Nawku Tawn Na Wudang Sumla,Nawku Woi Ai Wa De,( Sh ) Shawa Maga De Yawng Da Ai Baw Kun?

1. San: Wa jau e, anhte laban nawku hpawng ai shaloi Nawku tawn kaw jailang ai Madu a Udang sumla hpe shawa masha ni hpang de myiman shayawng ai baw kun? Mahtang Sara ni dung ai Nawku tawn de shayawn tawn ai baw kun? Sara ni langai hte langai galaw ai nbung ai mu ga di Chyeju hte Wa Jau naw htai sanglang Dan rit. Dingsing jau ginwang hka pra Sara ninghtawn lai law kaw na ya lana zupja hpyen yen kaw nga nga ai Jan Rozar Nbrang yun htang a ga san hpe htai ya na nngai.
2.  

Kahtawlik nawku hpung a nawku daw jau lam matsun (Liturgical Guide Book) No. 308. “There is also to be a cross, with the figure of Christ crucified upon it, either on the altar or near it, where it is clearly visible to the assembled congregation. It is appropriate that such a cross, which calls to mind for the faithful the saving Passion of the Lord, remain near the altar even outside of liturgical celebrations."

Nawku daw jau hpawng hta lawm ai ni Madu Yesu si hkam ai wudang hpe asan sha mu lu na matu; kam sham ai hpung masha ni hpe Madu Karai a nni nkri hkam si hkam nna mungkan ga hpe hkye hkrang hpe myit shadum ya na matu yaw shada ai rai nga ai; dai wudang hpe gara maga myiman yawng ra ai ngu gaw n lawm ai; raitim, htuk manu dik ai shara misa tawn/nawku tawn, shing n rai dai Nawku tawn/Misa tawn hte ni ai shara kaw tawn da mai ai; ahkyak gaw nawku daw jawng hpawng hta lawm ai ni yawng dai wudang hpe mu lu nna Yesu Madu a nni nkri hkam si hkam let anhte hpe hkye hkrang la ai hpe myit dum shangun na madung rai nga ai. Kaga myit shut myit bra hkawm na matu gaw n rai nga ai.

Monsignor Elliott a nawku daw jau lam matsun laika buk hta mung, “liturgical crucifix” Nawku daw jau hpawng hta lang ai wudang gaw tingkyen shingtai masha ni a matu laksan n re ai; Misa hkungga hta/ nawku daw jau hpawng hta lawm ai kam sham ai wuhpawng hpe Madu Yesu Calvary bum ntsa hta hkungga nawng jau ya ai hpe myit dum shangun ai kumla she re ai, ngu tsun da ai.

Anhte chye na ra ai gaw wudang hpe Misa Hkungga nawng jau ai Jau, shing n rai, Nawku daw jau lamang woi ai Sara hpang de gayin da ai ngu ai gaw madung n rai nga ai; Madu Yesu a hkum hte sai nga ai Chyoi pra hkrum maga de man yawng da ai, san pra ai ni gaw Misa tawn/ nawku daw jau tawn kaw nawku hpawng hta anhte hte rau rai nga ma ai majaw shanhte hpang de man yawng ai ngu ai lachyum rai nga ai; Misa Hkungga nawng jau ai Jau, shing n rai, Nawku dawjau lam woi Sara mung dai akyu hpyi hpawng hta ahkyak dik shara kaw lit la woi awn ai wa rai nga ai hpe anhte myit dum ra ga ai, ngu tsun shadum da nga ai.

Nawku daw jau hpawng hta lawm ai ni gaw wudang a shingdu maga sha mu ai ngu sumru hkam sha wa ai gaw hpang daw de anhte myit la lu ai ga san san hpa nnan rai nga ai. Dai majaw mung Yesu wudang hta jan noi si hkam ai sumla hpe lahkawng maga shakap da ai wudang hkrang shachyaw galaw da ai wudang ni mung nga wa ai rai nga ai.

Nawku tawn hta wudang lahkawng tawn ai lam hte seng nna mung nawku hpung kawn sang lang da ai lam ni nga nga ai.

Wa Sarabyin Benedict XIV (1740-1758) gaw, “hpawng hta lawm ai ni yawng mu mada lu ai wudang langai sha rai yang ram ai; kaga wudang ni nga ai rai yang dai nawku daw jau lamang ngut du hkra kaga shara hta htawt da yang kaja ai ngu tsun da ai.

Kahtawlik nawku hpung a nawku daw jau lam matsun (Liturgical Guide Book) No. 129 hta Saradaw ni woi awn ai Misa hkungga hpang ai shaloi hte ngut ai hpang Misa tawn de yan shang wa ai rai yang tara tau langai Wudang hpe hpai nna shawng kaw woi shang ra ai. Raitim, dai wudang hpe Misa tawn de du ai shaloi shara ra kaw Misa Hkungga nawng jau ngut aten du hkra zing da mu ga, ngu lawm nga ai.

Madu Hkristu a sak jaw ap nawng ai lam hpe hkrang shala ai wudang gaw Karai kasang hte shinggyim masha lapran matut manoi nga ai lam hpe madun dan ai ngu 1Tim 2:5 kaw San Pawlu tsun da nga ai. Yesu Madu Shi a kasa ni tinang a wudang hpai let Shi a hpang hkan na matu saw shaga da nga ai (Mt 16:24). Yesu Madu anhte a matu nni nkri hkam si hkam ai, Shi a kasi hpe hkap la hkan sa na anhte a matu kasi kamang jaw da ai (1Pt 2:21).

Kahtawlik nawku hpung a nawku daw jau lam matsun (Liturgical Guide Book) hta Hpung shawa masha ni yawng mu mada lu ai dan dawng ai Misa/ Nawku tawn ka-ang kaw tawn da na matu sha tsun da ai hpe mu lu ga ai. Gara maga man yawng ra ai nga gaw hkrak lam matsun da ai n nga ai. Raitim, shawng de tsun mat sai hte maren, anhte dum chye ra ai gaw, wudang hpe Misa/nawku tawn a ka-ang kaw tawn ai gaw hpung shawa masha ni dan dawng ai hku mu lu na matu hte, wudang man hpe nawku tawn maga man shayawn da ai gaw Yesu Madu hte San pra ai ni bai dai nawku daw jau lamang woi awn ai wa gaw nawku dau jau lamang hta ahkyak dik ai wa re majaw manu shadan ai hku mung, hkungga lara di ai hku mung lachyum rai nga ai ngu ndai hte mi hte ga san hpe htai dat ya lu nngai.

By Fr. Patrick Gawmaw Hkawng Yae