Makam Nbung Ai Num Hpe La Nna, Dai Shayi Num A Makam De Hkan Nang Mat Yang Mara Lu Ai Kun?

 (Married and divouce/sin) San: Wa Jau e anhte kahtawlik la kasha ni, num la ai shaloi, hpung n bung ai num hpe la nna, dai num wa la wa na makam n hkan ai; la wa hpe she num wa kaw,gale bang la ai ni grai law ai hpe mu mada lu ai. Ndai zawn la ni num ni kaw hpung hkan mat ai rai yang mara lu na i? Chyeju hte htai ya rit. Namlim pa Jau aseng hka san sara ning htawn hka san mare kaw,nga lai wa na ya bum tsit pa hpyen yen Camp 2 kaw,shanu nga ai Ritar Hpaula Ji Tawng a ga san hpe htai na na nngai.

Htai: Kahtawlik Hpung masha wa, dinghku shang nna hpu nau Hkristan hpung langai ngai, shing n rai, kaga makam hpung langai ngai kaw hkan mat ai gaw, shi a makam hte shi rai mat sai rai nga ai. Shanhte hpe Nawku Hpung hku nna tara hkan hta hkan jeyang n mai sai rai nga ai. Mara lu ai, n lu ai, dingnye lu ai, n lu ai, ngu ai hpe hkan daw dan jeyang dat ai lam Kahtawlik Nawku Hpung masha ni tsep kawp n galaw ai gaw grau htap htuk na re.

Kahtawlik Nawku Hpung a tara Canon 1 hta "The Conons of this Code regard only the Latin Church," ngu tsun da ai. Lachyum gaw Canon law tara upadi ni gaw Latin Kahtawlik Nawku Hpung masha ni a matu, shanhte hte sha seng ai re, ngu ai rai nga ai. Nawku Hpung de bai gayin shang wa ai shaloi she Kahtawlik a tara gaw shi a matu bai akyu rawng wa na re.

Myit masin kraw lawang kaw nna shanhte a matu akyu hpyi ya nga ga ngu saw shaga let, tinang a makam hta ngang kang ru jung hkra makam masham lam hpe dingyang hka ja let akyu hpyi nga ga.

Kaga makam masham hpung, shing n rai, hpu nau hpung ni kaw num wa mat ai, shang mat ai rai yang gaw shi a makam hte shi rai mat sai rai nga ai. Kahtawlik Nawku Hpung gaw shinggyim masha ni a shang lawt ai makam masham hpe mung hkung ga manu shadan ya ai.

Kahtawlik Nawku Hpung sharin shaga ai hta, num hkungran ai hte seng nna, Kahtawlik Hpung masha shada hkungran ai, hpu nau Hkristan makam masham hpung masha langai nga hte hkungran ai, bai makam n bung ai hpung ni hte hkungran ai mahkrun lam ni nga nga ai hpe Kaga makam hpung masha ni hte rau Kahtawlik hpung masha ni law malawng n chye na ma ai hpe mu mada ai.

Hpu nau makam hpung ni hte hkungran ai lam hpe mung Kahtawlik hpung kawn lam hpaw da ya ai rai nga ai. Kahtawlik hte Kahtawlik n re ai hpu nau Hkristan yan lahkawng hkungran ai hte Kahtawlik hte makam n bung ai kaga makam hpung ni hte hkungran ai hpe gaw kayau hkungran ngu shamying ga ai. Canon law hta jai lang ai ga si hpe English hku gaw, Kahtawlik hte Kahtawlik n re ai hpu nau ni hte hkungran ai hpe gaw “Mixed Marraige” ngu tsun ai. Kahtawlik hte makam n bung ai kaga makam hpung hte hkungran ai hpe gaw “Disparity of Cult” ngu tsun ai.