RVA Jinghpaw N-sen Shapoi Dap kaw e, magam gun lai mat wa sai Jau, Ma Ma, Brother, Sara ni kade rai mat sai kun?

 (1) RVA Jinghpaw N-sen Shapoi Dap kaw e, magam gun lai mat wa sai Jau, Ma Ma, Brother, Sara ni kade rai mat sai kun? Mying hte hkrak chye mayu ai. (2) RVA Rung kaw bungli gun na matu wun kat gara kaw lung ra ai kun, kade ning lung ra ai kun? (3) RVA kaw bungli gun na ni, shabrai lu ai kun, machye machyang hpa baw ning tawng ra ai kun, chyeju hte htai ya rit. Muse Jau Ginwang, Nam Hkam mare, Mung-wi buga, Pying Hkam lawk na, ya ten Myitkyina PLN (1) kaw du taw nga ai Sara Luka Lasang Brang Tawng a ga san hpe htai ya na n ngai.

• RVA Jinghpaw N-sen Shapoi Dap kaw magam gun lai mat wa sai ni yawng rai yang 33 rai saga ai.

RVA Magam gun Jau Ni (1) Wa Jau Francis Zukdaw Lum Dau (1982 – 92), (2) Wa Jau Peter Kareng Gam Awng (1987- 95), (3) Wa Jau John Lahtaw Zau Doi (1995 -2000), (4) Wa Jau Peter Hka Awng Tu (2000 – 2007), (5) Wa Jau John Galang La Raw (2000 – 2012), (6) Wa Jau Bernard Dashi Tang Ji (2013 – 2020), (7) Wa Jau Patrick Gawmaw Hkawng Yae (2020 -) ni gaw lit hkam magam (Coordinators) mying hte magam gun lai wa ai ni rai nga ai.

RVA Magam gun Brother gaw, (8) Bro. Richard Zahkung Tu Lum rai nga ai.

RVA Magam gun Ma Ma ni gaw, (9) Sr. Geradine Lazum Htoi San, (10) Sr. Sylvia Lahpai Seng Tawng, (11) Sr. Patricia Gawlu Kai Htang, (12) Sr. Lazing Pri Seng, (13) Sr. Mary John Paul Galau Bawm Win, (14) Sr. Iris Hpawlam Ja Nan, (15) Sr. Elizabeth Lazum Roi Ji (SJ), (16) Sr. Monica U Raw Ja awn, (17) Sr. Rose Angeline Maran Nang Doi, (18) Sr. Mary Ja An ni rai ma ai.

RVA Magam gun Sara/num ni gaw, (19) Sara Nhkyi Zau Dan, (20) Saranum Veronica Nang Zing Lu Awn, (21) Saranum Margareth Hpaudau Roi Awn, (22) Clare Zahkung Nang Mai, (23)Sara Joseph Maru Lanan, (24) Sara John Mung Hkrang, (25) Sara Nnye Seng Tu, (26) Sara John Chyahkyi Mung Hpan, (27) Saranum Julia Ja Ing, (28) Saranum Elizabeth Seng Lawt Lu, ni rai ma ai.

RVC magam gun ni gaw, (29) Sr. Roselyn Dashi Roi Bu, (30) Sr. Mary Male Lu Mai, (31) Saranum Lucy Npawp Nan Ja, (32) Saranum Zinghtung Lu Awng ni rai ma ai. (33) Mama Mary Lasha Roi Hkawng

RVA Rung kaw magam gun na matu wunkat la ai mahkrun lam hpe gaw, RVA Ginjaw, Philippine kaw na, ginjaw magam gun ni lajang ya ai rai nga ai. Raitim, ya hpang daw de gaw masa lam amyu myu a majaw, dai ginjaw rung kaw na n lajang lu wa ai lam ni mung nga wa ai. (5) lang ngu na sharin hpawng gaw hpang jahtum rai sai lam mung n dau da ma ai. Dai (5) lang ngu na online training hpe gaw laiwa sai shaning 2020 February hte March shata hta hpaw lai wa sai rai nga ai. Dai ginjaw kaw na hpaw ya ai sharin hpawng hta sharin hkam la ai ni hpe sha, ginjaw kaw na shata kumhpa hpe jaw ai rai nga ai. Lung ai masha law ai Service hpe gaw magam gun yawng hpe shata kumhpa n jaw ai. Asia Dan hta RVA Shiga Shapoi Dap hpe baw sang myusha ga hta hkan nna hpaw da ai “RVA Language Service” (22) nga ai rai nga ai. Dai hta English ga hte shapoi ai RVA website mung lawm ai. Baw shang myusha ga hte shapoi ai magam dap langai kaw na RVA magam gun law dik htum marai (4) a matu sha shata kumhpa madi shadaw ma ai rai nga ai. Anhte RVA Kachin Services hta myusha baw shang ga masum hte shapoi nga ga ai, (1) RVA Kachin-Jinghpaw, (2) RVA Kachin- Lisu, hte (3) RVA kachin-Rawang ni rai nga ai. RVA Jinghpaw shiga shapoi dap kaw magam gun marai (8), RVA Lisu shiga shapoi dap kaw magam gun marai (7), RVA Rawang shiga shapoi dap magam gun marai (5) rai ga ai. Shiga shapoi dap langai kaw na magam gun marai mali (4) a matu sha, ginjaw kaw na shata kumhpa garum madi shadaw ai. Marai mali hta na jan ai ni hpe gaw buga kaw na hte RVA shiga madat ni e shawang tsaw ra myit hte jaw bang ai alu ni hpe kumhpa shatai nna jaw ga ai.

Anhte RVA Shiga Shapoi Dap shagu hta “Local Governing Board (LGB)” ngu ai myusha ga hpan hta hkan nna nga ga ai. Anhte RVA Jinghpaw, Lisu, hte Rawang, hte masum a Local Governing Board hpe langai sha tawn da ga ai. Dai “Local Governing Board of RVA Kachin Services” (LGB-RVA-Ks) hta lawm ai malawm ni gaw Jinghpaw wupawng Saradaw ni, Myitkyina, Manmaw, Lashio Saradaw Ginwang na Ginwang Up Saradaw ni, RVA Jinghpaw, Lisu, Rawang ni hta Coordinator lit magam gun Wa Jau ni, Myitkyina, Manmaw, Lashio Saradaw Ginwang masum kaw na Social Communication lit magam gun Wa Jau ni, bai dai sasana masum kaw magam gun nga ai dakkasa mama ni hte Saradaw Ginwang kaw na Laksan lata san da ya ai Hpung myitsu salang lahkawng hpra lawm ga ai. RVA ginjaw, Philippine kaw magam gun nga ai, Asia Dan ting a Saradaw Hpawng Kaba a rung hte seng ai kaw lit la ai, FABC-OSC a sacretary, RVA program director, hte RVA manager ni mung malawm hta lawm ai.

RVA Kaw magam gun na masha hte hkringsa na lam hte seng nna gaw dai RVA Shiga shapoi dap a lit hkam, Coordinator, kaw tam shagawn masam maram la ngut ai hpang, “Local Governing Board” de tang shawn ra ai. Dai LGB kawn masam maram nna daw dan ya ai rai nga ai. Dai zawn galaw ngut jang she jahkring mai ai, lit shatsam mai ai rai nga ai. Shabrai hpe mung dai LGB ninghpum hpung kaw nna sha masat da ya ai rai nga ai.

Machye machyang hte seng nna gaw Shiga la shiga shapoi ai hte seng ai, laika ka hkrang masa ni, nsen bang, nsen hpe daw shatsawm ai, audio editing hte Video editing ni, Online, Website hte seng ai lam ni, RVA a website, yuptube, instegram, twitter, facebook page mahkrun lam ni hte rip kawp tara ni, RVA kaw na shapoi taw ai lamang hte seng ai ni hpe laika ga hte ka chye ai, madung gaw jinghpaw ga hte shapoi ai re majaw jinghpaw ga hte laika chye shaga chye ai ni rai ra ai.

Ga San hpe htai ya let Shiga madat nu wa ni hpe garum hpyi mayu ai gaw RVA Shiga Shapoi Dap kaw nna ndau shapoi ya nga ai lamang ni hpe hkap madat nna, ra rawng ai lam ni hpe CB hta mung, magam gun ni hpe matut mahkai nna mung, shadum sharai ya mai ai. Alu Ja gumhpraw hte garum la na hpe mung hpyi shawn mayu nngai. RVA ginjaw kaw nna garum ai shata kumhpa gaw marai mali a matu sha rai nna, kaja wa magam gun nga ai ni gaw marai matsat (8) rai ga ai majaw mung, kaga RVA hte seng ai magam ni hpe galaw ai hta ra ahkak ai arung arai, hkawm sa hkawm wa lam ni a matu mung grai naw ra ahkyak nga ga ai. RVA hte seng nna kata lam chye mayu jang mung Rung kaw magam gun ai anhte kaw sa du san la mai ai lam shana let ga san hpe ndai kau jahkring na nngai.