Noricum Mare na San Pra ai Severinus a Poi Nhtoi (January 8) 08 January 2023

Noricum Mare na San Pra ai Severinus a Poi Nhtoi (January 8)

San Pra ai Severinus gaw, Austria Mungdan, Noricum mare kaw, lai wa sai A.D 410 ning hta shangai chyinghkai wa ai rai nga ai. Shi a kanu kawa ni gaw, lusu nga pyaw ai ni rai nga ma ai. Raitimung, shi gaw matsan mayan rai nga nna ru yak jam jau hkam ai lam ni hpe myit ra sharawng ai wa rai nga ai.

Shi a prat tup hta mayak mahkak jam jau hkrum let sak hkrung lai wa sai rai nga ai. Shi gaw, ginhtawng ta hte n-shung ta hta palawng htap mi sha bu hpun ai; hkyepdin n din ai, lani mi shata ma mi sha ai; buri langai sha nep nna up ai; asim sha nga nna, myit sumru yu let, akyu hpyi shaja lai wa ai. Shi hkrai sha nga chye ai zawn shawa wuhpung hte rau mung nga ai lam ni hpe mung manu shadan ai wa rai nga ai.

Shi gaw, Noricum mare kaw nga ai, Roma amyu sha ni hpe yu gawn ai lit hpe gun hpai lai wa sai rai nga ai. Masha hkansa tara hpe atsawm sha shatup nna sak hkrung nga lai wa ai masha langai mi mung rai nga ai. Jau jawng law law kaw Jau kaba lit hpe mung gun hpai lai wa ai San Pra ai Jau mung rai nga ai.

Wa Jau Severinus hte manang Jau ni gaw, matsan ai ni, machyi makaw hkrum ai ni, ruyak jamjau hkrum ai ni hpe yu gawn ai lam hta grai mying kaba ma ai. Ruyak Jam jau hkrum ai ni hpe hkam sharang ai, tara shatup ai, kasi kaja hte hkaw matsun ai majaw, masha law law shi a kasi hpe hkan sa shatup nna makam masham lam hta shakut lai wa ma ai. San Pra ai Severinus tau hkrau kawn tsun da ai ga ni, madun ya ai lamik kumla ni hpe Nawku Hpung Hkap la nna, madi shadaw ya ai.

Austria Mungdan, Astura mare masha ni makam masham hpe n kaw n law di galaw ai majaw, Hun amyu sha ni a lata de du mat wa ai lam shi tau tsun da ai hte maren byin mat wa sai rai nga ai. Hku wa kaba hkrum ai Danube mare masha ni hpe mung shi hkye la ya lai wa sai. Danube hka makau kaw na, Faviana mare masha ni hpe shanhte galaw kau sai shut hpyit mara ni a majaw, ruyak jamjau ni hpe hkam sharang na matu shadut ya sai.

Dai zawn rai Wa Jau Severinus Shi shadum ai hpang kade nna yang, Danube hka kau kaw na hka ge tawng gaw, byawng mat nna Danube hka bai lwi mat wa lu sai. Ndai mabyin ni a majaw, San Pra ai Severinus hpe mau hpa madun ya lu ai San Pra ai Masha ngu nna Nawku Hpung masat shagrau ya sai rai nga ai.

Nawku hpung gaw, shi n nga mat ai hpang, shi hpe San Pra ai masha dang dat nna, shi a Poi Nhtoi hpe mung, January shata (8) ya shani masat shagrau ya ai gaw, daini na aten du hkra rai nga ai.

San Pra ai Wa Jau Severinus a labau kadun hpe hti hkaja la nna, anhte a prat hta mung, tinang dinghta ga ntsa sak hkrung nga ai laman hta, mai kaja dik ai hte sak hkrung hkawmsa lu na atsam jaw ya rit ga matu, akyu hpyi la nga ga law.

By; Sister Rose Angeline Maran Nang Doi (SFX)

RVA-Kachin Service (Myitkina)