Nang Hpam Dut Mari Nna Lu La Ai Hte Alu Jaw Bang Mai Ai Kun?

N’ding n man, n tara ai hku lu la ai alu atan ni gaw Karai Kasang a man hta n tsawm n htap ai gaw teng sha rai nga ai. Shawng na san htai ni hta Wa Jau kaba Patrick Brang Di htai da ai hpe mung bai ndau ya mayu nngai.

Anhte a buga hta namhpan dut ginlen dut shabra gunrai langai zawn myit la galaw taw nga ai majaw anhte a buga myu sha ni law law hkrak sum mat sai hpe anhte yawng chye nga ga ai, dum nga ga ai. Dai majaw ndai namhpan hpe tara n shang galaw shapraw dut mari shama ai lam gaw kachyi mi pyi nmai galaw ai magam bungli rai nga ai.

Dai majaw anhte yawng ja ja ninghkap gasat shamyit kau ra na rai nga ai. Alu atan bang ai hte seng nna gaw lu ai ni gaw law law bang ra ai, nlu ai ngu nna nbang ai mung nmai nga ai, dai bang ai gaw grau nna manu dan masat ya na gaw Karai Kasang she rai nga ai. Mahte (22:41-44), Luka (20: 45 -21:4), Madu Yesu hkristu nawku htingnu chyinghka kaw alu bang ai ni hpe yu yu nga ai. Ngut jang Kasa ni hpe san ai kadai wa mahtang a alu grau reng ai law, law htum ai law, ngu sanai.

Madu Yesu tsun ai gaw Gaida jang gaw shi lu ai kaw na mahkra hpe shi a asak bau na pyi bang dat sai majaw Yesu hkristu ndai Gaida jan a alu hpe shagrau ai, manu dan dik ai lam tsun ai. Alu bang nna nawku hpung hpe madi shadaw ra ai hpe mung anhte a nawku hpung tara lam hta anhte hpe asan sha tsun da nga ai. Karai Kasang a amu gunhpai ai ni hpe baw garum u nga nna matsun da ai. Karai Kasang a nawku hpung hta alu bang madi shadaw let akyu hkam la na matu matsun ya ai lam mung rai nga ai.

Dai majaw anhte nawku hpung masha ni yawng gaw Karai Kasang hpe e hkap la kamsham ai hta tinang a mai byin ai madang hte nawku hpung a magam hta shang lawm na, alu bang na ahkyak nga ai. Nawku hpung a tara Ubade Cannan Law no. 208 kaw na 223 hta ndai lam ni hte seng nna matsun da nga ai. Dai hta Cannan no. 210 hta hkristan hpung masha ni yawng gaw tinang a nga pra madang hta nna chyoi pra san seng ai hte nawku hpung rawt jat galu kaba wa na matu shang lawm shakut madi shadaw ra ai lam hpe matsun da ai.

Kani namhpam hpe gaw anhte a buga hta dut hpaga galaw ai hpe tsep kawp n galaw saga, Ndai zawn re mung Ja gumhpraw n tam saga, ndai anhte a hpunau ni alu bang ai hte seng nna chyawm gawngai myit la ai hpe gam garan mayu ai. Nanhte a Kani dut nna lu ai ja gumhpraw ni hpe masha hpe gaw gap ai, kahtawng mare buga mungdanhpe gaw gap pawnba ai hta bai jai lang kau mu, alu bang kau mu, shakawng shakat ai hte n re ai sha myit malai lu tem si re ai hte alu bang kau dat mu.