Nawku Daw jau Ai Shaning Ladaw Hte Ladaw San Nna, Galaw Ai Lam Ni

1. San: Hpa majaw anhte catholic nawku hpung hta e Yesu a hkum hte sai poi laban ngut ai hpang pran wan ladaw bai du sai rai yang, Hpa majaw Pran wan ladaw laban 1 kaw n.na n.hpang ai sha pran wan ladaw laban 12 kaw na hpang ai kun? N.chye na n.hkawn hkrang lu ai majaw chyeju hte tsun sang lang jahpra dan ya na matu hpyi shawn dat lu n.ngai. Manmaw saradaw ginwang namlim pa jau aseng mung hkawng san luka nawku jawng wang na hpyen yen dabang hta shanu nga ai Magdalena lasang hkawn ra a ga san hpe htai ya na nngai.
2. Kahtawlik Nawku Hpung hta e Latin rite lang ai nawku daw jau shaning ladaw hte Western rite lang ai nawku daw jau shaning ladaw loi li shai hkat mat ai lam chye lu ai. Ya anhte hkan sa ai gaw Latin rite rai nga ai. Anhte ni lang ai nawku daw jau shaning ladaw Latin rite ngu ai gaw Roma kaw na masat da ya ai nawku daw jau shaning ladaw rai nga ai.

Nawku daw jau shaning gaw Madu Yesu Hkristu mungkan ga de du sa ai, shi a si hkam ai hte bai hkrung rawt ai lam ni hpe myit dum shangun ai hte anhte a prat hta byin nga ai ngu shingran pra pra mu na matu shadum ya ai.

Nawku daw jau ladaw ni gaw (1) Du Sa Ladaw, (2) Hkristmas Ladaw, (3) Pran Wan Ladawa, (4) Lu Sha Gam Ladaw ni rai nga ai. Ndai nawku daw jau ladaw ni hta laksan poi kaba ni mung rawng nga ai.

Hpu nau wa san ai ga san gaw laklai ai lam langai mi rai nga ai. Pran Wan Ladaw hpe Laban langai kaw nna pran wan ladaw htum hkra matut manoi n galaw ai sha, Pran Wan Ladaw langai hpe “Hkawhkam Masum Poi” ngut ai hpang, hpang ai rai nna lapran kaw Lu Sha Gam Ladaw bai shang ai hpe mu lu ai. De a hpang, Chyoi pra ai Wenyi yu hkrat wa ai Pentecost ngut ai hpang she bai matut ai hpe mu lu ai.

“Hkawhkam masum poi” ngut ai hpang pran wan ladaw langai (1) hpang ai rai nna, pran wan ladaw kru (6) du hkra matut ai. De a hpang gaw Lu Sha Gam Ladaw de bai du shang wa ai.

Ndai nawku daw jau shaning ladaw hpe Yuda ni a nawku daw jau labau hpe lakap nna galaw yu wa ai lam chye lu ai. Madung gaw Hebrew Chyum laika hpe lakap ai re.

Du Sa Ladaw (Advent) hpe Tours kaw na Saradaw Perpetuus (AD 433-450) gaw Hkristmas a shawng San Martins a poi nhtoi November 11 ya hta galaw hpang woi wa ai rai nna, dai hpe mahta nna Council of Macon (581) hta Frankish nawku hpung ni hta mung hkap la hkan galaw wa ai lam chye lu ai.

Kahtawlik Nawku Hpung a nawku daw jau shaning hpe Madu Yesu Mungkan ga hta Hkye hkrang la magam sasana galaw ai aten galaw lai wa ai mabyin ni hpe ladaw hte ladaw san nna galaw ai gaw Shi a sasana galaw ai ladaw hpe shi a daw hte daw grau chye na lu na matu rai nga ai. Chye na ai hte maren hkan shatup sa wa lu na matu mung rai nga ai. Dai majaw nawku hpung kaw nna ladaw hte ladaw garan ginhkra da ai hta Madu Yesu a hkye hkrang la magam galaw lai wa ai aten ladaw hpe jahtuk nna galaw da ai re majaw pranwan ladaw hpe ningnan hpang ai kaw nna pranwan ladaw htum hkra matut manoi n galaw ai sha, Yesu a hkum hte sai poi nhtoi ngut ai hpang she pranwan ladaw 12 kaw nna bai hpang ai rai nga ai.