Mayak Amyu Myu A Majaw, Nawku Hpung A Tara Kanu Lam Ni Hpe Tawt Lai Hkrup Ai Rai Yang, Gara Masa Lam De Du Wa Nna, Mara Garau Lu Wa Ai Baw Kun?

Wednesday, May 05, 2021

San: Wa jau e, Nawku hpung a tara lam kru kaw ka da ai tara kanu kaw lawm ai No. 2 hte 3 (shaning shanang galang mi mara raw kau u, hte, Paska ladaw hta chyoi pra hkum hpe hkam la u) ngu ka da ai. Rai yang lama na n dai tara ni hpe hkan ra ai chye tim mara raw ya na Wajau ni nnga ai shara, Bum ring bum ga hkan, shing n rai Nawku jawng hte grai tsan ai shara hkan nga ai hte Nawku jawng mung nnga mara raw ya na gyinwang up Wa jau ndu lu ai shara mare buga hte “ga shadawn myiwa mung, maigan mungdan hkan masha ni a shara hkan magam bungli galaw nna nga ai, hpu nau ni shinggan pru na matu (offday) Ahkang nlu ai majaw ,mayak mahkak amyu myu hte n dai zawn laban Nawku mung n lu sa, missa mung n lu lawm, Mara raw Sakramintu hpe mung n lu galaw, Nawku jawng lu sa ai rai tim mung, Wajau Mara raw ya nga ai ten n lu shang lawm kau dat ai ,ndep kau ai ndai zawn re nbung ai mayak mahkang amyu myu a majaw laning mi mung n ga hkra Mara raw ai lam n lu galaw, Paska ladaw hta Chyoi pra ai hkum hpe mung nlu hkam la, dum nga ninglen nmai byin taw ai, kaning mung n chye di rai myit kaji nga ai hpu nau ni a matu gaw gara masa de du wa nna, mara hpe mi na hta grau nna mara jat ai kun? Shing nrai mara grau nna lu wa ai baw kun? Nawku hpung a tara lam kru hpe n gawn nsawn ai ngu ai lam de du wa ai kun? Chyeju hte Karai Kasang a Ja chyum munnga hte rau n gun jaw let chyeju hte Sang lang htai ya rit. Manmaw Saradaw ginwang, Zau bung jau aseng, San Columban sara ninghtawn, Kahtan Kawng mare na, ya ten Singapore mungdan kaw magam bungli galaw shakut nga ai Julia Labang Tawm Num a ga san hpe htai ya na nngai.
Htai: Ndai ga san hpe hti yu yang, ga san san ai nau na wa grai nan sumru hkam sha lai wa na masa nga na re ngu kam ai. Nawku Hpung a tara lam kru (6) hpe bai myit sumru lu na matu arau tsun ga. 1. Laban nhtoi hte Nawku Hpung a poi shani e, Misa Hkungga sa lawm u, 2. Shaning shanang kalang mi mara raw kau u, 3. Paska Ladaw e, Chyoi Pra Hkrum hpe hkam la u, 4. Lusha gam nhtoi hta lusha gam nna shan hkum sha u, 5. Kahtawlik Nawku htung hte maren num hkungran poi galaw u, 6. Karai Kasang a amu gun hpai ai ni hpe bau garum u. Nau na wa tsun ai Nawku Hpung a tara kanu (2) hte (3) lahkawng hpe hkan shatup na n mai byin ai lam ni hkrai rai nga ai. N mai byin ai ngu ai hta hkam la mayu ai wa hkum nan myit hta kade sharawng awng ai rai tim, hkan shatup lam n hku ai, n mu ai masa hta rai nga ai. Ndai zawn re ai masa lam hta dai tara kanu lahkawng hpe n hkan shatup lu ai a majaw gaw mara n lu wa na re.

Raitim, tinang hkum nan dai lam ni hpe hkan shatup mai ai lam ni hta n kam ai, n rau ai, kaga ahkrak ai lam ni hta madung da shakut taw ai, zawn re ai a majaw lawt ga tsun ai masa hta rai yang gaw mara lu wa na re.

“Yesu gaw, nanhte ngwi pyaw nga myit ga; nye Wa gaw ngai hpe shangun dat ai hte maren, ngai mung nanhte hpe shangun dat made ai, ngu kasa ni hpe tsun da ai (Yh 20:21).

Hkristu Madu gaw Nawku Hpung hpe kasa ni hta gaw de da hpang wa ai. Hkristu gaw Nawku Hpung a baw rai nga ai. Nawku Hpung mung Madu Yesu a hkum hkrang hta jawm pawng nga ai. Nawku Hpung gaw Madu Yesu hkang da ai lam hpe hkan shatup lu na matu nawku hpung masha ni hpe tara lam ni jaw da ai rai nga ai.

“Ngai nanhte hpe teng teng tsun made ga, dinghta ga hta nanhte hkang da mada gaw, sumsing mungdan hta mung hkang da hkrum na mara ai. Dinghta ga hta nanhte ahkang jaw da mada mung, sumsing mungdan hta mung ahkang jaw ai hkrum na mara ai,” ngu Yesu shi a kasa ni hpe hkang da ai (Mt 18:18).

Madu Yesu jaw da ai tara ni hpe n hkan shatup ai gaw mara rai nga ai. Dai majaw Madu Yesu a tara hpe hkan shatup let chyeju hkam la lam hpe hpaw da ya ai Nawku Hpung a tara kanu ni hpe n hkan shatup ai gaw Madu Yesu hkang da ai chyeju ni hpe hkam la ai hta ning ra wa na; dai chyeju ni hte sak hkrung ai lam nnga yang nat sadan a agung alau hpe dang manga kau lu na n mai byin wa na rai nga ai. Mara gaw Nawku Hpung a tara ni hpe n hkan shatup ai majaw lu wa ai ngu ai gaw, dai tara hpe n shadik ai a majaw nat sadan a agung alau hta na makawp maga lam n lu wa ai majaw mara kata hkrat sum wa ai rai nga ai.

“Yesu gaw, nanhte a ga madat ai wa kadai mung, nye a ga madat ai mung rai nga ai. Nanhte hpe ningdang kau ai wa kadai mung, ngai hpe ningdang kau ai wa rai nga ai: ngai hpe ningdang kau ai wa kadai mung, ngai hpe shangun dat ai wa hpe mung, ningdang kau ai rai nga ai”, ngu nna shi a sape ni hpe tsun da ai (Lk 10:16).

Dai majaw, Nawku Hpung masha ni hta na shut hpyi mara kaba ai ni hpe mara dat ya na ahkaw ahkang nga ai zawn gyit hkang da na ahkaw ahkang mung nga ai. Dai gaw Yesu Madu hkrum nan kasa ni hpe ahkang jaw da ai. Dai ahkaw ahkang gaw kasa ni a tingyang hpe bai hkam la ai ni hta ahkaw ahkang agrin nga ai.

Nawku Hpung a matsun ai hpe hkrak hkan sa lu hkra gaw anhte ni mai byin ai masa lam tam la nna shakut na lit nga ga ai.

Tara ngu ai shaloi Karai Kasang a tara(God’s commandments), Nawku Hpung a tara (church/ Ecclesical law), Mungdan Asuya a tara (Government law), Htunghking tara (Culture law) ngu ai zawn re ai tara ni hte ginra masa hta hkan nna, wuhpung wuhpawng hta hkan nna masat da ai tara ni law law nga ai.

Karai Kasang hpe kamsham ai Kahtawlik Nawku Hpung masha langai mi a matu Karai Kasang a tara, Kahtawlik Nawku hpung a tara, bai tinang nga ai Mungdan Asuya tara, tinang a htunghking tara, tinang nga ai ginra hte tinang lawm taw ai wuhpung wuhpawng a tara ni yawng hpe hkan ra ai.

Dai zawn tara ni hpe hkan taw ra ai wa, tara langai ngai hpe tawk lai nna langai ngai hpe kau da ra ai aten ni nga wa chye ai. Dai zawn re ai aten hta Karai kasang a tara hpe madung da ra ai. No. lahkawng madung da ra ai gaw Nawku Hpung a tara rai nga ai.

Karai Kasang a tara hte Nawku Hpung a tara lahkawng hta na pyi lata ra ai aten ni nga wa chye ai.

Dai lam hpe Madu Yesu a ga shadawn hta mu lu ga ai.