Maria Sumsing Lamu De, Hkum Hkrang Nawng Shalun La Ai Lam

San: Chyoi Nu maria hkum hkrang wenyi yawng hte lamu de lung wa ai lam hte seng n.na Nu maria gaw anhte Shinggyim masha hku tsun ga nga yang N si ai sha dai hku masha hkrung taw nga ning len woi shalun la kau ai ga kun? Nu maria n si sha lamu de lung mat wa ai rai yang gara shani gara shata gara shaning ni hta gara shara kaw lung mat wa ai kun? Manmaw saradaw ginwang namlim pa jau aseng mung hkawng san luka nawku jawng wang na hpyen yen dabang hta shanu nga ai Magdalena lasang hkawn ra a ga san hpe htai ya na nngai.

Htai: Daining 2021 shaning na Kahtawlik Nawku Hpung a nawku daw jau magam shata hti laika hte maren, Chyoi Pra ai Nu Maria Sumsing lamu de woi shalun la hkrum ai laban gaw August 15, pranwan ladaw 20 ngu na laban hta ang ai rai nga ai.

Kasa ni kaw na yu hkrat wa ai labau hpe sagawn yu yang, Kanu Nu Maria gaw anhte shinggyim masha ni zawn sha si mat ai (the dormition of the Theotokos, the falling asleep) ngu ka da ai. Kasha Yesu zawn sha, si ai hpang masum ya rai yang yawng jahkrung sharawt la hkrum ai rai na re ngu mung ka da ai. Gara shani, gara kaw si mat nna gara kaw lup makoi da ai ngu gaw labau n lu sagawn shi ai.

1950 shaning, November 1 ya, san pra ai ni a poi n’htoi hta, mungkan masha hkying mun seng re ai Hkristan masha ni Roma mare, San Peter pa hta, Wa Sarabyin Pius XII a Kanu Nu Maria hte seng nna Nawku Hpung kawn tara shang ndau ya na ndau mungga madat hkam la na matu sa du hpawng nga ma ai.

“Tsa kaba hku re ai Saradaw, jau ni hte rau Hkristan hpung masha hpawng kaba hpe Wa Sarabyin ndau ya ai hta, “Yesu Madu a Kanu Nu Maria ntsa matsan dum lama ai tsawra myit tawn da ai mahkra dang chye ai Karai Kasang hpe mung, htani htana prat dingsa anga nga ai Hkristu madu hpe mung, Karai a Kanu hpe mung, Nawku Hpung ting shakawn kungdawn shagrau sha-a na matu Yesu Hkristu hkum nan San Petru hte San Pawlu hku ngai hpe san da ai ahkaw ahkang hte Karai Kasang shingran jaw da hkrum sai majaw mung Hkristan masha ni hkap la kam sham sharin shaga na lam langai hpe ndau na nngai” ngu Wa Sarabyin Pius ga hpaw dat sai.

Dai gaw, “Mara n kap Na-um Na-sin ai Karai a Kanu Hkawnset Maria gaw shinggyim sak prat htum ai hpang jahtum shani hta hkum hkrang nawng wenyi rau sumsing lamu de hpung shingkang hte woi shalun la hkrum ai,” ngu ai rai nga ai.

Wa Sarabyin ndau ngut ai hte shawa masha ni kabu gara let Karai Kasang hpe mung, Hkristu Madu hpe mung, Karai a Kanu Nu Maria hpe mung, Nawku Hpung a hpa-awn ningbaw hku nna nawku hpung ting prat tup hkap la kam sham na matu shagrin ndau ya ai Wa Sarabyin hpe mung, lata lahpawk dum shakawn shagrau lai wa ma ai. Ndai ndau lam gaw ningnan re ai sharin shaga lam gaw n rai nga ai. Shagrin dat ai lam she rai nga ai.

Kahtawlik Nawku Hpung masha ni gaw, Nawku Hpung a sharin shaga lam hpe lamang kaba galaw nna Wa Sarabyin kawn tara shang ndau ya ai hpe Wenyi e garum ya ai majaw shut shai ai lam n nga ai ngu hkap la ai.

Poi galaw ai a lachyum

Kanu Nu Maria hpe sumsing lamu de hkum hkrang hte wenyi hpe shalun la ai gaw Karai Kasang Shi a Kasha a Kanu hpe tsaw dik htum shagrau ai lam rai nga ai.

Hkye la Madu a Kanu shatai na matu Maria hpe lata san da sai re majaw kaga masha kadai mung n lu mai sai ahkaw ahkang kaba masum hpe Kanu Nu Maria hkam la lu ai. (1) Mara N kap Na-um Na-sin ai lam, (2) Mara hta na lawt lu ai, (3) Shinggyim nsa asak htum ai shaloi hkum hkrang hte nawng wenyi sumsing lamu de woi shalun la hkrum ai.

Hkum hkrang wenyi nawng sumsing lamu de woi shalun la ai hkrum na gindan ai lam kaga gaw Kanu Nu Marai a prat tup hta Karai kasang hpe sadi dung ai majaw rai nga ai.

Kanu Nu Maria a prat tup hta Karai kasang hpe n dawng ai lam langai mung n nga ai; Kachyi mi pyi n nga ai. Karai Kasang shi a ntsa hkang da mada hte hpe htep lahti hkan shatup ai; akyu hpyi let hkan shatup ai.

Yesu a ntsa prat tup ga sadi dung lai wa ai. (1) Ma Yesu hpe shata jahku tup shi a hkritung hta gun da ai, (2) Ma Yesu hpe shangai ching hkai, bau sin makawp maga lai wa ai; Nu Maria zawn kasha hpe bau kaba makawp maga ai kanu kaga kadai n nga na sai; (3) Egutu mung de hprawng hkawm ai aten, Nazarenth mare hta bai wa nga ai aten, shaning 30 ning tup Yesu Madu hpe makawp maga lai wa ai; (4) Yesu Madu hkrit tsang ra na masa lawm ai mungga hkaw ai aten ni hta, nni nkri hkam si hkam ai wudang hpai lam hta, wudang hta jan noi da ai ten hta, Nu Maria n hkrit n kang ai myit hte Yesu Madu hte rau nga nga ai.

Lamu Kasa Gabriel ga sa shana ai kaw nna, Chyoi Pra ai Wenyi shi hta shanu nga sai rai nna, Yesu Madu hpe shinggyim hkum sa la na matu shi a prat hpe ap nawng da nu ai. Hkristan nawku hpung a kabu pyaw ai, nni nkri hkam ai lam ni hta kanu langai hku hkap la sai hta sha n ga, Hkristan ni hta na shawng ningnan kasi la hpa tai wa sai; Prat shagu na Hkristan ni hta kasi la hpa kaba dik wa mung rai nga ai.

Chyum mungga daw lahkawng hta San Pawlu sakse hkam da ai gaw, “Hkristu bai du sa ai shaloi, shi hte seng ai ni hkrung rawt wa na mara ai,” ngu ai rai nga ai (1Kor 16:23). Hkristu hte seng ai ni hta Nu Maria hta grau ni htep ai hku seng ai kadai n nga sai.

Nu Maria hkrum hkrang nawng wenyi sumsing lamu de woi shalun la hkrum na gin dan ai lam ni naw nga ai.

Karai a Kanu Nu Maria gaw shi a kasha hte rau asak ap nawng si hkam ai lam hpe hkam la lai wa sai ngu tsun mai ga ai. Wenyi e lam matsun ya ai hte kasha Yesu a kasi hpe la nna Kawa Karai Kasang hpang de hpang jahtum tinang a asak hpe ap nawng hkungga shatai lai wa ai.

Yesu Madu Mungkan masha ni hpe hkye la na matu shi a asak hpe si hkam lai wa ai raitim, Kawa Karai Kasang Yesu a hkum hkrang hten run na hpe n ra sharawng ai majaw lup kata na sharawt la nna sumsing lamu de hkum hkrang wenyi nawng shalun la ai.

Karai a Kanu Nu Maria mung shi a prat tup hta mara n kap ai majaw, san seng chyoi pra ai hkawnsek re ai majaw, Karai a kasha rai nga ai majaw Karai Kasang hkum nan Maria a hkum hkrang wenyi nawng sumsing lamu de woi shalun la ai rai nga ai.