Madu Yesu a Manu Dan Ai Sai (HOMILY FOR GOOD FRIDAY)

Cardinal Charles Bo

29th March 2024

Chyoi Pra ai Manga Ya

 

HOMILY FOR GOOD FRIDAY

Shinggyim num-sha, la-sha yawng gaw, tinang manu shadan ai lam ni hpe asak ap nawng nna shakut tam, makawp maga chye nga ai.  Ga shadawn, anhte a buga hta masha law law, yak hkak dut dang ai lam amyu myu hpe n hkrit n tsang ai, asak si na pyi n tsang ai sha, Ja, Lung seng, Myesha ga-sau zawn re ai ni hpe tam htu shaw nga ma ai.

Masha n kau mi gaw, tinang salu salat hte bungli galaw shakut nna lu ai gumhpraw hte manu dan ai ja, lung seng, patamya, pale ni kap ai manu dan lachyawp, ta-hkawn, na-tan, du gali ni hpe mari mahkawng da chye nga ma ai.   

Kalang mi na, shi-ga la ai masha langai mi, John D. Rockefelle ngu ai mying dan hkung ai lu su dik lauban langai mi hpe, "Na a matu gumhpraw kade lu yang ram a ta?" ngu nna san ai shaloi, shi bai htan ai, "kachyi mi dang naw lu jat yang." ngu nna htan ai da.  Shinggyim masha hta Ja Gumhpraw ngu ai, “law sai”“ram sai” ngu ai n nga, “myit dik” sai ngu ai n nga chye nga ai.

Ya, anhte hta ra ahkyak dik rai nna, anhte hpe myit dik ai lam jaw ya ai lu lam langai mi hpe tsun dan mayu ai; dai gaw,

Madu Yesu a Manu dan dik ai hte Chyoi Pra dik htum ai Sai rai nga ai.

1. Hpa majaw Madu Yesu a sai manu dan dik rai ta?

Satan anhte hpe n kam myit dum, n kam tsun jahta shangun mayu dik ai lam langai gaw Madu Yesu a Sai a lam re.  Dai Sai a atsam hpe shi atsawm sha chye ai majaw rai nga ai. Anhte myit malai kayin wa nna hkye hkrang la hkrum na hpe shi n ra ai, manawn ai majaw, rai nga ai.

Madu Yesu a Sai hpe nang n mari la ra ai; hkye hkrang la hkrum lu na matu kumhpa rai nga ai. Madu Yesu a Sai gaw anhte hkye hkrang la hkrum na matu langai sha re ai myit mada shara rai nga ai. 

Masha langai a hkum hta sai n rawng ai rai yang chyasi rai nga ai zawn, "Sai hkaw ai lam n nga yang, shut hpyit mara raw dat hkrum ai lam mung nga na n rai" nga nna Hebre dawkaba jahku, daw kaji hkun-lahkawng (Hebre 9:22) hta tsun da nga ai.

2. Hpa majaw Madu Yesu a Sai gaw manu dan dik rai ta? Chyum Mungga hta mahtai tam yu ga:

Mahte daw kaba hkun-sanit, daw kaji mali (Mt. 27:4) hta, Yuda tsun ai: mara n kap, san seng ai sai;

Petru a shagun laika hta (1Pt 1:19): manu dan ai sai;

Yawhan a shagun laika hta (1Yw 1:7): Kashin jasan ya ai sai;

Shingran laika hta (Shr 1:5) hkrut shatsawm lu ai sai; hte Awng dang ai atsam rawng ai sai (Shr 12:11);

Kasa Laika hta Pawlu tsun ai (Ks 20:28): Yesu a sai hte anhte hpe mari la sai;

Kolose ni hpang de shagun ai laika hta (Kolose 1:14): Yesu a sai anhte hpe hkye mawai la sai.

Roma ni hpang de shangun ai laika hta (Roma 5:9) Yesu a sai, anhte hpe ding hpring ai chyeju jaw ai;

Kolose ni hpang de shagun laika hta (Kolose 1:20) Simsa lam hpe gaw gap ya ai sai re nga ai;

Hebre laika hta gaw (Hebre 13:12) anhte hpe Jasan jaseng ya ai sai re  ngu nna sakse hkam sharin ya ma ai.

Madu Yesu Hkristu shi hkumnan tsun ai: shi a Sai gaw "masha law law a shut hpyit mara ni hpe raw dat kau ya na matu ru kau ya ai, htani htana Ga-shaka Ningnan a Sai re" ngu nna sharin ya ai.

Bainam hte dumsu kasha a asai hte n rai, Yesu shi hkum nan a asai hte, anhte hpe htani htana hkrang shaw la ai lam lu la sai nga nna Hebre ni hpang de shagun ai laika hta (Hebre 9:12) tsun da ai.

Dai lam hpe myihtoi Esaia laika, daw kaba manga-shi- masum, daw kaji shi-langai hta (53:11) tau tsun da sai:

Shi myit masin a shakut sharang ai akyu shi mu lu nna,Myit dik na ra ai: nye a dinghpring ai shangun ma gaw, shi chye chyang ai nyan hte, masha law law hpe dinghpring shangun na ra ai rai nna, shanhte a shut hpyit mara hpe shi nan gun hpai na ra ai.

Bai, Yawhan ka ai Kabu gara Shiga, daw kaba shi-manga, daw kaji shi-masum hta (15:13):

"Jinghku wa a matu tinang a asak nawng kau hkra tsawra ai myit hta, grau kaba ai tsawra ai myit gaw kadai kaw mung n rawng nga ai" ngu nna Madu Yesu sharin ai. Shi sharin ya ai hte maren, anhte hpe tsaw ra ai majaw, shi hkumnan a asak hpe ap kau ai  hte Shi a manu dan dik, chyoi pra dik ai sai hpe ru kau ya ai rai nga ai.

Dai lam hpe Kasa Pawlu mung, "Anhte mara kap ai ni naw rai nga yang, Hkristu gaw anhte a matu mara, si hkam ai hta, Karai Kasang nan shi a tsawra ai hpe, anhte kaw shadan dan sai" nga nna shangang shakang ya ai ( Roma 5:8).

 

3.                Madu Yesu a Sai hpe gara hku hkungga na rai ta?

"Madu Yesu e,

Nang Madu lu da sai akyu chyeju ni hpe kam hpa let,

Na a Manu dan la ai Sai hpe ngai la nna,

Ngai hte nye a dinghku masha ni marai hkum shagu a ntsa

Baw pungding kaw na  nna lagaw ndung du hkra,

Lapri bun nngai," ngu nna akyu hpyi mai ai.                                                                                          

4.  Madu Yesu a Sai hta hpa lam ahkyak a ta?

 Yesu wudang ntsa e ru kau ya ai Shi a sai gaw shi Madu hta kam sham ai ni a mara ni hpe kashin kau ya ai nga nna Hebre daw kaba shi, daw kaji langai kaw nna mali hta tsun da ai, (Hebre 10:1-4). Dusat sai, kaga masha ni a sai n rai, Madu Yesu a Sai hta sha, dai atsam rawng ai.

5.  Madu Yesu ru kau ai manu dan dik ai sai ni gaw gara ni rai ta?

(1) Shi a matu kadoi ai shaloi hkrat ai sai;

(2) Tsanlun sun hta akyu hpyi let hkrat ai sai;

(3) Shi hpe shadaw hta gyit dun nna anu kayet ai shaloi hkrat ai sai;

(4) Shi a baw hta ju janmau shagup ya ai shaloi hkrat ai sai;

(5) Shi a wudang hpe hpai hkawm ai shaloi hkrat ai sai;

(6) Shi hpe wudang hta dit shakap nna jen noi ai shaloi hkrat ai sai;

(7) Shi a garep hpe nri hte galun waw ya ai shaloi hkrat ai sai ni rai nga ai.

6. Madu Yesu a Sai hpe hkungga shagrau ai makam gaw hpa rai ta?

Madu Yesu wudang ntsa e si hkam ai shaloi lwi hkrat ai Shi a Sai gaw shinggyim masha yawng a ntsa de lwi hkrat sai.  Shi Madu a si hkam ai hte bai bai hkrung rawt wa ai lam gaw, anhte hpe myit mada ai lam jaw ya ai, shut hpyit mara hpe raw dat ya ai, htani htana asak jaw ya ai.

Lam mi hku rai yang, anhte yawng shada da matut mahkai ai lam nga wa ai, Karai Kasang a Wenyi hpe anhte shada da hta mu lu ga ai.  

"..hten mat chye ai aja gumhpraw hte n rai, ana n kap ai, ra n rawng ai Hkristu ngu ai sagu kasha a hpu la ai asai hte sha, nanhte hpe galai hkrang la sai" ngu nna Kasa Petru a shagun laika langai, daw kaba langai, daw kaji shi-matsat hte shi-jahku hta tsun da nga ai (1Pt. 1:18-19).

7. Yesu a Manu Dan ai Sai a lachyum gaw hpa rai ta?

Dai gaw : Shawng nnan, Madu Yesu wudang ntsa e noi nga ai aten, Shi Madu a Hkum Shan kaw na kaja wa pru ai sai hpe ngu ai re ngu nna Hkristan makam masham sharin ya ai. 

Lahkawng ngu na hta, Madu a Hpang Jahtum na Shana Shat sha Poi hta Madu Yesu tsabyi chyaru kaw nna shi a Sai shabyin shatai dat ai rai nga ai. 

8. Madu Yesu a Hpu Ging La ai Sai ngu ai gaw hpa na matu rai ta?

Madu Yesu gaw shinggyim masha yawng mayawng a matu, shanhte a shut hpyit mara hpan yawng a matu, shi a asak – Asai- hpe jaw kau ya sai.  Dai majaw, Yesu a Chyoi Pra dik, manu dan dik ai sai hpe hkungga shagrau ai shaloi, anhte myit malai lu na hte mara ni a matu ari dam hkam na lam hpe mung saw shaga nga ai.     Yawn  hkyen myit malai ai chyeju hkam la na matu rai nga ai.

Madu Yesu gaw, San Pra ai masha ni a akyu hpyi ga ni hpe htan ya nna, Shi a Nni Nkri yubak lam ni hpe azin ayang madun shadan dan ya sai.  Shi a hkum kaw nna Sai kahte Mun lahkawng, hkying matsat, mali tsa e sumshi (28,430) hkrat ai hpe pyi shadan dan wu ai.

Bai, Yesu tsun ai ga-si ni hpe laika ga-si ni de galai ya ai hte dai laika si ni hpe Yerusalem e nga ai Madu Yesu a lup hta na sumpu hta zing da ma ai.

Anhte yawng mung, madu Yesu a Chyoi Pra ai Wudang hpe nawku hkungga ai hte maren dai Wudang ntsa kaw na anhte a matu ru kau ya ai Shi a Chyoi Pra san seng nna manu dan hpu la ai Sai hpe mung myit dum hkungga nawku ga law.

Add new comment

1 + 0 =