N gun Shaja Sakrammintu lu jang kaga manang hpung (jasam hpung)ni kaw num wa ai lam n.mai galaw sai Kun?

San: Anhte catholic nawku hpung masha ni ngai chye na hkap la lu ai gaw N gun shaja sakrammintu lu jang kaga manang hpung (jasam hpung)ni kaw num wa ai lam n.mai galaw sai nga n.na chye na lu ai...N.dai lam hte seng n.na anhte catholic nawku hpung na ramma shayi sha ni karai hpe mung n.hkrit nawku hpung a tara lam hpe mung n.chye na tinang a makam masham gaw hpa mi re madung gaw hpa mi re n.chye kanu kawa ni catholic rai na sha catholic rai taw nga ai ni hpe mu mada taw ai majaw naw tsun ja hpra sang lang dan na hpe garum hpyi shawn dat lu n.ngai. zau bung jau aseng maria sara ning hton ban hkung yang mare ko nga lai wa n na ya.ten miwa mung hung ho ko du nga ai RIta pau sang bok pa a ga san hpe htai ya na nngai.

• N-gun Shaja Sakramentu hkam la sai Kahtawlik hpung masha gaw shi a prat hta makam ngang gring let sasana magam gun hpai lu na matu ra kadawn ai Chyoi Pra ai Wenyi a Chyeju kumhpa hpe hkam la sai gaw rai nga ai.

“Dai Madu a wenyi gaw shi hpe hpaji byeng-ya, chye chyang ai nyan hte kung kyang ai hpaji jaw ya na ra ai. Shi gaw shi a amyu masha ni hpe up hkang na ra ai. Shi gaw dai Madu a myit ra ai hpe chye nna, shi hpe shagrau sha-a na ra ai, shi gaw dai Madu a ga madat mara ai hta awng sharawng na ra ai” (Is 11:2-3).

“Tsaw htum ai dai Madu gaw ngai hpe shi a Wenyi hte jahpring ya ni ai. Matsan mayan ni hpang de kabu gara shiga gun sa na matu mung, Myit daw mat sai ni hpe shamai shatsai ya na amtu mung, Bawng dung ai ni hpe raw dat na matu mung, Htawng hta shareng da hkrum ai ni hpe shalawt dat na matu mung, shi ngai hpe lata la nna shangun dat nu ai” (Is 61:1).

Ndai ya hti dan sai Myihtoi Isaiah a myit htoi ga Madu Yesu hta dik wa ai rai nga ai. Dai lam Lk 4:16-22 hta Madu Yesu Hkum nan bai tsun da nga ai. Chye Pra ai Wenyi chyeju kum hpa hpe anhte n-gun shaja Sakramentu chyeju kumla hkam la ai a marang e hkam la lu ga ai. Dai N-gun shaja chyeju kumla hkam la ai a marang e anhte ni gaw tinang a makam hta ngang gring nga ra ai; Yesu Madu a sasana magam hta shang lawm ap nawng dau jau gwi wa ai. Nawku Hpung a makam masham hpe sakse hkam gwi wa ai; Nawku Hpung a makam masham hpe makawp maga lu wa ai. Tsun ga nga yang Karai kasang a Hkye hkrang la magam hta Shi anhte hpe hkang da ai hte maren htep lahti hkan nang shakut sa wa lu ai; Yesu Madu zawn tinang a asak hpe pyi n lahpawt ai sha ap nawng daw jau lu wa ai.

N-gun shaja Sakramentu Chyeju Kumla hpe hkam la ai shaloi, N-gun Shaja Sau (S.C = CHR) hpe Wa Saradaw chya ya ai. N-gun shaja sau a lachyum gaw law htam ai, kabu pyaw ai, n-gun shaja ai hpe madun dan ai rai nga ai.

N-gun shaja chyeju kumla hkam la ai a marang e, Kashin Kamun chyeju kumla hkam la ai shaloi lu la ai chyeju ni hpe grau shangang shakang ya ai; Kung hpang wa ai; Karai Kasang hpe Aba, Wa e, ngu shagu lu ai; Yesu Hkristu hte grau nihtep ai hku pawng lu ai; Chyoi Pra ai Wenyi a chyeju hpe grau hkum tsup ai hku hkam la lu wa ai; Nawku Hpung hte grau nihtep ai hku gyit hkang da hkrum ai; Makam kaba wa ai hte Hkristu a teng man sakse hkam gwi ni tai wa ai.

“N-gun shaja hkam la ai hpang nang gaw wenyi lam hte seng ai masat dazik dawk shakap da hkrum sai hpe myit dum u; Hpaji byen-ya, chye na hkawn hkrang ai, madat mara ai, hkam la chye ai, hkum hkrang myit masin marai atsam kaba ai, Karai Kasang hpe hkrit hkungga ai lam ni hpe lu la ai,” ngu San Ambrose sakse hkam da ai.

Myihtoi Isaiah 11:1-9 hta hti yu yang, Chyoi Pra Ai Wenyi a chyeju kumla (7) hpe mu lu ga ai: (1) Hpaji Byen-ya “wisdom”, (2) Chye Na Hkawn Hkrang ai “understanding”, (3) Hpaji jaw lu ai “counsel”, (4) hkam jan lu ai myit marai “fortitude”, (5) machye machyang “knowledge”, (6) makam hta dinghpring dingman ai “piety”, (7) Karai kasang hpe hkrit hkungga ai “fear of the Lord”, ndai chyeju ni hpe hkam la lu ai lam ga sadi jaw da nga ai.

Mt 28: 16-20 hta Madu Yesu Kasa ni hpe mungkan chyam hkra pru sa nna amyu hpaw shagu ni hpe nye a sape ni shatai let, Kawa a Kasha a Chyoi Pra ai Wenyi a amying ningsang hta kashin kamun jaw nhtawm, Shi hkang da mada yawng hte hpe hkan shadik lu mu ga, shanhte hpe sharin shaga ya mu, dai hta n ga Shi anhte hte rau nga nga na, ngu ga matsun da nga ai.

Ndai zawn re ai chyeju ni hpe hkam la lu na matu gaw anhte nawku hpung hpa-awn ni hte rau, kanu kawa ni, hkam la na wa, yawng gaw tinang hte seng ai lit magam hpe atsam dat shapan shalat nga ra ga ai. Dai zawn rai nna atsam dat yang she, N-gun shaja chyeju kumla hkam la na wa hta dai chyeju namchyim hpe hkam la lu na rai nga ai.

N-gun shaja chyeju kumla hkam la sai ni yawng gaw tinang a makam hpe shangang shakang sa wa ra ai; sakse hkam sa wa ra ai. Dai zawn galaw lu na matu gaw tinang hkum nan chye myit chye mang sai wa rai sai hte maren, dai makam ni hpe dingyang hkaja shakut sa wa ra ai; Grau nna akyu hpyi let Karai Kasang hta kam hpa kam shamyat nga ra ai. Dai zawn makam masham lam hta hkaja shakut ai lam n nga ai, akyu hpyi shakut ai lam n nga ai, Karai hta kam hpa kam shamyat ai lam n nga ai rai yang gaw, makam ningra wa na gaw teng sha rai nga ai.

Chye myit chye mang, myit daw dan chye sai ni dai zawn byin ai gaw Nawku Hpung a matu myit n pyaw shara gaw rai nga ai. Raitim, Nawku Hpung gaw Karai Kasang hkang da ai hte maren, shinggyim masha shagu hpe shang lawt lu ai ahkaw ahkang jaw dai ai. Dai tinang shanglawt ai myit hte lata la ai hta hkan nna hpang jahtum Karai Kasang a je yang daw dan ai hpe anhte yawng hkam la ra na gaw teng sha rai nga ai.

Dai majaw gaw nang ngai Nawku hpung a sharin shaga ai hte maren makam hta ngang kang nga ga ai rai yang, ra rawng gawng kya ai ni hpe mara shagun mara hta ai hku n re ai sha, Madu Yesu a myit galu kaba ai myit hte yawng hpe woi lakawn woi awn ding yang rai nga ga ngu, ga san hpe htai ya let n-gun jaw dat lu nngai.

By Fr. Patrick Gawmaw Hkawng Yae

#rvakachinservice