"Ngai Gaw Asak Muk Rai Nngai" - Karai Kasang A Mungga

Tsaw ra ai nu wa hpu nau ni e, ndai laban gaw Pranwan Ladaw hta (18) ngu na laban rai nga ai.

Lai wa sai laban hta Yesu Madu a Mungga sa madat hkam la ai ni a matu malu masha lajang ya ai lam hpe na lu sumru la lu saga ai.

Ndai laban na Kabu Gara Shiga hpe sumru yu ga. “Yesu gaw, Asak muk gaw ngai rai nga nngai, ngai hpang de sa ai wa gaw kawsi hkrum na n rai, ngai hpe kam sham ai wa mung, galoi mung hpang gara hkrum na n rai,” (Yh 6:35).

Yesu Madu hta dingman dinghpring ai myit hte kam sham ga ai rai yang anhte hpe Shi a Hkum hpe malu masha hku jaw ya na hpe tsun ai rai nga ai.

Karai Kasang Gaw Nam Maling Hta Israel Myu Sha Ni A Matu Malu Masha Lajang Ya Ai

Karai Kasang gaw Mawshe a marang e, Israel myu sha ni hpe Egutu mung kaw Pharoah hkawhkam a mayam prat kaw nna shalawt ya lai wa ai. Mawshe hte rau panglai hkyen hpe lai di kau da let Karai Kasang ga sadi jaw da ai Canan mare de hkrun lam hkawm nga ma ai.

Dai hkrun lam gaw loi la ai hkrun lam gaw n rai nga ai; malu masha taw ai; hpyen law ai; hku hku ai; ana zingli law ai; machyi makaw kaba ai; dingbai dingna law ai; shingra tara hpyen kaba ai rai nga ai.

Dai zawn re mayak mahkang ni law law hkrum sa ra ma ai majaw Karai Kasang hte Mawshe hpe aput angun di ma ai.

Raitim Karai Kasang gaw shanhte hpe n kabai da ai; lamu de nna Manna muk hpe jahkrat ya let lusha jaw ai. Rim la loi ai u ni hpe jaw ai; shinggyim masha ni hta ra kadawn ai malu masha hpan hkum hkra jaw ai; lu hka taw nna hpang gara ten hta lu hka hpe jaw ya ai (Pru mat 16:13-15; 17:1-7).

Shanhte ni Karai Kasang a chyeju hpe n gawn n sawn di ma ai; chyeju n htang ma ai; hpang jahtum kaga karai kasang shaje hpe nawku ma ai.

Hkrun lam hta 40 shi ning na ma ai. Dai shaning ni hta Israel myu sha ni yak hkak jam jau hkrum ma ai; Karai kasang hte Mawshe hpe aput angun di ma ai; Mawshe gaw lapran kaw nna kasa tai ya ai; Karai kasang gaw shanhte hpe galoi mung yu lakawn lai wa ai hte lusha hpe jaw ya ai; lam woi ya ai. Shanhte ni Karai kasang hpe gade mi shut hpyit ma ai rai tim, Shi kaw bai n htang wa na ra sharawng nga ai.

Yesu Madu Gaw Shanhte Hpe Sharin Shaga Na Lam Langai Hpe Lajang Da Ai

Yesu madu muk hte nga hpe shalaw nna shi a mungga madat hkam la na matu sa du ai ni hpe jahkru shakat ya ai. Dai muk hte nga hpe shalaw nna shawa masha ni hpe jaw sha ai aten gaw shana jan shang wa aten rai nga ai. Mungga hpe myit shang sha ai shawa masha ni gaw dai lusha sha na ahkying aten ngu ai hpe malap kau ma ai. Yesu hpe hkawhkam tang na myit nga ma ai; dai majaw Yesu kasa ni hpe Carpernaum de li hte nawng hka rap sa wa na matu hkang dat ai. Nbun laru kaba nna, hka len hta ai majaw lawan n rap du ma ai. Shanhte ni Carpernaum de n du shi yang, li hta naw rai nga ma yang, Yesu madu jahpawt jau jau hka ntsa lam hkawm let shanhte kaw du wa ai.

San Yawhan gaw Yesu Madu Petru hpe hka ntsa lam hkawm na hkang dat ai lam n shalawm da ai. Yesu Madu li hta jawn let Carpernaum de lawan du mat ai ngu sha ka da ai. Hpang jahpawt hta shawa masha ni Carpernaum de sa du ma ai rai nna, Yesu hpe tam ma ai rai tim, n mu tam ma ai.

Ndai laban na Kabu Gara Shiga mabyin gaw Carpernaum hta byin ai mabyin rai nga ai. Yesu madu muk tawng manga hte nga lahkawng hpe shalaw ai lam gaw, (1) Shi a mungga hpe madat hkam la nga ai ni kawsi hpang gara na hpe myit tsang ya ai, (2) hpang shani Carpernaum kaw shi a ahkyak ai sharin shaga mungga madat hkam la na matu sadu na ni hpe garum ya ai rai nga ai.

Sharin sara ni gaw sharin hkam la ai ni chye na yak ai sharin shaga lam ni hpe ga shadawn ni hte sharin shaga chye ma ai. Yesu madu gaw Shi tawn da sumsing lusha rai nga ai Shi a hkum hte sai a lam Yuda masha ni chye na hkra, lamik kumla hpe jai lang lai wa ai. Masha law malawng shi sharin ya ai lam hpe ninghkap na ma ai hpe Yesu Madu chye da ai.

Yesu Madu Hpe Yuda Myu Sha Ni San Ai Gasan Ni

1. “Shing rai dai nawng wora hkran e Yes hpe mu mu yang, shanhte gaw, Sara e, nang nang de galoi me du nit ta, ngu nna san ma ai” (Yh 6:25).

Yesu Madu shawng shana daw maga shanhte hpe lusha jaw sha ngut ai hpang, shanhte kaw na galoi pru mat ai hpe shanhte n chye kau da ma ai majaw san ma ai rai nga ai.

Yesu Madu gaw dai ga san hpe n htai ai sha, shi shanhte hpe sharin shaga mayu ai lam hpe hpaw tsun hpang ai. Dai gaw nanhte mana daw maga na zawn lamit kumla hpe bai mu mayu ma ndai; Rai ti mung, ngai nanhte hpe tsun made ga, hkum hkrang a matu lusha hkum tam mu; hkum hkrang malu masha gaw chyahkring na matu sha rai nga ai; Wenyi lu sha hpe tam mu; dai gaw htani htana asak hpe jaw lu ai; ngai nanhte hpe dai wenyi lu sha jaw na de ai; Karai Kasang gaw nanhte dai wenyi lusha hpe hkam la na matu ra sharawng nga ai, ngu ai rai nga ai.

1. “Sanhte gaw, Karai Kasang anhte hpe galaw shangun mayu ai lam galaw lu na matu, anhte kaning rai galaw na rai ta, ngu nna shi hpe san ma ai. Yesu gaw, Karai Kasang a myit ra ai lam ngu ai gaw, shi shangun dat ai wa hpe kam sham ai lam, ngu ai rai nga ai, ngu nna shanhte hpe htan mu ai” (Yh 6:28). Dai gaw anhte ni Yesu Madu hta kam hpa kam shamyat nga na hpe Kawa Karai Kasang ra sharawng ai hpe tsun ai rai nga ai.
2. Anhte ni Yesu Madu hpe kam sham lu na matu hpa madi madun ai lam naw ra ga ai kun? Anhte ni Yesu madu hpe hpa majaw kam ra na rai? Anhte ni Mawshe hpe kam ga ai. Hpa majaw nga yang shi gaw Israel myu sha ni hpe Egutu mung na Canan mare de woi wa ai wa rai nga ai; lamu de nna Manna muk jahkrat ya ai wa rai nga ai. Raitim, dai Manna muk hpe kaja wa jahkrat ya ai wa gaw Karai Kasang rai nga ai. Htani htana asak muk jaw ya ai mung Karai Kasang rai nga ai. Dai htani htana asak muk gaw Yesu Madu hkum nan rai nga ai.

Yuda Myu Sha Ni Hpe Yesu Madu Jaw Ai Mahtai

Yuda masha ni baw ja ma ai. Myit gaw lamu du na daram ram gum rawng ma ai. Yesu Madu hta shanhte san ai ga san hpe htai na mahtai galoi mung nga ai. Nanhte tsun ai, nanhte a jiwoi jiwa ni hpe Mawshe Manna muk jahkrat ya ai ngu ai gaw shut ai. Mawshe n re ai; Kawa Karai Kasang she nanhte a jiwoi jiwa ni a matu malu masha hpe jahkrat jaw ai she re ai.

Dai manna muk gaw, kaja wa nga yang, sumsing lamu de nna yu hkrat wa ai n re ai; Nye Wa gaw nanhte hpe ningnan re ai malu masha hpe jaw ya ai. Dai mahtang she sumsing lamu de nna yu wa ai asak muk rai nga ai. Ngai gaw dai lusha rai nga ai. Ngai yu hkrat wa ai a yaw shada lam gaw mungkan masha yawng asak hkrung nga lu na hte htani htana asak hpe lu la na lusha shahpa rai nngai, ngu Yesu Madu tsun ai rai nga ai.

“Dai rai nna shanhte gaw, Madu e, muk dai anhte hpe galoi mung ajaw nga mi, ngu mu ai (Yh 6:34). Dai ga gaw Yesu Madu hpe asawng ai ga tsun ai zawn rai nga ai.

“Yesu gaw, Asak muk gaw ngai rai nga nngai, ngai hpang de sa ai wa gaw kawsi hkrum na n rai, ngai hpe kam sham ai wa mung, galoi mung hpang gara hkrum na n rai, ngu htan ya wu ai (Yh 6:35).

Yesu Madu anhte a matu htani htana asak lusha rai nga ai hpe kam sham na gaw anhte a matu ahkyak dik rai nga ai. Raitim, Yesu Madu hpe kam sham ga ai ngu ai lachyum gaw hpa rai ta? (1) Yesu madu sharin shaga ai lam mahkra hpe hkap la ra ai. Shi gaw de da ai Nawku hpung a sharin shaga ai hpe hkap la ra ai. (2) Yesu Madu a hkang da tara ni hpe hkan shatup na matu jing jing rai nga ra ai; hkan shatup ra ai. (3) Anhte madu lu ai hte byin ai lam ni yawng Madu kaw tsep kawp kap tawn da ra ai. (4) Anhte ni ganing mi rai yang rai, Madu gaw anhte hpe tsawra ai hpe galoi mung kam sham ra ai; Madu ra sharawng ai hte maren anhte hta byin nga ra ai. Anhte prat a akri madun shara hta Madu hpe nga nga shangu ra ai.

San Pawlu Gaw Anhte Hpe Hkristu Madu Hta Kam Sham Ai Lachyum Hpe Sang Lang Da Ai

Anhte a prat kaw nna mara hpe shaw kabai kau ra ai. San Pawlu tsun ai hte maren nga yang Hkristan n re ai ni a prat gaw pandung n nga ai zawn rai nga ai. Kam sham myit n nga ai wa gaw shi gara kaw na du sa wa ai, gara de bai wa ra na hpe n chye ai. Shi a prat gaw nam maling kata sa na pandung n nga ai rai majaw, tinang rawt hkawm hpang ai shara de sha bai du wa ai masha hte bung ai, ngu tsun sang lang da ai.

Hkristu hta kam sham ai Hkristan ni a chyawm gaw prat a yaw shada lam nga ai dan dawng nga ai. Dai gaw anhte ni sumsing mungdan de hkawm sa nga ai ni rai ga ai. Anhte makam masham gaw lam kaw nhtoi jaw ai wan shingnan hte bung nga ai.

Hkristu hta kam sham ai gaw asak ningnan hta sak hkrung ai rai nga ai. San Pawlu gaw shinggyim prat hpe bu hpun palawng ni hte shingdaw chye ai rai nna, Hkristan ni gaw mara a majaw maza taw nga ai prat dingsa hpe raw kabai kau nna wenyi hta prat ningnan bu hpun let hkawm sa na matu shingdaw ga hte tsun shadum da ai.

“Hkristu Madu hpe bu hpun mu” ngu San Pawlu anhte hpe tsun shadum da nga ai.

Akyu hpyi saga

Wa Karai Kasang e, Yesu Madu a Hkum hte Sai hpe mawn mawn hkam la let shi hpe bu hpun sak hkrung nga lu na lam woi ya rit.  Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, Pranwan Ladaw hta (18) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Pru mat 16:2-4, 12-15

Chyum Mungga Daw (2) – Ehp 4:20-24

Kabu Gara Shiga – Yh 6:24-35

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.