RVA De, Laika Bang Ai Ni Hte, Shapoi Ai Mayak Ni, Bai Myitkyina Saradaw Ginwang Kata, Hpung Masha Kade Nga Ai Kun?

 (1) RVA de laika ka ai ni n law ai majaw rai kun? Shing n rai, akyu n rawng ai laika ni sha law shang wa ai kun? Marai Manga/kru ni ka shana ai lam ni sha lu madat ai. (2) Myitkyina Saradaw Ginwang kata hta Kahtawlik Hpung Htinggaw gade, hpung masha gade nga ai kun chye mayu ai. Muse Jau Ginwang, Nam Hkam mare, Mung wi buga, Pying Hkam lawk kawng nga nna, Ya ten, Myitkyina PLN (1) kaw du taw nga ai Sara Luka Lasang Brang Tawng a ga san hpe htai ya na n ngai.

Htai: RVA de laika ka bang ai ni hte RVA shiga madat nga ai nu wa hpu nau ni yawng hkam ja nga mu ga! Shawng ningnan shakram akyu hpyi ya nngai. RVA de laika ka ai masha gaw mala la n law ai mung gaw n rai nga ai. Ram daw gaw law ma ai. RVA de laika ka ai ni hta buga ndau, hpaji jaw, ga san ga htai lam, mahkawn kumhpa hpyi, ndau laika, hte yawn lahpu laika zawn re ai ni yawng gaw, Shiga madat ni hte nawku Hpung masha ni bang ai laika ni rai nga ai. Ndai gaw RVA magam gun ni hte shiga madat ni a matut mahkai, mahkri shawn magam rau gun nga ga ai lam rai nga ai.

RVA de laika bang ai hta na langai gaw san ga mahtai lu na sa ga pandung du na ngu ai ga baw hte shang wa ai laika rai nga ai. Ndai laika ni hpe mung law law lu la ga ai. Raitim, hti ya ai hta mung, shapoi na aten mung masam maram nna htai shapoi ra ai majaw gaw, laika bang ga san san ai wa hkum nan myit mada ai aten hkan n lu shapoi ya ai rai nga ai. RVA de shang ai laika ni hta na shawng du shang wa ai laika ni hpe madung ahkyak la shapoi ya na hku nna mung masin jahkrat da ai majaw mung rai na re.

Ga san san ai laika ni hpe masam maram yu yang mung ga san san ai masha gaw nau n law ma ai hpe mu lu ai. San ai ni mung kahtap kahtap nna bai san ai lam ni mung nga ai hpe mu lu ga ai. Ga san san ai ni a ga san bung ai hpe mung mu lu ga ai. RVA de bang ai laika n du shang wa ai mabyin ni mung nga ai hpe maram lu ai. Nkau ga san ni gaw hpu nau ni hpe hkra machyi shangun ai ga san, jahprak ai ga ni lawm ai ga san, shawng de htai lai wa sai ga san, zawn re ai mung mu lu ga ai. Ndai zawn re ai ni hpe bai masam maram tam sagawn jahtuk la na matu aten ni mung law law la ra ga ai. Ndai ga san hpe htai ai aten hta n htai lu shi ai ga san 100 daram naw nga nga ai hpe maram yu yang ga san ai ni gaw ram daw law nga ai. Htai ya ai wa mahtang htai n dang rai nga ai hte san htai lamang shapoi ai aten mung n law ai majaw rai nga ai. Bai, langai mi gaw, San htai lamang gaw kaga lamang hte shingdaw yang grau yak ai gaw, dai san htai lamang hpe lit la ai wa hkum nan machye machyang n law yang grai sawk sagawn la ra ai, grai san la ra ai lam ni nga nga ai. San htai lamang hpe gaw mai byin yang Nawku hpung machye machyang hte seng ai hta shi ga baw ginlam hte shi kung kyang ai ni, mungkan hte seng ai, htunghking hte seng ai kung kyang ai masha ngau law law tawn da ra nga ai. Dai n rai yang marai langai sha htai na ngu ai gaw dai wa a matu grai nan yak hkak nga ai. Garum hpyi na matu mung kumhpa shabrai masat masa galaw ra nga ai. Alu atan fund n nga yang chye chyang kunghpan ai ni hpe garum hpyi na matu masan n sa byin nga ai. Ndai san htai lamang hpe kaja dik jahtuk shatsawm galaw sa wa na ladat ni hpe RVA ninghpum salang ni hpe mung tang sawn wa na masin nga ga ai.

RVA de ga san san ai ni hte shiga madat nu wa ni hpe hpyi lajing mayu ai gaw dai zawn ga san hte seng nna mung RVA lamang kaga ni hte seng nna mung kung kyang ai ni hpe garum hpyi shapoi lu na matu alu atan ni hpe laksan hku jaw bang mai ai lam garum hpyi let hpawn shana ya mayu nngai.

Myitkyina Saradaw ginwang hta Kahtawlik Hpung htinggaw 16,865, hpung masha 96,293, rai nga ai. Ndai jahpan gaw 2020 shaning na hpung jahpan rai nga ai. Ndai kaw langai mi tsun dan mayu ai gaw, Hpung htinggaw hte hpung jahpan hpe hta ai shaloi, hta ya ai buga sara ni hkrak hta ai n hta ai ngu ai gaw dai hpung masha jahpan hta ai lit hkam sara wa hta sha hkan na re ngu tsun mayu ai. Ga san hpe ndai hte mi hte htai ya dat nngai.

 

By Fr. Patrick Gawmaw Hkawng Yae

Add new comment

8 + 2 =