N'kaja Ai Hku Lu La Ai Ja Gumhpraw Alu Hte, Mai Kaja Ai Hku Lu La Ai A Lu A Lam

: Anhte hpung masha nkau mi gaw makam masham lam hta rai tim mung alu atan hta rai tim mung shakut shaja ai hte alu ni hpe mung law law lu bang nna gum hpraw hpe gaw masha ni hpe dip lu dipsha ai hte n hkru nkaja ai nam hpan ni hpe dut lu dut sha rai nna lu la ai gum hpraw hpe alu law law bang ai den re ni gaw mara kaba ai kun n kaba ai kun bai nna alu hpe karai kasang gaw hkap la na kun chye mayu ai wa jau chyeju hte htai ya rit wa jau. Muse jau aseng den (105) kaw shanu nga ai Francisca ying sawng a ga san hpe htai ya na nngai.

 Alu Atan bang ai, alu atan galaw ai gaw, shinggyim nau na shada tsaw ra matsan dum garum shingtau ai sakse mung rai, Karai Kasang sharawng awng ai tsaw ra rapra ai magam galaw let Karai Kasang hpe shakawn shagrau myit dik lam jaw ai mung rai nga ai, nga nna Kahtawlik Nawku Hpung a Tara Laika sharin shaga ai hta laika, “Catechism of the Catholic Church (CCC) Masat. 2462 hta sharin shaga da nga ai.

“Alu” ngu tsun ai shaloi, nawku hpung alu, htam shi alu, laban alu ni hte kaga ga baw law law hte re ai alu hte seng ai lam hpe chyahkring hkring na lu ai, bang ra nga ga ai. Dai zawn rai ga baw law law hte shamying da ai mung Nawku Hpung kawn ra kadawn ai hpe mu mada ai majaw tara shang hta ai lam ni nga wa ai rai nga ai.

Saradaw Ginwang hta Ginwang Up Saradaw e masat da ya ai alu atan ga baw hta lai nna tinang buga ginra kaw ra ai hta hkan nna kaga alu hta ga baw ni hte n mai hta ai rai nga ai. Saradaw Ginwang kaw nna masat da ai hta lai nna, kaga ga baw hte hta na rai yang Ginwang Up Saradaw a ahkaw ahkang hpe hpyi la ra ai rai nga ai. Saradaw Ginwang kata, Jau Ginwang shagu hta nga ai alu atan ga baw hta lai nna hta ai lam ni mung nga chye ai. Dai zawn re ai alu atan ni hpe hta na rai yang gaw Ginwang Up Saradaw hpe shana, jahkrum bawngban, ahkang hpyi nna ahkang lu jang she hta yang gaw kaja dik rai nga ai. Saradaw Ginwang kata hta lahkawn taw ai alu atan ga baw grai law ai majaw dai nga taw ai alu atan ga baw hte pyi nawku hpung masha ni hpe myit um ang, myit shut, kam shut ai lam ni byin shangun chye nga ai.

Shawang tsaw ra myit hte alu atan galaw ai lam yawng gaw Karai Kasang hte seng ai, Karai Kasang sharin shaga lam matsun ya ai hta Karai Kasang hpe tsaw ra ai, htingbu ni hpe tsaw ra ai, ra kadawn ai ni hpe tsaw ra ai magam galaw let Karai Kasang hpe tsaw ra lam madun ai sakse rai nga ai (CCC. 1822).

Karai Kasang a kashu kasha ni anhte gaw htingbu ni, ra kadawn ai ni, kaji htum re ai ni hpe Karai Kasang a shawang tsaw ra myit hte garum shingtau ya na lit nga ga ai rai nna, hpu nau ni a ntsa amyat htuk, dip lu, dip sha, ahkaw ahkang la ai lam ni n mai galaw ga ai (CCC. 1932).

Tsun mayu ai gaw n tara ai hku n galaw ai rai nga ai. Tara ai hku lu la ai hpe shawang tsaw ra myit hte alu atan galaw ai gaw Karai Kasang a man e manu dan dik htum kumhpa tai nga ai. Tara ai hku lu la da ai rai tim pyi, shawang tsaw ra myit n rawng ai rai yang gaw Karai Kasang n hkap la ai chyum laika sakse ni nga nga ai. Ca-In hte Abela yan nau a labau sakse rai nga ai. Ca-In gaw shi lu da ai si mai si maw ni, Karai Kasang kaw wan nat hkungga nawng jau ai shaloi, shi a myit hta Karai Kasang hpe kaja ai, tsawm ai si mai si maw kumhpa n kam jaw ai, n kam nawng jau ya ai. Dai zawn re ai myit a majaw Karai Kasang n hkap la ya ai.

“Nanhte a yi hkauna hta na nai mam ni shu la yang, njut nnaw shingnawm hkan tu ai nsi naisi du hkra dan la lu na n rai; hkauling hta na ngam ai nlim hpe mung bai nhtang gut la lu na myit dai n rai. Nanhte a sabyi sun hta na nlum mung bai di lu na myit dai n rai; shi hkrai hkrat mat ai hpe mung hta la lu na myit dai n rai; dai gaw matsan mayan re ai ni hte hkrun lam hkawm sa ai manam ni a matu ngam da ya lu na rai myit dai. Ngai gaw dai Madu nanhte a Karai Kasang rai nga nngai,” nga nna Jaw Jau Laika 19:9-10 hta hkang da ai mu lu ga ai.

“Matsan mayan ni hpe nang dip gamyet sha ai rai yang, shanhte hpe hpan da ai Karai Kasang hpe nang n gawn n sawn di nga ndai; rai ti mung, matsan mayan ni hpe matsan dum myit madun ai chyawm gaw Madu hpe nawku daw jau ai lam rai nga ai, nga nna Ga Shagawp Laika 14:31 hta mung hkang da nga ai.

“Matsan mayan wa a hpyi jahtau ai nsen hpe nang n madat ai rai yang, nang hpe karum la na matu, na a hpyi jahtau ai nsen hpe, kadai mung na ya na ra ai n rai,” nga nna Ga Shagawp Laika 21:13 hta Karai Kasang matut shadum da nga ai.

Matsan mayan ni kaw na atu amyat n la na matu shadum da ai, matsan mayan ni hpe tinang a dum nta hta hkap la nna shanu shingbyin shangun na matu mung tsun shadum da ai (Jaw Jau 25:35). Matsan mayan ni hpe karum la na matu mung shadum da ai (Tara Jahprang 15:7). Mai kaja ai wa gaw galoi mung hkrat sum mat na n rai; dinghpring dingman ai wa hpe Karai Kasang galoi mung adum nga na ra ai (Sk.Kd 112:5-9). Kawsi hpang gara ai ni hpe nang lusha jaw ai rai yang, na a nhtoi gaw nsin hta htoi tu nga na ra ai (Is 58:10).

“Ndai ngai nau ni hta na kaji htum ai wa langai mi hpe nanhte galaw ai gaw, nanhte ngai hpe galaw manit dai rai nga ai,” (Mt 25:40).

Luka 16:19-31 hta sahti wa hte Lazaru a lam hpe sumru yu yang, Karai Kasang man hta matsan mayan ni hpe karum shingtau jaw lu jaw sha, manam shara jaw, bau sin makawp maga na gaw grai nan ahkyak ai rai nga ai.

Gaida jan a alu gaw lu su ai ni a alu hta grau law ai lam hpe mung Lk 21:1-4 hta anhte mu lu ga ai.

“Marai langai ngai nang kaw lama ma hpyi yang jaw u; marai langai ngai nang kaw lama ma hkoi shap mayu yang hkoi shap ya u,” (Mt 5:42).

“Nang lu malu dut kau nna matsan mayan ni hpe garan jaw u; shing rai jang she sumsing lamu ntsa e nang sutgan lu na rin dai,” (Lk 18:22).

“Sut gan lu su ai wa rai nga da nhtawm, shi a hpu nau wa matsan mayan ra kadawn nga ai hpe mu ninglen, shi a matsan dum ai myit masin hpe pat kau wu yang gaw, shi gaw Karai Kasang hpe tsaw ra ai ngu nna kaning rai tsun lu na a ta?,” (1Yh 3:17).

2021 shaning, September 19, laban ya shani, Madu A Lamu Kasa Akyu Hpyi Ga tsun ngut ai hpang, Wa Sarabyin Francis mungga hkaw tsun ai hta, daw jau ai magam ngu ai gaw ma ni zawn kaji kadun ai ni hpe daw jau ai magam rai nga ai; daw jau magang chyeju hkam la lu magang rai nga ai; Karai Kasang gaw mungkan ga na hkithkam ai, arawng aya kaba ai, sut su ai lam ni hpe yu nna n daw dan ai; Shi gaw anhte a daw jau ai magam hpe yu nna she daw dan ai, ngu tsun da ai.

Alu atan bang ai, alu galaw ai ngu ai gaw ra kadawn ai ni hpe daw jau ai magam nan rai nga ai.

Alu atan galaw ai ngu ai hta mung mungkan sawn hpa masat ni hte n shingdaw da nga ai. Alu atan galaw ai wa a myit masin, myit masa gara hku nga ai, gara hku yaw shada ai hpe madun yu nna she daw dan ai hpe mu lu ga ai.

Anhte galaw ai magam shagu hta ahkyak dik gaw, myit kraw kata hta san seng chyoi pra, dingman dinghpring ra ai.

Hpu nau wa san ai dip lu dip sha, nang hpam dut mari, n tara ai hku lu la ai ja gumhpraw hpe alu shatai nna alu law law jaw bang ai ni mara kaba ai, n kaba ai gaw dai zawn galaw ai wa a myit masin, yaw shada lam hte Karai Kasang a lapran rai na re. Wa Jau hku nna gaw mara kaba ai, n kaba ai, dai alu hpe hkap la na n hkap la na, ngu ai hpe gaw hkrak daw dan mahtai n jaw lu ai.

By Fr. Patrick Gawmaw Hkawng Yae