N-gun shaja hpe shawa hku mying langai sha jaw nna mai hkam ya ai kun? N-gun shaja n.lu ai ni hkungran lak mak n.mai la ai kun?

 (comfirmation and nomination and marraige) San: N-gun shaja hpe shawa hku mying langai sha jaw nna mai hkam ya ai kun? N-gun shaja n.lu ai ni hkungran lak mak n.mai la ai kun? Chyeju hte htai ya rit. wai maw jau gin wang ja pu mare hta nga lai wa n.na ya mang shi kaw du na ai Benedeth jan L.zing htu ring a ga san hpe htai ya na nngai.

• N-gun shaja sakramentu hkam la ai wa gaw, Kashin kamun sakramentu hkam la ai shaloi na kashin kamun mying (san pra ai mying) hpe sha bai mai la ai zawn, tinang ra ai kaga san pra ai mying hpe mung bai mai la ai rai nga ai.

N-gun shaja sakramentu hkam la na ni gaw chye myit chye mang sumru dinglik chye sai ni rai sai majaw gaw, N-gun shaja mying hpe shanhte hkum nan hpe lata shangun ai gaw grau htap htuk na re ngu mu mada ai.

N-gun shaja hkam ai lamang langai hta lawm ai N-gun shaja hkam la na ni hpe mying langai sha jaw nna hkam ya ai gaw lit la galaw ai ni bungli hkyam sa daw myit nna galaw ai mung mai byin nga ai. Mying langai sha jaw nna n mai ai gawn rai nga ai. Mai ai gaw rai nga ai. Tara mung shang ai gaw rai nga ai. Raitimung, Nawku Hpung a ahkyak kaba tawn da ai Sakramentu hpe hkam ya ai hta mying jahpan hta woi awn ai ni ap nawng myit kaba hte N-gun shaja hkam la na ni a ra sharawng ai N-gun shaja mying hpe lata la shangun nna, ka matsing laika buk hta mung, N-gun shaja lakmat hta mung, n shut n sai ka matsing bang da ra ga ai.

Canon 1065-&1. Catholics who have not yet received the sacrament of confirmation are to receive it before they are admitted to marriage if it can be done without grave inconvenience.

&2. To receive the sacrament of marraige fruitfully, spouses are urged especially to approach the sacraments of penance and of the Most Holy Eucharist.

Kashin kamun hkam la sai Kahtawlik Hpung masha shagu gaw asak ram wa ai hte maren, tara laika, nawku hpung a sharin shaga lam ni hpe sharin hka ja la nna N-gun shaja sakramentu chyeju kumla hpe hkam la ra ai.

Hkungran Sakramentu hkam la na Kahtawlik hpung masha shagu gaw, n hkungran shi yang, hkungran na maw yang, N-gun Shaja Sakramentu chyeju kumla hpe hkam la lu hkra lajang ra ai. Bai, Mara Raw Sakramentu hte Chyoi Pra Hkum Sakramentu ni hpe mung hkam la lu hkra shakut ra ai.

Hkungran Sakramentu hkam la na num nnan, la nnan ni a wenyi lam hte seng ai hkyen lajang shachyip da ai lam rai nga ai. Kahtawlik n re ai hpu nau Hkristan langai ngai hte hkungran ai (Mixed Marraige), bai makam n bung ai masha hte kayau hkungran ai (disparity of cult) masa hta raitim, Kahtawlik hpung masha wa gaw shawng de tsun sai lam ni hpe hkan shatup shakut ra ai.

Yak hkak ai lam nga ai majaw, masa n tsawm ai majaw hkam la na n mai bai ai rai jang mung, hkungran sakramentu hkam la ai hta tara n shang gaw n byin shangun lu ai; shawng de tsun ai sakramentu ni hpe n hkam la lu ai sha, Nawku Hpung hta ahkaw ahkang nga ai Jau ni, shing n rai, delegation ngu ai ahkaw ahkang jaw lit shatsam dat hkrum ai tara hkaw sara ni e hkungran ya hkungran sakramentu gaw tara shang ai rai nga ai.

Mai byin ai shaloi, lawan dik ai hku kaga sakramentu ni hpe hkam la lu hkra shakut na lit dai hkungran sakramentu hkam la da sai ni hta shi a shi nga nga sai rai nga ai. Hkungran sakramentu hkam la ai ni yawng gaw Hkungran lakmat lu la mai ai. Ndai hte mi hte ga san hpe htai ya let, hkungran sakramentu hkam la da nna N-gun shaja garai n hkam la shi ai ni lawan dik hkam la lu mu ga, mara raw sakramentu hte chyoi pra hkum sakramentu hpe mung man man hkam la lu mu ga akyu hpyi ya dat nngai.

By Fr. Patrick Gawmaw Hkawng Yae