Pranwan Ladaw Laban 23, 2018 (B)  Karai Kasang a Mungga

Chyum Mungga Daw I -  Esaia  35: 4- 7;   

Chyum Mungga Daw II  - Yawhan    2: 1- 5;  

Kabu Gara ai Shiga -        Marku  7: 31- 37

Anhte a hkum hkrang na mi, na ngu ai ni gaw anhte a hkrum hkrang hte shing gan mung kan lapran matut mahkai ya ai matut mahkai lam ni rai nga ai. Mu lu shangun ai mi madaw kun, shing nrai na lu shangun ai na madaw kun, gara madaw she grau ahkyak nga ai ngu nna tsun daw dan na matu chyawm gaw yak la nga ai.

Anhte na la lai wa sai kabu gara ai shiga hta na masha wa gaw na lahpang nna, ma-a ai masha wa rai nga ai. Shi a hkum tha byin nga ai nhkum tsup ai masa hpe mung shi atsawm sha chye nga ai masa rai nga ai. Na lahpang ai masha ni gaw ga mung ma-a ma ai, nchye shaga ma ai nga nna mung tsun ma ai, hpa majaw nga yang masha ni tsun shaga ai ga ni hpe nna yu ai majaw gara hku nsen shapraw na mung shanhte nchye ma ai re nga ai. Dai re majaw ndai chyum laika na na lahpang ai masha wa mung Madu Yesu hpang de shi hkrai sit sa nna shi hta byin nga ai lam ni hpe tsun sang lang dan nna, garum hpyi na matu pyi shi n galaw lu nga ai, shi hpe tsawra ai, shi a mabyin hpe myit tau matsan dum ai masha nkau mi madaw, shi hpe Madu Yesu hpang de woi sa wa nna lata mara ya na matu sa hpyi nem ya ai, nga nna ja chyum mungga hta mu lu nga ga ai. Madu Yesu mung shi hpe shawa hpawng kaw nna shaga shapraw mat wa nna tsi shamai ya lai wa ai. Shi a na na wa hkra shamai ya ai zawn, asan sha tsun shaga lu hkra mung Madu Yesu tsin shamai dat ya ai lam kabu gara ai shiga hte na lu saga ai rai nga ai.

Tsawra ai nu wa hpu nau ni, Madu Yesu hta tsawra mastan dum lama ai myit masin rawng nga ai ngu ai lam gaw anhte a matu hpa mau shara nrai nga ai. Anhte myit dum ra na lam gaw ndai na lahpang ai masha wa zawn sha, anhte hkum shagu mung nhkum ntsup ai ra rawng ning ra ai prat masa hte nga lai wa ai ni, hkrum lai wa yu ai ni hkrai rai ga ai ngu ai lam rai nga ai. Anhte hta byin ai lam gaw ndai na lahpang ai masha wa zawn hkum hkrang hte seng ai mi, na ni nkaja ai masa gaw rai yang she rai na ga ai, grau nna Wenyi hte seng ai mi na ni nkaja ai masa she rai nga ga ai. Anhte hkum shagu kashin kamun sacramentu hpe garai nhkam la lu shi ai aten hta anhte mung wenyi hte seng ai na lahpang ai ni anhte rai ga ai. Makam masham ngu ai chyeju kum hpa garai nlu la ai masa aten rai nga ai. Na lahpang ai masha gaw kaga masha ni tsun shaga ai ga ni hpe nna lu ai, shi hkum nan mung tsun shaga lam nlu galaw nga ai masa zawn sha, kashin gamun sacramentu nhkam la lu shi ai anhte makam masham kum hpa mung nhkam la lu shi ga ai majaw, Karai Kasang anhte hpe tsun shaga ai ga ni hpe anhte nna lu ga ai hte anhte hkum nan mung Karai Kasang hpe anhte tsun shaga ra ai masa hte hkrak  tsun shaga nchye ga ai rai nga ai.

Makam masha ngu ai gaw Karai Kasang jaw ya ai chyeju kum hpa kaba rai nga ai rai tim, madat na la lu ai kaw nna hkam la lu ai lam rai nga ai. Na la lu ai kaw nna ngu ai rai tim hkum hkrang hte seng ai na hta shang wa ai nsen hpe tsun ai nrai, kashin kamun hkam la ai shaloi lu la ai chyeju kum hpa hku nna lu la ai makam masha rai nga ai. Grau nna Missa hkungga nawng ya nga ga ai shaloi makam masham na hte madat hkam la lu na ahkaw hkang law law anhte lu la nga ga ai. Missa hkungga hta makam masha hpe na madat la lu na nam bat langai ngu na lam gaw ja chyum mungga ni hpe atsawm sha madat hkam la ai lam re ngu ai hpe anhte myit dum ra ga ai. Dai zawn sha makam masha hpe na madat la lu mai ai ahkaw ahkang kaba ni law law mung Missa hkungga hte nga nga mali ai, ga shadawn, mungga htawn ngu ai hpang na anhte a makam masha hpe shapraw shaleng ai Credo mahkawn, bai kaga nawku mahkawn ni, akyu hpyi ga ni, grau nna missa hkungga akyu hpyi ga daju ni rai nga ai. Anhte kam sham ai lam hpe anhte a akyu hpyi ga ni hku nna shaleng shapraw ga ai mung rai nga ai.

Raai tim mung tsawra ai nu wa hpu nau ni, makam masham ngu ai gaw, Karai Kasang hpe anhte tsun shaga ra ai, tsun shaga gying ai masa hte anhte tsun shaga lu ai lam ni nnga ding sa, shi Madu hpe nawku daw jau ra ai masa hte hkrak anhte nawku daw jau ai lam ni n galaw lu ding sa gaw, anhte a makam masha n hkum tsup shi ai ngu ra na rai nga ai. Nawku hpung a nawku daw jau ai lam hta mung ahkyak ai yaw shada ai lam kaba lahkawng rawng nga mali ai, nam bat langai ngu na hta nawku daw jau ai lam ngu ai gaw makam masha hpe sharin shaga ya ai, lahkawng ngu na hta, nawku daw jau ai lam gaw Karai Kasang hpe shakawn shagrau ai lam galaw lu na matu htap htuk ai ga si ga nagau ni hpe jaw ya ai lam rai nga ai. Madu Karai Kasang shi a lam hte seng nna shing gyim masha ni hpe shi hpaw tsun dan ai lam ni hpe anhte ga si ni hte shi hpe bai tsun ai lam gaw anhte a nawku daw jau ai lam nan rai nga ai.  Grau chye na hkra bai tsun ga nga yang, ga shadawn nawku daw jau ai lam hta anhte Karai Kasang hpe chyeju dum chye htang ai lam galaw ga ai ngu ai shaloi, anhte hpe Karai Kasang shi jaw ya sai, jaw ya nga ai, jaw ya ai na shaman chyeju hkum tsum hpa hpe, anhte shi Madu hpe bai tsun shapraw dan ga ai rai nga ai. Kabu gara ai shiga hta Madu Yesu shi galaw lai wa sai mai kaja ai lam ni hpe bai ka matsing nna Madu hpe shakawn shagrau ai lam galaw ai, gashadawn Madu Yesu myi kyaw ai ni hpe mi mu shangun ai, na lahpang ai wa hpe na bai na shangun ai, ngu ai lam ni rai nga ai.

Bai ga shadawn langai mi gaw, missa hkungga daju daw masum akyu hpyi ga hta, “Wa Karai Kasang e, nang chyoi pra nga ndai rai nna, nga yawng nga pra ai shakawn kung dawn ai hte gying dan nga ndai, anhte a mdu hkrsitu a marang e chyoi pra ai wenyi a atsam hte nang Madu nlang hte hpe asak jaw nna shachyoi shapra ya ndai” nga ai akyu hpyi ga hpe mu lu nga ga ai. Karai Kasang gaw chyoi pra san seng ai lam a npawt daju, asak Madu re ngu ai lam hpe shi Madu Karai Kasang hkum nan hpaw tsun dan ai lam ni a majaw anhte chye ga ai rai nga ai. Ndai shi hpaw tsun malang dan ai teng man ai lam ni hpe bai tsun nna shi Madu hpe anhte shakawn shagrau ai, Shi Madu hpaw shaleng ya lai wa sai shi a mung sung lam ni, hpung shingn kang hte seng ai lam ni, shi Madu galaw ya lai wa sai lam ni hpe akyu hpyi ga shatai nna shi Madu hpe bai tsun nga ai lam ni rai nga ai. Dai re ai majaw, Madu Karai Kasang shi a lam hte seng nna shing gyim masha ni hpe shi hpaw tsun dan ai lam ni hpe anhte ga si ni hte shi hpe bai tsun ai lam gaw anhte a nawku daw jau ai lam re ngu nna tsun ai rai nga ai. Shakawn kung dawn ga ni mung maren sha rai nga ai, ga shadawn Shakawn kung dawn 146: 6-7 hta “shi gaw sum sing lamu hte gin ding aga, nammukdara hte dai hta rawng marawng a hpan wa ning sang rai nga ai, shi gaw htani htana sadi sahka adung nga ai, nni nkri hkrum ai ni hpe shi tara dara ya wu ai, hku hku hkrum ai ni hpe lu sha sha hpa jaw ya wu ai” nga ai. Ndai shakawn kung dawn ga ni mahkra gaw Karai Kasang shi a lam hpe hpaw tsun dan ai lam ni rai nga ai zawn anhte a akyu hpyi ga nan mung rai nga ai.

Hkrak nga yang Madu Karai Kasang shi kade daram mai kaja, hkyik hkam nga ai, shi Madu galaw ai magam bungli ni gaw kade mau hpa rai nga ai, ngu ai lam hpe anhte shing gyim masha hku nna shi Madu hpe tsun shadum la ra shara nra nga ai. Raitim mung anhte shing gyim masha ni shada da kanawn mazum nga ga masa hta pyi, shada da galaw ai mai kaja ai lam ni hpe tsun shagrau ai lam galaw chye ga ai. Ga shadawn manang langai ngai shi dum a ntsa de shaga na shat daw jaw ai rai yang, shi shadu kachyawng da ai shat maw shat mai malu masha ni kade mu ai lam tsun shakawn chye ga ai rai nga ai. Karai Kasang gaw anhte a matu lam magup hta kaja dik ai masa galaw ya ai. Shi a lam hte seng nna shi Madu hpaw malang tsun shapraw dan ai lam ni hpe bai tsun shapraw nna shi Madu hpe nawku daw jau ai lam galaw ai gaw kaja dik ai nawku daw jau lam rai nga ai zawn, shi Madu hpang de anhte akyu hpyi sit shang ga ai shaloi mung anhte tsun gying tsun ang ai ga si ni tsun lang nna akyu hpyi ai lam gaw kaja dik ai akyu hpyi ga rai nga na rai nga ai. Dai re ai majaw shi Madu hpaw malang tsun shapraw dan nga ai shi a mai kaja ai mung sung lam ni hpe anhte na la lu u ga, kabu gara ai shiga hta na na lahpang ai masha wa a na hpe Madu Yesu tsi shamai ya ai zawn anhte a makam masham na ni hpe mung shi Madu shamai ya na anhte ra nga ga ai. 

Akyu hpyi saga: Wa Karai Kasang e, nang gaw hkye hkrang la ai chyeju hte na a kasha shatai la ai asak ning sang anhte hpe kum hpa jaw ya nit dai, Madu Yesu hpe kam sham ai ni gaw shut hpyit mara a lit hta na lawt lu nna nhtum nwoi sali wunli hkam la lu na matu, nang tsawra ai kasha ni anhte hpe n gaw nwoi ai myit hte yu lajang shamai shatsai ya rit anhte a Madu hkristu a marang e hpyi nem nga ga ai.AMEN.

Fr.Bernard Dashi Tang Ji