Lusha Gam Akyu Hpyi Ai Ladaw Bai Du Ra Ai

Madu Yesu a Wudang lam,Nni n-kri yubak hkam, si hkam ai hte si ai kaw na, hpung shingkang hte bai hkrung rawt wa ai lam hpe kam sham, tsawra, myit mada ai Hkristan arawn alai ni hte akyu hpyi sumru let, Karai Kasang kaw na chyeju hkam la na aten rai nga ai.

Lusha Gam let akyu hpyi ai ngu ai shaloi, tinang hkrai machyi shim ai shara ni hta nga mat ai nre sha, tinang hte ni htep, rau nga ai ni hte rau, Hkristu Yesu a hpang, grau ni htep ai hku lachyum sung ai hku, hkan nang ai wenyi bu hkawm hkrun lam rai nga ai.

Anhte a myi man ni hpe kagyup kau nna, yawn ai hpe madun na aten n rai, anhte a nawku daw jau ai lam ni hte Synodal ngu ai wenyi hkrun lam hta awng sharawng ai hte rau hkawm sa ai lam hta grau maju jung ai hte hkan shadik na aten rai nga ai.

Karai Kasang jaw ai chyeju ni hpe kaga masha, hpu nau ni hpe garan na aten rai nga ai. Dai chyeju hpe lu garan hkra anhte galaw ra ai lam ni gaw Karai Kasang a mungga hpe htep lahti hti hka ja akyu hpyi sumru yu ai, tinang a tinggyeng akyu ni hpe marin marit , law hpa, n tara ai hku n tam ai: Ra kadawn nga ai, matsan mayan, karen gari hkrum nga ai ni hpe lakawn lanawn, garum shingtau ya ai bungli ni hta grau shakut ra ga ai.

Daining na Lusha Gam ladaw hte Paska Ladaw hta myit masin, hkum hkrang ,n gun atsam ma hkra hte shadi dung ai hku, shang lawm ai a marang e, anhte hkrum nga, hkrum ra ai ru yak jam jau lam ( Wudang lam ) ma hkra hpe tawt lai kau lu nna, ding hpring rap ra, simsa ai chyeju ni hpe hkam la lu na re.

Cardinal Charles Bo