A Lu ai Philip Rinaldi a Poi Nhtoi (December 5) 05 December 2022

A Lu ai Philip Rinaldi a Poi Nhtoi (December 5)

A Lu ai Philip Rinaldi gaw, Italy Mungdan, Lu Monferrato mying ai shara kaw, lai wa sai 1856 ning, May shata (26) ya shani shangai chyinghkai wa ai rai nga ai. Shi gaw, kaji ai ten kaw nna, San Pra ai Don Bosco hpe chye ai, raitimung, shi a asak (21) ning du ai shaloi she, Shi hpe Don Bosco shaga la ai rai nga ai.

Philip gaw, 1882 ning hta Jau tai wa ai hpang asak kaba sai Jau tai jawngma ni hpe yu gawn ai lit magam hpe gun hpai sai. 1889 ning kaw nna (12) ning tup Portugal hte Spain Mungdan kaw magam gun lai wa ai. 1901 ning hta, Don Bosco gaw, Shi hpe Jau Kaba (Vicar General) Lit hkam hte sut masa lit hkam aya hpe dang dat ya sai. Salesian Wuhpung hpe yu gawn ai aten kaw nna, Shi a wenyi lam woi masing gaw, grai tang du ai hpe mu lu nga ai. Dai majaw, dai aten hta Salesian Wuhpung gaw, grai rawt jat galu kaba wa sai rai nga ai.

1922 ning hta shi gaw, Rector Major (shing n rai) Ningbaw Kaba byin tai wa sai. Wa Jau Philip gaw, shi hte bungli rum Jau ni a wenyi rawt jat lam hte, Don Bosco hpe kam shamyet sadi dung ai lam hpe alak mi rai sharin ya ai. Shi madung tawn sharin ya ai lam ni gaw, Wenyi rawt jat lam, aten shagu Karai Kasang hte arau nga ra ai lam, Hkristan Sasana magam shachyen shaja sa wa ai shaloi Hkristan ni a ning rum ning tau rai nga ai, Nu Maria hpe kam shamyet ai myit kaba hte galaw shakut hkawmsa ra ai lam ni hpe sharin dawk bang ya ai. Dai hta n-ga, Wa Jau Philip gaw, Htawm hpang de byin wa na lam ni hte seng nna mung, “Aten ladaw a kumla” hpe tau chye lu ai shaman chyeju atsam mung lu ai wa rai nga ai. Tsun shadum ra ai lam ni hpe hkrit myit n lawm ai sha ja ja tsun shadum ya ai.

Wa Jau Philip gaw, 1931 ning, December shata (5) ya shani, Italy Mungdan, Turin mare hta, Madu kaw yup pyaw ban sa mat wa sai rai nga ai.

Shi n nga mat ai hpang, Wa Sarabyin Yawhan Pawlu (2) kawn, Shi hpe 1990 ning, April shata (29) ya shani, A Lu ai Masha ngu nna shagrau dat let, Shi a Poi Nhtoi hpe mung, December shata (5) ya shani masat dat ya sai rai nga ai.

Daini Nawku Hpung gaw, Wa Jau Philip Rinaldi a Poi Nhtoi hpe galaw nga ai ten hta, anhte a prat hta mung, Wa Jau Philip zawn bungli kaji hta raitim, kaba hta raitim, kang ka sadi dung let, gun hpai hkawmsa chye ai ni, byin tai lu hkra shakut nga ga ngu, n gun jaw dat lu n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)