RVA Jinghpaw Nsen (39) Ning Hpring Sai ( 15 November 2021 )

Radio Veritas Asia (RVA) Nsen Shapoi Dap Byin Hpang Wa Ai Labau Kadun

Veritas ngu ai gaw, Latin ga rai nna, Tengman ai ngu ai a lachyum rai nga ai.

RVA Nsen Shapoi Dap hpaw hpang ai lam a  yaw shada ai lam gaw, Karai Kasang  a ahkrung nga ai mungga, chyambra wa hkra, hkaw matsun na matu rai nga ai.

RVA Nsen Shapoi Dap byin hpang wa ai labau hpe yu dat ga nga yang, Asia Dan hta shanu nga ai Myu sha ni yawng a matu, Nawku hpung hte seng ai, Nsen Shapoi Dap gaw gap sa wa na matu, Wasarabyn Pio XII shawng myit lu nna, Lam matsun madun dat ya sai. Dai majaw Sinpraw Asia Dan na Kahtawlik Saradaw ni gaw, lai wa sai, (1958) ning, December shata hta Philippines Mudan, Manila Mare kaw, zuphpawng galaw lai wa sai. Dai zuphpawng hta jawm myit hkrum daw dan la lu sai lam ni hpe, dai ten na, Philippines Mungdan a Kahtawlik Nawku hpung ningbaw, Cardinal Santos lit la nhtawm, Germany Kahtawlik Saradaw hpung de, tang shawng garum hpyi dat sai. Germany Mungdan, Kahtawlik Nawku hpung ni kaw nna, garum madi shadaw madi shadaw ya na matu, myit hkrum ga sadi jaw dat ya sai. Shingrai, (1965) ning hta Nsen Shapoi dap htingnu hte nsen htawn Jak Lang Chyi ni hpe gaw gap shachyaw hpang wa nna, (1967) ning hta ra akyak ai lam ni yawng ngut kre la lu sai. Gaw gap magam ngut kre wa ai hte rau, dai shaning hta nan nsen shapoi chyam yu nna, maram ding lik yu masai. Kam ram ai masa lam ni hpe mu chye lu sai majaw, (1969) ning, April shata 11 ya shani, Radio Veritas Asia Nsen Shapoi Dap hpaw hpang poi galaw sai. Ndai Radio Veritas Asia Nsen Shapoi Dap hpaw hpang poi hta, Asia Dan na Saradaw ni law law sa du kabu shang lawm lai wa masai. Dai majaw, ya daini du hkra nga yang, RVA Nsen shapoi dap a asak gaw, lai wa sai, April shata 11 ya shani hta shaning (52) ning hpri sai rai nga ai.

RVA nsen shapoi dap hta shawng nnan, Vietnam hte Thai Myu sha ga ni rau, shapoi hpang sai. 1967 ning hta Indonesia ga hte shapoi chyam yu sai. (1973-1975) ning du hkra nsen shapoi ai lam jahkring mi gan jahkring tawn da ai. (1975) ning kaw nna, Indonesia myu sha ga lamang madung shapoi sai. (1976) ning hta English, Sinhala, Telugu, Miwa, Tamil hte Japan myu sha ga ni rau matut shapoi jat wa sai. (1978) ning hta myen myu sha ga bai jat shapoi sai. (1980) ning hta Korea hte Bengali ga ni rau, matut shapoi jat sai. (1982) ning hta Kayin hte Jinghpaw myo sha ga, Pakistan mungdan a Urdu myu sha ga, (1988) ning hta Hindi ga, (1989) ning hta Russia ga, (1992) ning hta Ukraine ga, dai hpang Myanmar mungdan na, Zomi chin (Hkang Myu sha ga) matut manoi shapoi mat wa sai.

1). RVA – Jinghpaw

2). RVA – Lisu

3). RVA – Rawang

4). Kayin – Po-Karen

5). Kayin – Sagaw-Karen

6). Myen

7). Bangladesh Mungdan na, Bengali Myu sha ga

8). (India Mungdan na) – Hindi Ga

9). (India Mungdan na) – Tamil Ga

10). (India Mungdan na) – Telugu Ga

11). (Myanmar Mungdan) – Zomi- Chin (Hkang Ga)

12). Indonesia Mungdan na, Indonesian Ga

13). Russia Mungdan na, Russian Ga

14). Miwa Gumsan Mungdan na, Madarin Ga

15). Sarilanka Mungdan na, Sinhala Ga

16). Vietnam Mungdan na, Vietnam Ga

17). Thai Mungdan na, Hmong Myu sha ga

18). Pakistan Mungdan na, Urdu Ga

19). Hkang Myusha Ga hpan (4)

Raitim, ya daini na ten hta, matut mahkai lam ni rawt jat wa nga sai, Mungdan ni gaw, Shanhte a Nsen Shapi Dap ni hpe dawm la mat wa sai hte nkau myu sha ni gaw, tinang a buga ginjaw Rung, (Local Center)  kaw nna, kalang lata, ndai RVA nsen shapoi dap de, Program Lamang ni hpe sa ya taw nga masai re. Rawt jat galu kaba wa nga ai Mungdan rai nga ai,  India Mungdan,  Pakistan Mugdan, Miwa hte Thai Mungdan na - Hmong (Mawng) myu sha ni gaw, tinang a Mungdan de yawng bai nhtang mat wa nna, tinang a Mungdan kawn lamang ni hpe galaw ginlen ya nga sai rai nga ai. Miwa Mungdan gaw Communist Mungdan re majaw, shanhte a Mungdan hta lamang ni hpe galaw ginlen nga ai raitim, Philippines mungdan RVA ginjaw kawn Radio Lamang ni hpe shapoi ya ra ai. Laiwa sai 2018 ning June Shata (30) ya shani gaw, Radio hku nna nsen shapoi ai lam hpe jahkring kau sai rai nga ai. Prat dep wa sai hte rau, Online ngu ai Internet ntsa lam yan hku nna, Radio nsen lamang ni hpe matut gin len ya nga saga ai rai nga ai.  

 

Anhte Jinghpaw W.P Myu Sha Ni A RVA Nsen Shapoi Dap Byin Hpang Wa Ai Lam

Yaw shada lam hte Ban dung

Mission 

• Shiga madat ni a wenyi lam, myit masin lam, nga sat nga sa lam, htung hkying the sak hkrung nga sa lam ni hta rawt jat galu gaba bawng ring wa u lu ga matu RVA Jinghpaw nsen shapoi dap kaw nna makam masham the seng ai lamang, shiga jaw ya ai lamng, htung hkying lamang the rawt jat bawng ring lamang ni hpe shapoi ya nga ga ai.

 

Vision 

• RVA Jinghpaw nsen shapoi lamng ni hpe hkap madat hkam la ai a marang e wun pawng sha ni teng man ai the lachyum pru ai prat the sak hkrung nga pra lu let grau kaja ai hkristian masha ni tai wa lu na.
• While listening to the Radio Veritas Asia Kachin Service radio programs, the Kachin people may live their lives truthfully and fruitfully as better persons and better Christians.

Laksan yaw shada ai lam ni (Specific objectives)

• Wenyi lam tha n gun ban ya lu na matu the tsawm htap ai nga sat nga sa lam ni the nga sa chye lu na hkra Karai kasang a mungga hpe hkaw tsun ya na, nawku hpung a sharin shaga lam ni hpe sharin shaga ya na. 
• Wun pawng sha tai nga lu ai ngu ai lam hpe kabu gara arawng la chye wa hkra Wun pawng sha ni a tsawm htap ai manu dan ai htung hkying lai len, lai htung masa, laili laiaka ni hpe sharin ya na. 
• Mung kan the tinang a buga makau grup yin hta byin nga ai lam ni hpe mu chyu wa lu nna dai mabyin masa ni hpe ding lik maram la let dai mabyin ni the jaw ang masa the tsun tsap lu na, htap ai ai masa the tinang a prat hpe gram lajang la lu mu ga matu mung kan shiga the makau gyin hta byin nga ai mabyin lam nin hpe tang madun ya na. 
• Tsawm htap kasi la mai ai hkristian kun ding hku ni gaw gap la lu na matu the kashu kasha ni hpe astam shapan shalet hpaji jaw la lu na matu kun ding hku ni hpe matsun madaun ai lam ni galaw la na. 
• Ramma ni shayi shadang sha ni nse nsa ai re ai lam ni the nang hpam malu masha ni a hpyen hta hkrat sum mat ai lam nnga u ga the ning baw ning la kaja ni byin tai wa lu u ga matu matsun madaun ya na. 
• Awng dan bawng ring ai shing gyim prat hpe lu la mu ga matu kan bau bungli the seng ai lam ni the hpaji jaw la ai lam ni galaw ya na.
• Makam masham hpung shada da hku hkau ganawn mazum ai lamang ni hpe shapoi ya ai hku nna Hkristan ni galung gahkyin wa lu u ga matu mung, makam masha hpung nbung ai shada da a lapran shada tsawra hkungga chye na hkat ai lam ni nga wa hkra gaw gap na.

 

Anhte Jinghpaw W.p Myu sha ni, RVA nsen shapoi dap hta shang lawm lu ai labau kadun hpe yu dat yang, Shawng de, jinghpaw mung daw, Manmaw buga de (8) ning daram sasana magam gun hpai lai wa sai, Columban Wa Jau Colm Murphy gaw, ahkyak madung rai nga ai. Wa Jau Colm Murphy gaw, Jinghpaw Mungdaw kaw magam gun hpai nga ai kaw nna, shi a daidaw buga de, bai nhtang wa mat ai hpang, kade nna yang, UNDA ngu ai Kahtawlik Nawku hpung a mungkan ting hte seng ai Radio hte Hkrang mu sen na, magam dap a amu madu aya tang da hkrum lai wa sai. UNDA hte RVA nsen shapoi dap gaw, matut mahkai nga ai. Wa Jau Colm Murphy gaw shi sasana magam sa gun hpai lai wa sai, Mungdan hte Myu sha ni a ntsa, shawang tsawra myit da let, RVA nsen shapoi dap hta Myen Myu sha ga shapoi lu hkra lajang hpang ya sai. Dai lam na chye lu ai, dai ten na, myitkyina Sasana Saguremwa, Wa Saradaw John Howe gaw, Wa Jau Colm Murphy hte jahkrum nhtawm, chyurum jinghpaw myu sha ni a matu mung, RVA nsen shapoi dap hta laksan shanglawm lu hkra lajang ya na matu mung, bawng ban jahkrum lai wa sai. Shingrai nna, Wa Jau Colm Murphy, Wasaradaw John Howe hte Wasaradaw Paulu Zinghtung Grawng ni gaw, Myanmar mungdan na, kahtawlik Saradaw hpung ni a madi shadaw laika hte rau RVA nsen shapoi dap hta jinghpaw myu sha ga nsen shapoi lamang hpe mung shalawm la ya na matu, dai ten na, RVA lithkam ningbaw  Cardinal Sin hpang de tang shawn hpyi lajin lai wa sai. Cardinal Sin kaw nna, RVA nsen shapoi dap hta, jinghpaw myu sha ga hte nsen shapoi lamang hta shang lawm lu sai lam, (1982) ning, August (28) ya shani ahkaw ahkang jaw dat ya sai. Dai ahkaw ahkang lu ai hte rau, Wa Saradaw Paul Zinghtung Grawng gaw, Myitkyina, Sasana na, Jau ni hte jahkrum bawng ban nhtawm, Wa Jau Francis Zuk Daw Lum Dau hpe jinghpaw nsen shapi dap hta magam gun hpai na matu, lit jaw shatsam dat ya sai. Shingrai, Wa Jau Francis Zuk Daw Lum Dau gaw, (1982) ning, September shata (20) ya shani hta Philippines mungdan de du sa wa sai. Dai shaning, (1982) ning November shata (15) ya shani kaw nna, Jinghpaw myu sha ga hte nbung lam ntsa shawng nnan shapoi dat lu sai. Ya na zawn RVA Jinghpaw Nsen Lamang hpe Radio nbung lam hku nna, Dai ning 2021 ning August Shata (31) ya shani du hkra, shapoi ya lai wa sai rai nga ai. Radio Nbung lam hku nna shapoi ya ai hpe dawm kau ai raitim, Ya daini na ten, Internet ngu ai, Online ntsa hku nna, anhte a RVA Jinghpaw nsen lamang hpe shani shagu shapoi ya nga ding yang rai nga ga ai. RVA Online Radio lamang hpe 2021 ning September Shata Praw (01) ya shani kaw nna, shapoi hpang nga saga ai. Ginlen ya nga ai Media ni gaw, ( RVA- Kachin FB, Website, Youtube, Istargram, Twitter, Wechat, Viber, Messager ni rai nga ai.)

Ndai anhte a RVA jinghpaw Nsen Shapoi Dap Hta Magam Gun Hpai Lai Wa Ai Ni Gaw –

RVA Magam gun Jau Ni ( Philippines )

 

(1) Wa Jau Francis Zukdaw Lum Dau (1982 – 92), 

(2) Wa Jau Peter Kareng Gam Awng (1987- 95), 

(3) Wa Jau John Lahtaw Zau Doi (1995 -2000), 

(4) Wa Jau Peter Hka Awng Tu (2000 – 2007), 

(5) Wa Jau John Galang La Raw (2000 – 2012), 

(6) Wa Jau Bernard Dashi Tang Ji (2013 – 2020), 

(7) Wa Jau Patrick Gawmaw Hkawng Yae (2020 -  ) ni gaw lit hkam magam (Coordinators) mying hte magam gun lai wa ai ni rai nga ai.

RVA Magam gun Brother gaw, 

(8) Bro. Richard Zahkung Tu Lum ( Dec praw (1) 2004 to Dec 31, 2008 ) rai nga ai.

 

RVA Magam gun Ma Ma Ni ( Philippines )

 

(9) Sr. Geradine Lazum Htoi San, (18 December 1984 - 15 November 1996 )

(10) Sr. Sylvia Lahpai Seng Tawng, (18 December 1984 - 15 November 1996 )

(11) Sr. Patricia Gawlu Kai Htang, (1988 – 1991 )

(12) Sr. Mary John Paul Galau Bawm Win, ( 1991 May – 1996 )

(13) Sr. Lazing Pri Seng, ( 1997 – 2003 )

(14) Sr. Elizabeth Lazum Roi Ji (SJ) ( 1995 -1999 )

(15) Sr. Monica U Raw Ja awn, ( Nov, 2003 – 2007 )

(16) Sr. Iris Hpawlam Ja Nan, (2007 – 2012 )

(17) Sr. Rose Angeline Maran Nang Doi, (2011-2012, RVC), (2012 – 2018, RVA), 2018 RVC -

 

RVA Magam gun Sara/num Ni ( Philippines )

 

(18) Saranum Tsumhpawng Ja Nan (1995 -1999 )

(19) Saranum Veronica Nang Zing Lu Awn, ( 2009 , Marh – 2016, June )

(20) Sara Nhkyi Zau Dan, ( 2002 – 2004 )

(21) Saranum Margareth Hpaudau Roi Awn, (2000 Nov to 2003 ning Nov, RVC) (01 Aug 2007 to 30 April 2011, RVA )

(22) Saranum Clare Zahkung Nang Mai, ( 2009 – 2011 )

(23) Sara Joseph Maru La Nan (2009- 2011, March, RVC )( 2011 April (1) – 2018 RVA )

(24) Saranum Julia Ndawng Ja Ing, ( 2009- 2011, March,  RVC ) ( 2011 – 2018, RVA) 2018 RVC-

.

 

RVC Magam Gun Ni ( Myitkyina )

(25) Sr. Roselyn Dashi Roi Bu, (2000 - 2005 )

(26) Sr. Mary Male Lu Mai, (2005 - 2019 )

(27) Saranum Lucy Npawp Nan Ja, ( 2005 - 2009 )

(28) Sara John Nhkrai Mung Hkrang, ( 2011 -

(29) Saranum Moreen Zinghtung Lu Awng ( 2011 -

(30) Sara John Nnye Seng Tu, ( 2011 -

(31) Saranum Elizabeth Nbang Seng Lawt Lu ( 2011 -

(32) Sara Paul Njawng Brang Mai ( 2011 )

(33) Sr. Mary Lasha Roi Hkawng ( 2011 – 2018 )

 

(34) Sara John Chyahkyi Mung Hpan ( 2017 April – 2021 September)

 

(35) Sr. Mary Ja An ni rai ma ai. ( 2018 –

 

Ya Tatut hta magam gun nga ai ni gaw,

1. Wa Jau Patrick Gawmaw Hkawng Yae
2. Mama Rose Angeline Maran Nang Doi
3. Mama Mary Nhpun Ja An
4. Sara John Nhkrai Mung Hkrang
5. Sara John Nnye Seng Tu
6. Sara Thomas Chyahkyi Mung Hpan
7. Saranum Julia Ndawng Ja Ing
8. Saranum Elizabeth Nbang Seng Lawt Lu - ni rai nga ai.

RVA Nsen shapoi lamang byin tai wa hkra, lajang ya sai, Nawku hpung a ningbaw Wa Sarabyin ni, Wa Saradaw ni, Wa Jau ni, Brother ni, Yu reng Komity ni yawng hpe mung ndang tsun hkra chyeju dum nga ga ai.

Wunpawng Myusha ni yawng a matu, Asak hka hpawk rai nga ai RVA Jinghpaw nsen shapoi dap tut e ngang grin nga u ga, yawng madi shadaw akyu hpyi garum ya let, shang lawm nga ga. Tatut hta magam gun nga ai Wa Jau ni, Mama ni, Ramma kanau kasha ni yawng mung, Karai Kasang jaw ya ai chyeju n gun atsam hte matut shakut ap nawng nga ga ngu, n gun jaw mayu nngai.

 

Yawng hpe Karai Wa shaman ya nga u ga law.

 

Hkristu a magam hta,

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.