nga yang Nawku hpung gaw hkungran sakramentu hkam ya ai a gumhpraw manu masat da ai lam nnga ai. Madung gaw hkungran hkam la na yan a myit she rai na re. shan wa hkik hkam ai hku hkungran mayu ai majaw kun? htung hking lam hta yak ai majaw kun? Mayu dama lam hta yak ai majaw kun? Nawku Hpung hta hkungran sakramentu hkam shabrai ngu ai gaw n masat da ai. Gade yak ai raitim, gara masa lam hta rai tim, Kahtawlik Nawku hpung masha a matu dinghku de rau nga na rai jang Kahtawlik Nawku Hpung htung hte maren Hkungran Sakramentu hkam nan hkam la ra ai. Dai hku n rai yang gaw mara nga ai re ngu htai ya dat lu nngai.

Ka Lajang ai  - Fr. Patrick Gaw Maw Hkawng Yae

                         Coordinator Of RVA Kachin

                         Myitkyina.